2 Rĩm-dãmba 6

Lar sẽn duk koom zugu

1Daar a yembre, no-rɛɛsdbã karen-biis yeela a Eliize yaa: «Ges-y-yã, zĩig ning tõnd sẽn be ne yãmbã yaa sẽka. 2Dẽ wã, d kot-y lame tɩ y kõ-d noor tɩ d kẽng Zʋrdẽ kʋɩlgã noore, tɩ ned kam fãa kɛɛg raoogo, n wa ti roog n kẽ.» La a Eliize yeel-b lame tɩ b kẽnge. 3Woto, bãmb ned a yembr kosa a Eliize yaa: «M kotame tɩ y yãag-d tɩ d kẽnge?» A Eliize leokame yaa: «Beneere! Mam na n yãag-y lame.» 4Dẽ, a Eliize tũu bãmb n kẽnge. La bãmb sẽn ta Zʋrdẽ kʋɩlgã noore, b sɩnga tɩɩsã kɛɛbo. 5La bãmb ned a yembr sẽn kɛɛd raoogo, a larã baagame n lʋɩ koomẽ wã. Dẽ, a kelmame n yeele: «Kayto! M soaala, mam yaool n dag n penga larã!» 6Wẽnnaam dao a Eliize soka yẽnda yaa: «Fo larã lʋɩɩ zĩ-bʋgo?» La raoã wilga larã sẽn lʋɩ zĩig ningã. La a Eliize kɛɛga raoog n lob zĩig ning larã sẽn lʋɩẽ wã, la larã ruka koomã zugu. 7A Eliize yeela raoã t'a yaag larã. La raoã tẽega a nug n yaag-a.

Sẽn-Ka-Saab lobga Siiri tãb-biis zondo

8Wakat n zĩndi, tɩ Siiri rĩmã rag n zabd ne Israyɛll nebã. Dẽ, Siiri rĩmã yẽsa ne a tãb-biis nanambsã n wilg-b b sẽn na n kẽng zĩig ning n tɩ zab ne Israyɛll nebã. 9La Wẽnnaam dao a Eliize tʋmame tɩ b tɩ togs Israyɛll dĩmã yaa: «Siiri nebã bee zĩ-kãngã, dẽ wã, gũus-y n da wa kẽng be ye.» 10Israyɛll dĩma rag n tʋmda neb zĩig ning a Eliize sẽn wilg yẽnda wã tɩ b kẽnd be n gũusdẽ.

Bõn-kãng ka yɩ vugr bɩ naoor a yiib bal ye. 11Yel-kãng kɩtame tɩ Siiri rĩmã sũur sãame. Dẽ, a boola a tãb-biis nanambsã n yeel-b yaa: «Wilg-y maam ned ning sẽn be tõnd sʋkã n dɩkd tõnd yɛlã n kẽnd n togsd Israyɛll dĩmã.» 12Yẽnda tʋmtʋmdbã ned a yembr yeela yẽnda yaa: «N-na! Ka tõnd sʋkã ned baa a yembr n kẽnd n togsdẽ ye! Yaa Wẽnnaam no-rɛɛs a Eliize sẽn be Israyɛllã. Yẽnda tõe n dɩka goam nins fãa yãmb sẽn zĩnd y ro-gãagẽ wã n gomã, n togs Israyɛll dĩmã.» 13Siiri rĩmã yeelame: «Kẽng-y n tɩ bãng-y zĩig ning a Eliize sẽn beẽ wã, la y wa togs-ma. Mam na n tʋmame tɩ b tɩ yõk-a n wa.» Neb nins sẽn kẽngã lebg n wa togsa rĩmã t'a Eliize bee Dotã tẽnga. 14Dẽ, Siiri naabã tʋma wiid ne saar-dãmba, la tãb-biis wʋsgo, tɩ b kẽng ne yʋng n tɩ gũbg tẽngã gilli. 15La Wẽnnaam daoã rakõor yika tõd-beoog n yi, n mik tɩ tãb-biis ne wiidi, la saar-dãmb n gũbg tẽngã. Dẽ, yẽnda yeela Wẽnnaam daoã yaa: «M soaala! Tõnd na n kẽe yɛ?» 16A Eliize yeela yẽnda: «Da zoe rabeem ye. Bala, sẽn be-b ne tõndã sõor yɩɩda sẽn be-b ne bãmbã.» 17La a Eliize pʋʋsa Wẽnnaam n yeel yaa: «Sẽn-Ka-Saabo, mam kot-y lame tɩ y puk bi-bɩɩgã nin t'a tõog n yãnde.» La Sẽn-Ka-Saab puka bi-bɩɩgã nini, la a yãndame tɩ tãngã kell n pida ne tãb-biisi, la bugum saar-dãmb#6.17 Bugum saar: Tɩ ges-y 2.11 pʋgẽ bilgrã. n gũbg a Eliize.

18Siiri nebã yii tãngã zug n sig n kẽnd n wat a Eliize nengẽ. La Wẽnnaam dao a Eliize pʋʋsa Sẽn-Ka-Saab n yeele: «Mam kota yãmb tɩ y kɩt tɩ nin-bãmbã fãa lebg zoense!» Dẽ, Sẽn-Ka-Saab kɩtame tɩ Siiri nin-bãmb lebg zoens wa a Eliize sẽn kosã. 19A Eliize yeela bãmb yaa: «Ka kaanẽ la sorã ye! Leb n ka tẽngã la ka me ye! Wa-y tɩ m yãag-y n kẽng ned ning yãmb sẽn baoodã nengẽ!» Dẽ, a Eliize talla bãmb n kẽng Samaari tẽngã pʋga. 20Bãmb sẽn ta Samaari tẽngã pʋga, a Eliize yeelame yaa: «Sẽn-Ka-Saabo, mam kotame tɩ y puk nin-bãmbã ninã tɩ b yã.» La Sẽn-Ka-Saab puka b ninã, la b mikame tɩ bãmb sẽn beẽ wã yaa Samaari tẽngã sʋka. 21Israyɛll dĩmã sẽn yã Siiri nebã, a sokame: «M saamba, m tog n kʋ-b lame bɩ?» 22A Eliize leokame: «Ra-y kʋ-y-b ye. Dẽ yĩnga, yãmb na yõg neb zabr zĩigẽ n maan yembs n leb n kʋʋd-ba? Bao-y rɩɩb ne koom n kõ-b tɩ b rɩ la b yũ. La y bas-b tɩ b leb b soaalã nengẽ.» 23Dẽ, Israyɛll dĩmã kɩtame tɩ b bao rɩɩb sõama, n kõ-b tɩ b rɩ la b yũ. Dẽ poore, b bas-b lame tɩ b looge, la b lebg n leba b soaalã nengẽ. Rẽ tɛka, Siiri nebã ka leb n wa n zab ne Israyɛll nebã yɛs ye.

Kom-kãseng kẽe Samaari soolem

24Rẽ loogr zugẽ, Siiri rĩm a Bɛn-Hadaad tigma a tãb-biisã fãa n kẽng n tɩ gũbg Samaari tẽngã n na n zab ne-a. 25Dẽ, Siiri nebã sẽn dag n gũbg Samaari tẽngã n kaoos to-to wã kɩtame tɩ kom-kãseng kẽ Samaari tẽngã, hal tɩ bõang zug koosd wanzuri wakɩ-koeems pis-nii, tɩ wall bĩnd ne wũmbl koosd wanzuri wakɩ-koeems a nu. 26Daar a yembre, Israyɛll dĩmã rag n bee tẽngã lalg zug n kẽnd n gilgdẽ. Dẽ, pag a yembr kelmame n bool rĩmã n yeele: «M soaala, sõng-y-ma!» 27Rĩmã leokame: «Sã n ka Sẽn-Ka-Saab n na n sõng foom, mam na n sõnga foom ne bõe? Mam ka tar koodo, m ka tar reezẽ rãam me ye!» 28La rĩmã wẽnemd n soka pagã yaa: «Yaa bõe yell n tar-fo?» Tɩ pagã leoke: «Ade, nindaarẽ, pʋg-kãngã yeela maam yaa: Rɩk f biigã n wa tɩ d wãb rũndã, tɩ beoogo, bɩ d wãb mam biigã. 29#Tõ 28.57, Wiis 4.10Dẽ, tõnd sɩd dʋga mam biigã n wãbe. La vẽkembeoogo, mam yeel-a lame t'a rɩk a biigã n wa tɩ d rʋg n wãbe. La a rɩka a biigã n tɩ solge.» 30Rĩmã sẽn wʋm pagã goamã, a pãrsa a futu. La rĩmã sẽn dag n be lalgã zug n kẽndã, nebã yãame t'a yera bot a futã tẽngre. 31Israyɛll dĩmã rag n yeta a sũurẽ yaa: «Mam sã n ka fiuug a Safat biig a Eliize zugã rũndã, bɩ Wẽnnaam da bas-m ye.»

A Eliize wilga kom-kãsengã sɛɛbo

32Wakat-kãnga, a Eliize rag n be a roogẽ wã n zĩẽ, la tẽngã kãsem-dãmb rag n bee ne yẽnda. La rĩmã tʋma ned a Eliize nengẽ. La sẽn deng nin-kãng sẽn na n ta, rẽ t'a Eliize yeela kãsem-dãmbã yaa: «Ges-y-yã, nin-kʋʋd biigã tʋma ned t'a wa fiuug mam zugã! Ade, gũus-y neere, la y pag kʋɩlengã n gɩdg-a t'a ra kẽ ye. Yẽnda soaalã pʋgd-a lame n watẽ.» 33A Eliize sẽn nan ket n gomd ne kãsem-dãmbã bal yee, la rĩmã sẽn be waoongẽ, n ta n yeel a Eliize yaa: «Sã n yaa Sẽn-Ka-Saab n bas tɩ to-kãensã fãa paamd tõndo, mam na n leb n teega bãmb n maan bõe?»

Currently Selected:

2 Rĩm-dãmba 6: MPBU

Highlight

Copy

Compare