A Dãniyɛlle 9
9
A Dãniyɛll pʋʋsgo
1-2A Asuyeruus biig a Daryuus sẽn yaa Meed-rãmbã buud nedã sẽn wa n lebg Babilond soolem dĩmã pipi yʋʋmdã pʋga, maam a Dãniyɛll karma sɛbã pʋse, n bãng tɩ na n taa yʋʋm pis-yopoe tɩ Zeruzalɛm sãoongã yaool n sɛ,#9.1-2 yʋʋm pis-yopoe tɩ Zeruzalɛm sãoongã yaool n sɛ: Rat n yeelame tɩ Zeruzalɛm tẽngã b sẽn dag n wã wã na n kell n yɩɩ raboog n kaoos yʋʋm pis-yopoe tɩ b yaool n lebs-a n me. D karem Zer 25.11 ne 29.10. wa Wẽnnaam no-rɛɛs a Zeremi sẽn dag n yeelã: 3Dẽ, mam loee noore, la m yeelg sũ-sãang fuugu, n yug m zug tompeglem, n na n pʋʋs Zu-soab a Wẽnnaam ne se-yõkre. 4Mam pʋʋsa Sẽn-Ka-Saab sẽn yaa mam Wẽnnaamã, n sak n deeg tɩ d kongame n yeele: «Zu-soab a Wẽnnaam, yãmb yaa kãsenga, la yãmb zemsa zoeese. Yãmb gũuda y kaoolã, la y zoeta neb nins sẽn nong yãmb la b sakd yãmb tõodã nimbãanega! 5Tõnd kongame, tõnd beegame, d yɩɩ nin-wẽnse la kɩɩsdba, la tõnd wẽnemdame n bas yãmb tõodã ne y noyã. 6Yãmb tʋmtʋmdbã sẽn yaa no-rɛɛsdbã goma ne tõnd dĩm-dãmbã ne d nanambsã, la d yaab-rãmbã ne tẽngã nebã fãa, ne yãmb yʋʋre. La tõnd ka kelg-b ye. 7Zu-soaba, yãmb yaa tɩrlem soaba, la rũndã daarã, yãndã bee tõnd sẽn yaa Zʋʋda ne Zeruzalɛm nebã zugu, la Israyɛll gillã fãa neb zugu. Yaa sẽn pẽ-ba, la sẽn zãr-bã. Bãmb bee tẽms nins yãmb sẽn dag n dig-b tɩ b kẽngã pʋse, b sẽn kɩɩs yãmbã yĩnga. 8Sẽn-Ka-Saabo, yãnd tara tõnd ne d rĩm-dãmbã, la d nanambsã ne d yaab-rãmbã, bala tõnd beega yãmba. 9Tõnd Zu-soab a Wẽnnaam, tõnd kɩɩsa yãmba, la yãmb yaa nimbãan-zoɛta, la sugr soaba. 10Sẽn-Ka-Saab sẽn yaa tõnd Wẽnnaamã tũnuga b no-rɛɛsdbã sẽn yaa bãmb tʋmtʋmdbã, n kõ tõnd bãmb tõodã, la tõnd ka reeg ye. 11Israyɛll nebã fãa kɩɩsa yãmb a Wẽnnaam tõogã, la b wẽnemdame n ka kelg yãmb koɛɛgã ye. Rẽ kɩtame tɩ kãab-wẽng ning b sẽn gʋls a Moyiis sẽn yaa yãmb tʋmtʋmdã tõod sebr pʋgẽ wã paam tõndo, tõnd sẽn beeg yãmbã yĩnga. 12Wẽnnaam pidsa goam nins bãmb sẽn dag n gom n yeel tɩ b na n sɩbga tõnd ne d nanambs nins sẽn dag n so tõndã. Wẽnnaam kɩtame tɩ to-kãseng paam tõnd a Zeruzalɛm nebã, la saagã tẽngre, toog a woto buud nan zɩ n zĩnd ye. 13Tõ-kãensã fãa paama tõnd wa sẽn gʋls Wẽnnaam tʋmtʋmd a Moyiis tõodã sebr pʋgẽ wã, la tõnd ka kos Sẽn-Ka-Saab tɩ b sik sũur ne-d ye. Tõnd ka wẽnemd n bas d yel-wẽnã, n tẽ tɩ yãmb sɩd na n maana wa y sẽn yeelã ye. 14Woto kɩtame tɩ Sẽn-Ka-Saab bas tɩ to-kãngã paam tõndo. Bala, Sẽn-Ka-Saab sẽn yaa tõnd Wẽnnaamã yaa tɩrlem soab b tʋʋmã fãa pʋse. La yaa tõnd n ka kelg bãmb koɛɛgã bala.
15La moasã, Sẽn-Ka-Saab sẽn yaa tõnd Wẽnnaam, yaa yãmb n yiis y nebã Ezɩpt tẽngã ne y nugã sẽn tar pãngã, tɩ yãmb yʋʋrã yi hal tɩ ta rũndã. La tõnd kongame, tõnd beega yãmba. 16Zu-soaba, yãmb tɩrlem tʋʋmã yĩnga, bɩ y sik y sũur ne Zeruzalɛm sẽn yaa yãmb tẽnga, la y tãn-sõngã.#9.16 Tãn-sõngã: Tɩ ges-y bilgrã sẽn be Dãniyɛll 11.45. Bala, tõnd kongrã ne d ba-rãmbã beegrã yĩnga, neb nins sẽn gũbg tõndã paoogda Zeruzalɛm ne yãmb nebã. 17Moasã, tõnd Wẽnnaam, bɩ y kelg y tʋmtʋmdã pʋʋsgã ne a se-yõkrã, la y mengã waoogr yĩnga, bɩ y wẽnemd y nimbãan-zoeer nengã n ges y zĩ-sõngã sẽn sãamã! 18Mam Wẽnnaam, kɩll-y y tʋbr n kelge! Puk-y y nin n ges tõnd tẽngã, tẽng ning b sẽn boond yãmb yʋʋrã a pʋgẽ wã sẽn lebg raboogã. Ka tõnd tʋʋm-sõamã yĩng la tõnd sẽn yõkd yãmb sɛɛg woto wã ye. La yaa yãmb nimbãan-zoeerã sẽn yaa kãsengã yĩnga. 19Zu-soaba, kelg-y-do! Kõ-y-d sugri! Zu-soaba, kɩll-y y tʋbr n kelg-do! Y mengã waoogr yĩnga, bɩ y maan d sẽn kotã, la y ra kaoos ye. Bala, tẽngã yaa yãmb tẽnga, la nebã yaa yãmb nebã.»
Malɛɛk a Gabriyɛll wa n goma ne a Dãniyɛlle
20Mam dag n ket n bee pʋʋsg pʋga, n togsd m kongrã, ne Israyɛll nebã sẽn yaa mam buudã kongrã, la m pʋʋsd Sẽn-Ka-Saab sẽn yaa mam Wẽnnaamã, la m yõkd bãmb sɛɛg b tãn-sõngã yĩnga. 21#Luk 1.19,26Mam dag n ket n bee pʋʋsg pʋga, la sẽn zems zaabr maoong maaneg wakate, malɛɛk a Gabriyɛll sẽn yaa ned ning mam sẽn dag n yãnd mam pipi vẽnegrã pʋgẽ wã yɩka ne tʋʋlem n wa mam nengẽ. 22Malɛɛk a Gabriyɛll goma ne maam n yeel yaa: «Dãniyɛlle, mam sẽn wa moasã wã, yaa sẽn na n vẽneg fo yamã.» 23Hal fo se-yõkrã sɩngrẽ, Wẽnnaam tʋma koɛɛga, la mam waame n na n togs foom koe-kãnga. Bala, fo yaa Wẽnnaam nin-nongre. Kelg koɛɛgã neere, la f wʋm vẽnegrã võore.
24Ade, b yãka yʋʋm a yopoe naoor pis-yopoe,
fo nebã ne tẽn-sõngã yĩnga,
n na n kɩt tɩ tʋʋm-beedã ne kongrã sɛ,
tɩ yel-wẽnã me tõe n paam pekre,
sẽn na n yɩlẽ tɩ tɩrlem puk wakat fãa,
tɩ vẽnegrã ne pĩnd-n-bãngr goamã paam pidsgu,
la b welg zĩig sẽn welg toor n yɩɩdã toore.
25Dẽ wã, bɩ f bãng bõn-kãngã, la f wʋm a võore:
Sẽn sɩng ne daar ning b sẽn togs koɛɛgã
n yeel tɩ b lebs n me Zeruzalɛmã,
hal tɩ ta Wẽnnaam nin-tũusdgã zamaanẽ,
yaa yʋʋm a yopoe naoor a yopoe.#9.25 yʋʋm a yopoe naoor a yopoe: Sɛb kẽer pʋse, b ka gʋlsd tɩ yʋʋm a yopoe ye. B ningdame tɩ semen-dãmb a yopoe.
La yʋʋm a yopoe naoor pis-yoob la a yiibã wakate,
b na n lebs n mee Zeruzalɛm zĩisã,
la b lebs n me a lalsã. Rẽ na n yɩɩ toog wakate.
26Yʋʋm a yopoe naoor pis-yoob la a yiibã loogr zugẽ,
b na n kʋʋ Wẽnnaam nin-tũusdgã,
tɩ ned ba a yembr ka na n sõng-a ye.
La naab a to ne a neb n na n wa,
bãmb na n sãama tẽngã ne zĩ-sõngã.
La b na n sãam-a-la ne sũ-puug-kãsenga,
tɩ yɩ naabã baoosgo.
B yãka yam tɩ sãoongã na n kaoosame, hal tɩ tãag zabrã sɛɛbo.
27 #
Dãn 11.31, 12.11, Mat 24.15, Mark 13.14 La yʋʋm a yopoe wã sẽn wat n dabd sɛɛbo,
a na n maana weoogr kaool ne neb wʋsgo.
La yʋʋm a tã la pʋɩ-sʋkã sã n ta,
naabã na n kɩtame tɩ b bas maoongã maanego,
ne kũunã kɩsgo.
Sãamdã na n maana tʋʋm-wẽns hal tɩ loog nugu.
La a na n maana woto,
hal tɩ wakat ning b sẽn yãk n na n
sãam-a wã wa ling-a.»
Currently Selected:
A Dãniyɛlle 9: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
