1 Sãmwɛlle 28

1Wakat-kãnga, Filistẽ-dãmbã rag n tigma b tãb-biisã n na n tɩ zab ne Israyɛll nebã. A Akiis yeela a Davɩɩd yaa: «Bãng tɩ foom ne f nebã na n wa tũu mam tãb-biisã n kẽng zabrã zĩigẽ.» 2A Davɩɩd leoka a Akiis yaa: «Beneere! Bee ne yãmb tɩ y ges y sẽn dat tɩ y tʋmtʋmdã maan bũmb ninga.» Dẽ, a Akiis yeela a Davɩɩd t'a ratame t'a Davɩɩd lebg yẽnda mengã gũud wakat fãa.

A Sayull ne kinkir-baga

3 # 1Sãm 25.1 # Mk 20.27, Tõ 18.10,11 A Sãmwɛll dag n kiime, tɩ Israyɛll nebã yãb-a, la b mum-a-la a tẽngẽ wã Rama. A Sayull dag n diga kinkir-bagbã ne bagbã fãa n yiis tẽngã pʋgẽ. 4Filistẽ-dãmbã tilga b tãb-sikã Sunem. La a Sayull tigma Israyɛll nebã fãa, n tilg b tãb-sikã Gilboa. 5A Sayull sẽn yã Filistẽ nebã tãb-sikã, rabeem-kãseng yõk-a lame t'a pɛlengã yɩke. 6#Sõd 27.21A Sayull soka Sẽn-Ka-Saab a sẽn tog n maan bũmb ninga, la Sẽn-Ka-Saab ka leok ne zãmsdo, ne Urim, wall ne bãmb no-rɛɛsdbã koɛɛg ye.

7A Sayull yeela a tʋmtʋmdbã tɩ b wilg-a pag sẽn yaa kinkir-bag zĩiga, t'a kẽng n tɩ gese. Yẽnda tʋmtʋmdbã yeel-a lame tɩ pag a yembr n be Ɛn-Door n yaa kinkir-baga.

8La a Sayull toeema fut n yeelg fut a taaba. La yẽnda ne neb a yiib n tũ taab n kẽnge. Bãmb taa pagã nengẽ ne yʋngo. A Sayull yeela pagã yaa: «M kotame tɩ f bool ned a yembr sẽn ki n kõ-ma. Kɩt tɩ ned ning yʋʋr mam sẽn na n pʋdã puki.» 9Pagã yeelame: «Yãmb mi a Sayull sẽn maan bũmb ningã, yẽnda kʋʋ kinkir-bagbã ne tɩ-rɩtbã fãa tẽngã pʋgẽ. Yaa bõe tɩ yãmb makd maam n na n kɩt tɩ b kʋ-ma?» 10La a Sayull wẽena ne Sẽn-Ka-Saab yʋʋr n yeele: «Mam wẽenda ne Sẽn-Ka-Saab sẽn vɩ wã, tɩ b ka na n ning foom taal yel-kãngã pʋgẽ ye.» 11Pagã sokame tɩ ãnda la b rat t'a bool n kõ-ba? A Sayull leokame t'a bool a Sãmwɛll n kõ-a.

12La pagã sẽn yãnd a Sãmwɛllã, a kelmame n yeel a Sayull yaa: «Yaa bõe tɩ y belg maam? Yaa yãmb la a Sayulli!» 13Rĩmã yeel-a lame «Da zoe rabeem ye. Fo nee bõe?» Pagã leoka a Sayull yaa: «Mam nee wẽnnaam a ye sẽn pukd tẽngã pʋgẽ n watẽ.» 14Dẽ, a Sayull sokame n na n bãng a sẽn wẽnd bũmb ninga. Pagã leokame tɩ yaa nin-kẽem n pukdã, la a pila fuugu. A Sayull bãngame tɩ yaa a Sãmwɛlle, la yẽnda wõgemdame n fõgen a neng tẽnga. 15A Sãmwɛll yeela a Sayull yaa: «Yaa bõe tɩ f nams maam n kɩt tɩ m puki?» A Sayull leokame: «Mam bee sũ-sãan-kãseng pʋga. Bala, Filistẽ-dãmbã zabda ne maam, la Wẽnnaam basa maam. Bãmb ka leok maam ne bãmb no-rɛɛsdbã, wall zãmsd pʋgẽ me ye. Mam boond-y lame tɩ y wilg-m m sẽn tog n maam bũmb ninga.» 16A Sãmwɛll yeel-a lame: «Sã n yaa tɩ Sẽn-Ka-Saab basa foom n lebg f bɛ, yaa bõe tɩ y sokd maam? 17#1Sãm 15.28Sẽn-Ka-Saab maanda foom wa b sẽn dag n kɩt tɩ m yeel foomã. Bãmb deega f naamã n kõ a Davɩɩde. 18#1Sãm 15.3-9Fo sẽn ka kelg Sẽn-Ka-Saab koɛɛgã, la f ka sak n sãam Amalɛk nebã ne bũmb nins fãa b sẽn tarã wa sẽn zems b sũ-puugrã, yaa rẽ n kɩte, tɩ Sẽn-Ka-Saab maan foom woto rũndã. 19Sẽn paase, Sẽn-Ka-Saab na n kɩtame tɩ Filistẽ-dãmbã tõog foom ne Israyɛll nebã. Beoogo, foom ne f kambã na n zĩnda ne maam, la Sẽn-Ka-Saab na n kɩtame tɩ Filistẽ-dãmbã tõog Israyɛll tãb-biisã.»

20Zĩig pʋgẽ bala, a Sayull lʋɩɩ tẽng a woglmã tɛka, la a Sãmwɛll goamã kɩtame tɩ rabeem-kãseng yõk-a. Sẽn paase, yẽnda rag n ka leb n tar pãng ye. Bala, yẽnda ka rɩ rɩɩb badaare, wĩndgã ne yʋngã tõr ye. 21Pagã sẽn kolg a Sayull n yãnd t'a yɛɛsa wʋsgã, a yeel-a lame: «Gese, mam sẽn yaa yãmb tʋmtʋmd-poakã gẽnega m yõor n maan bũmb ning yãmb sẽn yeel maam tɩ m maanã. 22Moasã, m kotame tɩ yãmb me kelg y tʋmtʋmd-poakã koɛɛga. Bas-y tɩ m wa ne rɩɩb bilf tɩ y rɩ n paam pãng sorã zugu.» 23A Sayull zãgsame n yeel t'a kõn dɩ ye. La a tʋmtʋmdbã ne pagã pẽdg-a lame t'a yaool n sak n dɩ. La yẽnda tik n yikame, n zaoond gãagã zugu. 24Pagã rag n tara nag-bi-wubdg a yãgrẽ wã. Yẽnda kẽnga tao-tao n yõk nag-bilã n kʋ n segle, la a yãk zom n nag n maan bur sẽn ka ning rã-bɩlle. 25Pagã rɩka rɩɩbã n wa rɩgl a Sayull ne a tʋmtʋmdbã, la bãmb dɩɩme, la b yik yʋn-kãng bal n looge.

Currently Selected:

1 Sãmwɛlle 28: MPBU

Highlight

Copy

Compare