Tõodo 20

Zabr nao-kẽndre

1Yãmb sã n yi n na n tɩ zab ne y bɛɛbã n yãnd tɩ b tara wiid la saar-dãmb la tãb-biis wʋsg n yɩɩd yãmb sẽn tarã, bɩ y ra zoe bãmb ye. Bala, Sẽn-Ka-Saab sẽn yaa yãmb Wẽnnaamã sẽn yiis yãmb Ezɩptã bee ne yãmba. 2Zabrã sɩngr sã n wa kolge, bɩ maan-kʋʋdã kolg Israyɛll nebã n gom ne bãmb n yeel yaa: 3«Israyɛll nebã, kelg-y-yã! Rũndã, yãmb segda y bɛɛbã n na n zabe. Da sak-y tɩ y sũyã sãam ye. Da zoe-y rabeem ye. Da yɛɛs-y-yã, la ra rig-y bãmb taoor ye. 4Bala, Sẽn-Ka-Saab sẽn yaa yãmb Wẽnnaamã yãagda yãmba, n na n zab ne y bɛɛbã n fãag yãmba.»

5Dẽ, seb-gʋndbã na n yeela nebã: «Ned bee yãmb sʋkã n me roog n nan ka paam n kẽ a pʋgẽ bɩ? Bɩ a lebg n kuili n da wa ki zabrã pʋgẽ tɩ ned a to tɩ kẽ a roogã pʋgẽ ye. 6Ned bee ka n sel reezẽ tɩɩs n nan ka rɩ a biis bɩ? Bɩ a lebg n kuili, n da wa ki zabrã pʋgẽ, tɩ ned a to reeg-a n soog ye. 7Ned bee ka n belem pag n nan ka peege? Bɩ a lebg n kuili, n da wa ki zabrã pʋgẽ, tɩ ned a to yõdg n peeg-a ye.» 8Seb-gʋndbã na n kell n goma ne nebã n yeel-ba: «Rabeem sẽn tar a soab t'a sũur ka keeme, bɩ a lebg n kuili, n da wa kɩt tɩ rabeem yõk a saam-biis a taabã ye. 9Seb-gʋndbã sã n wa gom ne nebã n sɛ, bɩ b yãk tãnsoben-dãmba, n kɩt tɩ b lʋɩ nebã taoore.

10Yãmb sã n kolg tẽng n na n zab ne-a, bɩ y reng n gom ne-a vɩ-bãan goamã. 11Bãmb sã n sak vɩ-bãanã n pak b tẽngã n kõ yãmba, bɩ y modg tẽngã nebã fãa tɩ b yɩ y tʋmtʋmdb la y yembse. 12Bãmb sã n ka sak yãmb ne vɩ-bãan n dat n zab ne yãmba, bɩ y gũbg b tẽngã. 13Sẽn-Ka-Saab sẽn yaa yãmb Wẽnnaamã na n kɩtame tɩ y tõog-a, la yãmb na n kʋʋ raopã fãa ne zabr sʋʋga. 14La yãmb na n sooga b pagbã ne b kambã, la b rũmsã ne bũmb nins fãa sẽn be tẽngã pʋgẽ wã, n dɩ y bɛɛbã bũmb nins fãa Sẽn-Ka-Saab sẽn yaa yãmb Wẽnnaamã sẽn kõ yãmbã. 15Yaa woto la yãmb tog n maan tẽms nins sẽn zãr-b ne yãmba, n ka naag buud nins sẽn be ka wã tẽmsã ye. 16La sã n yaa ne buud nins tẽms Sẽn-Ka-Saab sẽn kõ yãmb tɩ y soogã pʋgẽ, ra bas-y bũmb baa a yembr tɩ vɩɩmd ye. 17Yãmb na n sãama Hɛt ne Amoor-dãmbã, la Kana-rãmbã, ne Ferɛɛz la Hevi la Zebuuz-rãmbã wa Sẽn-Ka-Saab sẽn yaa yãmb Wẽnnaamã sẽn yeel yãmbã. 18Sẽn na yɩlẽ tɩ b ra wa zãms yãmb tɩ y maan tʋʋm-beed nins bãmb sẽn maand b wẽnnaam-dãmbã yĩng n beegd ne Sẽn-Ka-Saab sẽn yaa yãmb Wẽnnaamã ye. 19Yãmb sã n gũbg tẽng n kaoose, n na n zab ne-a n deeg-a, bɩ y ra zẽk lar n kɛ tɩɩsã ye. Yãmb tõe n dɩɩ bãmb biisã, dẽ wã, bɩ y ra kɛ-b ye. Tɩɩsã sẽn be weoogẽ wã yaa ninsaalb tɩ yãmb na n zab ne-b la? 20Yãmb tõe n sãamame, la y kɛ tɩɩs nins yãmb sẽn mi tɩ b biisã ka rɩtã, n tall-b n maan teed n tɩ n gũbg tẽng ning sẽn zabd ne yãmbã, n zab ne-a hal n wa tõog-a zãnga.»

Currently Selected:

Tõodo 20: MPBU

Highlight

Copy

Compare