Tõodo 13

1 # Tõ 4.2, Vẽn 22.18,19 Yãmb na n deega goam nins fãa mam sẽn yeel yãmbã, la y sak-ba. Ra paas-y bũmbu, la y ra boog bũmb ye.

Sɩbgr wẽn-naands pʋʋsdbã yĩnga

2No-rɛɛsa, wall ned sẽn paam vẽnegr zãmsd pʋg sã n wa yik n togs yãmb bãnd wall bõn-bãnde, 3tɩ bãndã ne bõn-bãndã paam pidsgu, t'a yeel yãmb tɩ y wa tɩ b tɩ tũ wẽnnaam-dãmb a taab yãmb sẽn ka mi, la y waoog-ba, 4bɩ y ra kelg no-rɛɛs-kãng wall nin-kãng soab goamã ye. Bala, yaa Sẽn-Ka-Saab sẽn yaa yãmb Wẽnnaamã n makd yãmb n dat n bãng yãmb sã n tũuda bãmb ne y sũyã fãa la ne y yamã fãa. 5Bɩ y tũ Sẽn-Ka-Saab sẽn yaa yãmb Wẽnnaamã la y zoe bãmba. Sak-y bãmb tõodã n kelg b koɛɛgã, la y waoog bãmb n gãd-b kãenkãe. 6No-rɛɛs-kãng wall zãmsdã soab tog n kiime. Bala, yẽnda zãmsa neb tɩ b zãgs Sẽn-Ka-Saab sẽn yaa yãmb Wẽnnaamã sẽn yiis yãmb Ezɩpt yembd pʋgẽ wã, n dat n kɩt tɩ y bʋdg n bas sor ning Sẽn-Ka-Saab sẽn yaa yãmb Wẽnnaamã sẽn yeel yãmb tɩ y tũ wã. Yaa woto la y na n yiis bũmb ning sẽn yaa wẽngã yãmb sʋka.

7Fo ba-biig sẽn yaa f ma-biiga, wall fo bi-ribl bɩ f bi-pugla, wall fo pʋg-rʋmd bɩ f zoa f sẽn nong wa f meng sã n soos n belg n yeel foom tɩ f wa tɩ y pʋʋs buud a taab wẽnnaam-dãmb yãmb ne y yaab-rãmbã sẽn ka mi, 8sẽn yaa neb nins sẽn gũbg yãmbã wẽnnaam-dãmba, sẽn pẽ-b ne yãmb la sẽn zãr-b ne yãmba, la sẽn be zĩigã fãa tẽngã zugu, 9bɩ f ra sake, la f ra kelg-a me ye. Ra zoe a soabã nimbãanega, la f ra bas-a t'a põs ye. Ra maan sugr ne a soab me ye. 10Kʋ a soabã. Foom n tog n yɩ pipi n lobg-a ne kugr tɩ neb a taabã wa sõng foom tɩ y kʋ-a. 11Fo na n loba a soabã ne kug n kʋ, yẽnda sẽn dat n kɩt tɩ fo bas Sẽn-Ka-Saab sẽn yaa yãmb Wẽnnaamã sẽn yiis yãmb Ezɩpt yembd pʋgẽ wã yĩnga. 12Israyɛll nebã fãa na n wʋma bõn-kãng tɩ rabeem yõk-b tɩ b ka leb n maan yel-wẽnd a woto buud yãmb sʋk ye.

13Yãmb sã n wʋm ned sẽn gomd yãmb tẽng a yembr Sẽn-Ka-Saab sẽn yaa yãmb Wẽnnaamã sẽn kõ yãmb tɩ y zĩndã pʋgẽ wɛɛngẽ n yetẽ: 14«Nin-yood n yi yãmb sʋkã n kɩt tɩ tẽngã nebã bʋdge, n yeel tẽngã nebã tɩ b wa tɩ b kẽng n tɩ tũ buud a taab wẽnnaam-dãmb yãmb sẽn ka mi,» 15bɩ y sok n bãng a yell neere. La y sã n mik tɩ b sɩd maana yel-wẽn-kãng yãmb sʋka, 16bɩ y kʋ tẽngã neb ne b rũmsã fãa ne zabr sʋʋga. Sãam-y tẽngã ne bũmb nins fãa sẽn be a pʋgẽ wã. 17Bɩ y wʋk teedã fãa n wa tẽngã zĩ-sõasdgẽ, la y yõog tẽngã ne bũmb nins fãa sẽn be a pʋgẽ wã bugum Sẽn-Ka-Saab sẽn yaa yãmb Wẽnnaamã yĩnga, t'a lebg bug-toaalg wakat fãa. Bɩ b ra leb n me-a ye. 18Ra sak-y n dɩk-y bũmb nins sẽn yaa kãab-wẽngã ba a yembr ye. Bas-y tɩ Sẽn-Ka-Saab sũur sig tɩ b zoe yãmb nimbãaneg n kɩt tɩ y fɩɩg n lebg wʋsg wa b sẽn dag n wẽen ne y yaab-rãmbã. 19Yãmb wee n kelgd Sẽn-Ka-Saab sẽn yaa yãmb Wẽnnaamã koɛɛgã, la y sakd bãmb tõod nins mam sẽn kõ yãmb dũndã wã, n maan sẽn noom Sẽn-Ka-Saab sẽn yaa yãmb Wẽnnaamã bala.»

Currently Selected:

Tõodo 13: MPBU

Highlight

Copy

Compare