1 Tesalonik‑rãmba 3
3
A Poll tʋʋm Tesalonik
1 #
Tʋʋm 17.15
Tõnd wa n ka leb n tõe n gũ yɛs ye. Dẽ n kɩt tɩ tõnd yãk yam tɩ yaa tõnd bal n na pa Atɛn. 2La tõnd tʋma d ba-biig a Tɩmote sẽn yaa tõnd tʋmd-n-taag Wẽnnaam tʋʋmdã pʋgẽ, n moond Kiris koe-noogã, t'a wa n paas yãmb raoodo, la a sagl yãmb y tẽebã sõngr yĩnga, 3tɩ yel-pakr ning sẽn paamd yãmb moasã wã da wa n vigs ned baa a yembr ye. Bala, yãmb mens miime tɩ nams-kãens yaa tõnd pʋɩɩre. 4Wakat ning tõnd sẽn dag n be ne yãmbã, tõnd pĩnd n yeela yãmb tɩ d na n paama namsgo. La yãmb miime tɩ yaa rẽ n wa wã. 5Dẽ n kɩt tɩ mam sẽn ka leb n tõe n gũ n kaoosã yĩnga, mam tʋma a Tɩmote t'a wa n sok yãmb tẽebã yelle, mam sẽn zoet dabeem tɩ makdã na n mak yãmb tɩ tõnd tʋʋmdã lebg zaalmã yĩnga.
6 #
Tʋʋm 18.5
La moasã, a Tɩmote yii yãmb nengẽ n lebg n wa tõnd nengẽ, la a waa ne yãmb tẽebã la y nonglmã koe-noodo, la koe-nood tɩ yãmb ket n tẽra tõnd yell sõama, la y raab tɩ leb n yãnd tõndo, wa tõnd me sẽn dat n yã yãmbã. 7Woto, m ba-biisi, baa ne tõnd sẽn be sũ-sãang-kãseng la yel-pakr pʋgẽ wã, tõnd paama belsg ne yãmb kibarã, y tẽebã yĩnga. 8Moasã, tõnd vɩɩme, yãmb sẽn paad Zu-soaba pʋgẽ kãenkãe wã yĩnga. 9Tõnd ka tõe n pʋʋs Wẽnnaam bark n sa yãmb yĩnga, sũ-noog ning tõnd sẽn maand Wẽnnaam taoor yãmb yĩngã yĩng ye. 10Yʋng ne wĩndga, tõnd bõosda Wẽnnaam ne d sũyã fãa tɩ d tõe n yãnd yãmb nengã, la d kɩt tɩ y paam bũmb ning sẽn paoog yãmb tẽebẽ wã. 11Bɩ Wẽnnaam meng sẽn yaa tõnd ba wã, la tõnd Zu-soab a Zeezi pak d sorã tɩ d ta yãmb nengẽ. 12Bɩ Wẽnnaam kɩt tɩ yãmb nonglem taab yĩnga, la nebã fãa yĩngã lebg kãseng n puugi, wa nonglem ning tõnd sẽn tar yãmb yĩngã. 13Woto, bɩ Wẽnnaam paas yãmb raoodo, tɩ y ra paam rõdb y sũyã pʋsẽ ye, la y zĩnd sõmblem tõnd ba a Wẽnnaam taoore, daar ning tõnd Zu-soab a Zeezi sẽn na n wa ne nin-sõamyã wã.
Currently Selected:
1 Tesalonik‑rãmba 3: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
