2 Kibayã 12
12
Ezɩpt rĩm a Sɩsak wa n zaba ne Zʋʋda
(1Rĩm 14.25-28)
1A Roboaam naamã sẽn wa n paam pãnga, la yẽnda mengã me paam pãnga, a basa Sẽn-Ka-Saab tõogã sakre, la Israyɛll nebã fãa me maana wa yẽnda. 2A Roboaam sẽn deeg naam tɩ yʋʋm nuunẽ, la Ezɩpt rĩm a Sɩsak yik zabr ne Zeruzalɛm. Bala, bãmb maana yel-beed Sẽn-Ka-Saab nifẽ. 3Rĩm a Sɩsak yii Ezɩpt n wa ne zabr saar-dãmb tusr la kobs-yi, la wed-rʋʋdb tus-pis-yoobe, la tãb-biis sẽn ka tõe n sõd n sɛ sẽn yit Libi ne Sukit la Kuus tẽmsẽ wã. 4Yẽnda zab n deega Zʋʋda tẽms nins sẽn tar-b lalsã, la a sãag n ta Zeruzalɛm. 5Dẽ, Wẽnnaam no-rɛɛs a Semaya kẽng n tɩ yãnda a Roboaam, ne Zʋʋda nanambsã sẽn dag n tigim taab Zeruzalɛm a Sɩsak waoongã wakatã. Yẽnda yeel-b lame yaa: «Ad Sẽn-Ka-Saab sẽn yeta: Yãmb basa maam! Woto yĩnga, mam me basda yãmb rĩm a Sɩsak nugẽ.»
6Dẽ, Israyɛll nanambsã ne rĩma sika b mense, la b yeelame: «Sẽn-Ka-Saab yaa tɩrlem soaba!» 7La Sẽn-Ka-Saab sẽn yãnd tɩ bãmb sika b mensã, Sẽn-Ka-Saab leb n goma ne a Semaya n yeel-a yaa: «Bãmb sẽn sik b mengã yĩngã, mam ka na n sãam bãmb ye. Wakat bilf sã n paase, mam na n kɩtame tɩ b põse. Bala, mam ka na n leb n puug m sũurã ne Zeruzalɛm, n bas tɩ Ezɩpt rĩm a Sɩsak wa sãam-a ye. 8La baoosgo, mam na n basame tɩ bãmb yɩ a Sɩsak yembse. Dẽ, bãmb na n bãnga welgr ning sẽn be mam sakrã, wall tɩ sak tẽms a taabã soolem sʋka.»
9 #
1Rĩm 10.16,17, 2Kib 9.15,16 Ezɩpt rĩm a Sɩsak wa n zaba ne Zeruzalɛm. Yẽnda wʋka Sẽn-Ka-Saab roogã laogo, la a wʋk rĩmã na-yirã laogã, yẽnda wʋka fãa. Yẽnda wʋka sãnem gãnd nins fãa rĩm a Salmo sẽn dag n kɩt tɩ b maanã. 10Rĩm a Roboaam maana zũud gãndo, n ledg sãnem gãndã zĩigẽ, la a rɩk-b n gũnug tãb-biis nins sẽn yaa rĩmã gũudbã nanambsã sẽn gũud rĩmã zak noorã. 11Wakat ning fãa rĩmã sẽn dabd Sẽn-Ka-Saab roogẽ wã, tãb-biisã sẽn gũud rĩmã zãada gãndã n yãagd rĩmã. La b sã n sɛ, b lebgd n tɩ lebsa gãndã tãb-biisã sẽn yaa rĩmã gũudbã roogẽ.
12A Roboaam sẽn sik a mengã yĩnga, Sẽn-Ka-Saab sũ-puugrã siga ne yẽnda, la b ka sãam-b zãng me ye. Bala, bõn-sõama rag n ket n bee Zʋʋda tẽngã pʋga.
A Roboaam kũum
13Rĩm a Roboaam dɩɩ naam Zeruzalɛm, la a naamã paama pãnga. Yẽnda sẽn wa n na n deeg naamã t'a tara yʋʋm pis-naas la a yembre, la yẽnda ma wã yʋʋr dag n yaa a Naama, la a rag n yita Amo tẽnga. A Roboaam rɩɩ naamã yʋʋm piig la yopoe Zeruzalɛm pʋgẽ, tẽng ning Sẽn-Ka-Saab sẽn yãk Israyɛll tẽmsã fãa sʋk n na n ning b yʋʋrã b nebã sʋkã. 14Yẽnda maana sẽn yaa wẽnga, bala, yẽnda ka bao Sẽn-Ka-Saab ne a sũur fãa ye.
15A Roboaam vɩɩmã sɩngr kibar n tɩ tãag a baoosg fãa gʋlsa Wẽnnaam no-rɛɛs a Semaya, ne bãngda a Ido sɛbã pʋsẽ. Zabr zĩnda a Roboaam ne a Zeroboaam sʋk wakat fãa. 16A Roboaam saka a saam-dãmba, la b mum-a-la a Davɩɩd tẽngã pʋga. La a biig a Abiya n led a zĩigẽ n lebg rĩma.
Currently Selected:
2 Kibayã 12: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
