2 Kibayã 13
13
A Abiya rĩungu
(1Rĩm 15.1-8)
1A Zeroboaam naamã yʋʋm piig la a nii soaba la a Abiya lebg Zʋʋda rĩma. 2Yẽnda rɩɩ naamã Zeruzalɛm yʋʋm a tãabo. Yẽnda ma wã yʋʋr la a Mikaya, n yaa Gibeya rao a Uriyɛll bi-pugla.
Zabr zĩnda a Abiya ne a Zeroboaam sʋka.
3La a Abiya yika zabrã ne tãb-biis tus kobs-naas sẽn yaa gãndaad n mi zabr sõama. La a Zeroboaam me wa ne tãb-biis tus kobs-nii sẽn yaa gãndaad n mi zabr sõama. 4Dẽ, a Abiya tɩ rʋʋ Semarayim tãngã sẽn be Efrayiim tãmsã sʋkã zug n yeele: «Zeroboaam, la yãmb fãa sẽn yaa Israyɛll nebã, kelg-y yã!
5Yãmb ka mi tɩ Sẽn-Ka-Saab sẽn yaa Israyɛll Wẽnnaamã sẽn na n maan kaool ne a Davɩɩdã b naaga yamsem, n dɩk Israyɛll naamã n kõ yẽnda ne a yagensã tɩ b soog wakat fãa yĩng la? 6La a Nebat biig a Zeroboaam sẽn yaa a Davɩɩd biig a Salmo tʋmtʋmdã yikame n kɩɩs a soaalã. 7La nin-yaals sẽn ka bark lagma yẽnda n tõdg a Salmo biig a Roboaam. La a Roboaam sẽn dag n yaa yãag t'a yamã ka bɩ wã yĩng kɩtame t'a ka tõog n kɩɩs-b ye. 8La moasã y yetame tɩ y kõn sulg y mens n sak Sẽn-Ka-Saab soolmã sẽn be a Davɩɩd yagensã kambã nugẽ wã ye. Ade, yãmb yaa kʋʋn-kãseng sẽn sũ tãpo, la y tar sãnem nag-bi nins a Zeroboaam sẽn dag n maan n kõ yãmbã, tɩ yaa y wẽnnaam-dãmbã. 9La yãmb diga a Aarõ kom-dibli wã sẽn yaa maan-kʋʋdbã ne Leevi nebã, la y yãk neb n maan maan-kʋʋdb wa bu-zẽms a taabã. La ned ning fãa sẽn dag n tallda loalg ne pe-raad a yopoe n wa, lebgda wẽn-naan-bãmb maan-kʋʋdba, la b yaool n ka wẽnnaam-dãmb me ye. 10Sã n yaa ne tõndo, yaa Sẽn-Ka-Saab n yaa tõnd Wẽnnaam, la tõnd ka bas bãmb ye. La maan-kʋʋdb nins sẽn maand tʋʋmdã Sẽn-Ka-Saab yĩngã yaa a Aarõ kambã, ne Leevi nebã. 11La yibeoog ne zabr fãa bãmb maanda maand sẽn yõogd bugum Sẽn-Ka-Saab yĩnga, la b yõogd tɩdare, la b rogend kaset burã sãnem taabl ning sẽn welg toorã zugu. La zaabr fãa bãmb yõgenda sãnem fɩtl doagendgã fɩtl-dãmba. Bala, yaa tõnd n maand Sẽn-Ka-Saab sẽn yaa tõnd Wẽnnaamã tʋʋmde. La yãmba, yãmb basa bãmba. 12La ade, Wẽnnaam n yaa tõnd naaba, la tõnd tara bãmb maan-kʋʋdbã ne tãntãadã sẽn tar n peebdẽ wã n na n peeb n zab ne yãmba. Dẽ, Israyɛll kamba bɩ y ra zab-y ne Sẽn-Ka-Saab sẽn yaa yãmb yaab-rãmb Wẽnnaamã ye. Bala, yãmb ka na n tõog ye.»
13La wakat-kãnga, rẽ t'a Zeroboaam rag n tʋma tãb-biis tɩ b soos n gilg Zʋʋda nebã poorẽ. Dẽ, Israyɛll nebã rag n bee Zʋʋda nebã taoore, tɩ nebã b sẽn bẽdã be b poorẽ. 14Dẽ, yɩɩ tɩlɛ ne Zʋʋda nebã tɩ b wẽnemd n na n zab ne nebã poorẽ, la taoore. Woto, bãmb kelmame n bool Sẽn-Ka-Saabo, la maan-kʋʋdbã peeba bardã. 15Zʋʋda nebã kelma zabr kɛlenga. La bãmb kɛlengã wakate, Wẽnnaam kɩtame t'a Abiya ne Zʋʋda nebã tõog a Zeroboaam ne Israyɛll tãb-biisã fãa. 16Israyɛll nebã zoeeme n na n põs Zʋʋda nebã, la Wẽnnaam kɩtame tɩ Zʋʋda nebã tõog Israyɛll nebã. 17A Abiya ne a nebã tõoga bãmb ne tõogr kãsenga. Bãmb kʋʋ Israyɛll neb nins sẽn mi zabr sõama wã tus kobs-nu. 18La wakat-kãnga, Israyɛll nebã paama paoogre, la Zʋʋda nebã paama tõogre. Bala, bãmb dag n teega Sẽn-Ka-Saab sẽn yaa bãmb yaab-rãmba Wẽnnaam. 19A Abiya riga a Zeroboaam n zab ne-a n deeg tẽmse: yaa Betɛll ne a tẽn-kɩremsã, Yesana ne a tẽn-kɩremsã, la Efrõ me ne a tẽn-kɩremsã.
20A Abiya rĩungã wakate, a Zeroboaam ka leb n paam pãng ningã a sẽn dag n tarã ye, la Sẽn-Ka-Saab wẽ-a lame n kʋ. 21La a Abiya paama pãnga. Yẽnda talla pagb piig la a naase, la a roga kom-dibli pisi la a yiibu, la kom-pugli piig la yoobe.
22A Abiya vɩɩmã kibar la tʋʋm nins fãa a sẽn maanã gʋlsa bãngda a Ido sebrã pʋga. 23A Abiya saka a saam-dãmba, la b mum-a-la a Davɩɩd tẽngã pʋga. La yẽnda biig a Aaza n led yẽnda zĩigẽ n lebg rĩma. La yẽnda vɩɩmã wakate, tẽngã vɩɩmda bãan yʋʋm piiga.
Currently Selected:
2 Kibayã 13: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
