1 Sãmwɛlle 27

A Davɩɩd tɩ soonda Filistẽ-dãmbã tẽngẽ

1A Davɩɩd tagsame t'a sã n ka zoe n kẽng Filistẽ-dãmbã tẽngẽ, a Sayull na n wa baas n paam-a lame n kʋ. Yẽnda tagsame t'a sã n maan a woto, a Sayull na n wa basa yẽnda baoob Israyɛll tẽngã pʋgẽ t'a paam n põse. 2Dẽ, a Davɩɩd ne neb kobs-yoob nins sẽn dag n be ne yẽnda wã yikame n kẽng a Maook biig a Akiis sẽn yaa Gat rĩmã nengẽ. 3A Davɩɩd ne a nebã zĩnda a Akiis nengẽ Gate, ned kam fãa ne a zak rãmba, a Davɩɩd me ne a pagb a yiibã: a Akinoam sẽn yaa Zizreyɛll tẽng biigã, ne Karmell tẽng biig a Abigayɩll sẽn dag n yaa a Naball pagã. 4Nebã togsa a Sayull t'a Davɩɩd zoe n kẽnga Gat tẽnga, la a Sayull basame n ka leb n bao-a ye.

5A Davɩɩd yeela a Akiis yaa: «Yãmb sã n nonga maam, m kot-y lame tɩ y bao zĩig sẽn be tẽngã kɩreng n kõ maam tɩ m zĩndi, la m da zĩnd ne yãmb na-tẽngã pʋg ye.» 6Dẽ, badaar bala, a Akiis rɩka Siklaag tẽngã n kõ a Davɩɩde. Yaa woto n kɩt tɩ Zʋʋda rĩm-dãmbã so Siklaag hal tɩ ta rũndã. 7A Davɩɩd sẽn zĩnd Filistẽ-dãmbã tẽngẽ wã yɩɩ yʋʋmde, la kiis a naase.

8A Davɩɩd ne a nebã rag n kẽnd n zabda ne Gesʋʋr nebã, Girsi nebã, ne Amalɛk nebã. Bala, yaa bu-kãens n dag n sɩng n be Sʋʋr hal n tɩ tãag Ezɩpte. 9A Davɩɩd dag n zabd n tõogda tẽngã nebã, n kʋʋd b pagbã ne b raopã zãnga, la a wʋkd rũm-bãoongã ne rũm-bɛdã, la bõensã ne yʋgma wã, la futã n talld n kẽnd a Akiis nengẽ. 10A Akiis sã n sok a Davɩɩd b sẽn tɩ zab tẽng ningã, a Davɩɩd leokdame tɩ yaa Zʋʋda tẽngã nug goabga, bɩ Zerakmeyɛll tẽngã nug goabga, wall Kɛn nebã tẽng nug goabga. 11A Davɩɩd kʋʋda pagbã ne raopã fãa, n ka basd nin-vɩɩg ba a ye meng n tall n wa Gat ye. Yẽnda rag n yɛɛsdame tɩ b na n wa tɩ togs bũmb nins yẽnda sẽn maandã. A Davɩɩd sẽn zĩnd Filistẽ-dãmbã tẽngẽ wã tɛka, yaa woto la a rag n maanda. 12A Akiis rag n kɩsa sɩd ne a Davɩɩde, n tagsdẽ t'a baoo beem ne Israyɛll nebã sẽn yaa a meng nebã, n na n lebg yẽnda tʋmtʋmd wakat fãa yĩnga.

Currently Selected:

1 Sãmwɛlle 27: MPBU

Highlight

Copy

Compare