1 Sãmwɛlle 17

Filistẽ-dãmbã ne Israyɛll nebã zabre

1Filistẽ-dãmbã tigma b tãb-biisã n na n kẽng zabre. Bãmb tigma taab Soko sẽn be Zʋʋda soolmẽ wã, la b tilga b tãb-sik Efɛɛz-Damim sẽn be Soko ne Azeka sʋkã. 2La a Sayull ne Israyɛll nebã me tigmame. Bãmb tilga b tãb-sikã Terebẽnt tɩɩsã longẽ wã, n na n zab ne Filistẽ-dãmbã. 3Filistẽ-dãmbã rag n bee tãng a yembr zugu, tɩ Israyɛll nebã rag n be tãng a to zugu, la long n dag n be bãmb sʋka.

4Gãndaoog a yembr n yi Filistẽ-dãmbã sʋka, n kolg Israyɛll nebã. Yẽnda yʋʋr yaa a Golyate, n yit Gat soolem, t'a woglem dag n tat kãntɩɩg a yoobe, la nug-yakemde. 5Yẽnda rag n fõgna zũud pugla, n yeelg fuug sẽn maan ne zũudu, t'a zɩslmã tat kɩlo pis-yoobe. 6Yẽnda karsã rag n luda ne zũudu, la a rag n boba zũud kãn-dibga. 7La yẽnda kãndã raoog taglem rag n taa koeer bõanga, la a kãn-bilã zɩslem rag n yɩɩda kɩlo a yopoe. Ned n dag n be yẽnda taoor n zãad gãn-bedrã. 8Yẽnda yalsame, n zẽk a koɛɛg n gom ne Israyɛll nebã n yeel yaa: «Yaa bõe tɩ yãmb sũ tãpo? Ka maam la Filistẽ daoã tɩ yãmb yaa a Sayull yembsã la? Yãk-y ned a ye t'a wa zab ne maam. 9Yẽnda sã n zab ne maam n tõog n kʋ maam, tõnd na n yɩɩ yãmb yembse. La mam sã n tõog-a, mam sã n zab ne-a n tõoge, yãmb na n yɩɩ tõnd yembse.» 10Filistẽ daoã leb n yeelame: «Israyɛll nebã, yãmb sã n yaa raopa, bɩ y yãk ned a ye rũndã t'a wa tɩ d zab ne taaba.» 11A Sayull ne Israyɛll nebã fãa sẽn wʋm Filistẽ daoã goamã, bãmb pɛlengã yɩkame tɩ rabeem-kãseng kẽ-ba.

B tʋma a Davɩɩd a kẽem-dãmbã nengẽ

12A Davɩɩd dag n yaa Efrat ned a Izayi sẽn be Zʋʋda Betlehɛmã biiga. A Izayi rag n tara kom-dibli a nii, la a Sayull wakatẽ wã, a Izayi rag n kʋʋla wʋsgo. 13A Izayi kom-dibl-kãsems a tãabã rag n tũ a Sayull n kẽng zabrã zĩigẽ. Yẽnda kom-dibli a tãabã sẽn kẽng zabrã zĩigẽ wã yʋy la woto: bi-kãsengã yaa a Eliyaabe, tɩ yiibẽ soabã yaa a Abinadaabe, tɩ tãabẽ soabã yaa a Sama. 14A Davɩɩd n dag n yaa yao-zʋʋga. Yẽnda kẽem-dãmb a tãabã rag n tũ a Sayulli. 15Dẽ, a Davɩɩd dag n kẽnda a Sayull nengẽ, la a lebgd n wat Betlehɛm n gũud a ba wã piisi.

16Yibeoog ne zaabr fãa, Filistẽ daoã rag n yit n kolga Israyɛll nebã n yasẽ. Yẽnda maana a woto rasem pis-naase. 17A Izayi yeela a biig a Davɩɩd yaa: «M kotame tɩ f rɩk ka-sẽedmã ne peoogã, la bur piigã n zoe n kẽng tãb-sikẽ wã n tɩ kõ f kẽem-dãmbã, 18la f tall formaaz-gil piiga, n tɩ kõ b tãb-biis tusr naabã, la f ges f kẽem-dãmbã n bãng b keelem, la f lebg n wa ne b nug bũmb sẽn wilgd tɩ b tara laafɩ.»

19A Davɩɩd kẽem-dãmbã rag n bee ne a Sayull ne Israyɛll nebã Terebẽnt tɩɩsã longẽ wã n zabd ne Filistẽ-dãmbã.

20Dẽ, a Davɩɩd sãda yibeoog pĩnda, n bas a piisã ne ned a to la a rɩk rɩɩbã n kẽnge, wa a ba wã sẽn yeel-a wã. Yẽnda sẽn wa n ta tãb-sikẽ wã tɩ Israyɛll nebã yiime n kaasd n dabd zabrã zĩigẽ. 21Israyɛll nebã ne Filistẽ-dãmbã yiime, n teedg n tees taab n na n zabe. 22A Davɩɩd sika a rɩɩbã n bas ne ned ning sẽn gũud teedã, la a wudg n kẽng zabrã zĩigẽ. A sẽn ta beenẽ, a pʋʋsa a kẽem-dãmbã n sok b keelem. 23Yẽnda sẽn wa n gomd ne bãmbã wakate, Filistẽ gãndaoogã sẽn yaa Gat tẽng rao t'a yʋʋr boondẽ t'a Golyatã leb n yii Filistẽ-dãmbã sʋka, n gom goam nins a sẽn mi n gomd daar fãa wã, la a Davɩɩd wʋmame. 24Israyɛll nebã fãa sẽn yã Filistẽ-dãmbã raoã, bãmb zoeeme n leb poorẽ, bala, rabeem-kãseng n kẽ-ba. 25Israyɛll nebã rag n yetame: Yãmb nee rao-kãngã sẽn watã? Yẽnda wat n na n baoo Israyɛll nebã noore. Ned ning sẽn na n tõog-a n kʋ rao-kãngã, rĩmã na n kõ a soab arzegs wʋsgo, la a rɩk a bi-pugl n kõ-a t'a maan a paga, la b kɩt t'a ba wã ra leb n yao yõor yaood ye.

A Davɩɩd zaba ne a Golyate

26A Davɩɩd soka neb nins sẽn dag n pẽ yẽnda wã yaa: «Ned sã n tõog n kʋ Filistẽ dao-kãngã n dok Israyɛll nebã yãndã, b na n kõ a soab bõe? Filistẽ nin-kãngã yaa ãnda, n paoogd Wẽnnaam sẽn vɩ tãb-biisã? Ned sẽn ka kẽ bãongo!»#17.26 Ned sẽn ka kẽ bãongo: Tɩ ges-y bilgrã sẽn be 1Sãm 14.6. 27Nebã leb n dɩka a Sayull sẽn yeelã, n togs a Davɩɩd bũmb nins b sẽn na n kõ a soab ning sẽn na n kʋ Filistẽ daoã.

28A Davɩɩd kẽem a Eliyaab sẽn wʋm goam nins a Davɩɩd sẽn dag n gomd ne nebã, a sũurã yika ne a Davɩɩd t'a yeele: «Fo waa ka n na n maan bõe? Fo basa piisã ne ãnda we-raoogẽ wã? Mam mii fo wilg-m-mengã ne f yam-yoodã yelle. Yaa zabrã la fo wa n na n gese.» 29A Davɩɩd yeelame: «Mam maana bõe bala? M yaa n ka tõe n sok n bãng bũmbu?» 30La a Davɩɩd wẽnemdame n sok ned a to sok-kãense. La b leoka yẽnda wa pĩnd soabã bala.

31Neb nins sẽn wʋm a Davɩɩd goamã kẽng n tɩ togsa a Sayulli, la a Sayull yeelame tɩ b tɩ bool-a t'a wa. 32A Davɩɩd yeela a Sayull yaa: «Bɩ ned ba a yembr sũur da sãam Filistẽ nin-kãngã yĩng ye. Mam sẽn yaa yãmb tʋmtʋmdã na n kẽngame n tɩ zab ne-a.» 33La a Sayull yeela a Davɩɩd yaa: «Fo ka tõe n tɩ zab ne nin-kãngã ye. Bala, fo yaa biiga, la yẽnda yaa rao sẽn zãms zabr hal a yãadem wakate.» 34A Davɩɩd yeela a Sayull yaa: «Mam sẽn gũud m ba wã piisã, gɩgemd bɩ rigd-n-yĩidg sã n wa yõk rũnga, 35mam digd-a lame n pãb n deeg rũngã a noorẽ wã. La a sã n dat n zab ne maam, mam gãta a lɛlmã n pãb-a n kʋ. 36Yaa woto la mam maan n kʋ gɩgmã ne kata. La a na n yɩɩ woto me ne Filistẽ nin-kãngã sẽn ka kẽ bãongã, bala, yẽnda paooga Wẽnnaam sẽn vɩ wã tãb-biisi!» 37A Davɩɩd leb n yeelame yaa: «Wẽnnaam ning sẽn fãag-a maam ne gɩgmã wã la rigd-n-yĩidsã na n fãaga maam ne Filistẽ nin-kãngã me.» Dẽ, a Sayull yeela a Davɩɩd yaa: «Bɩ f kẽnge, la bɩ Sẽn-Ka-Saab zĩnd ne foom!»

38A Sayull yeesa a zab-teedã n yeelg a Davɩɩde. Yẽnda fõgna a Davɩɩd zũud pugla, la a loe-a ne kut gãntika. 39Yẽnda rɩka a Sayull zabr sʋʋgã n sẽbg a sɛɛga. La a Davɩɩd makame n na n kẽne, la a ka tõog ye, a sẽn ka minimã yĩnga. Dẽ, a yeela a Sayull yaa: «Mam ka tõe n tall te-kãensã fãa n kẽn ye. Bala, mam ka minim ye.» Woto, yẽnda yees-b lame n dʋʋge, 40la a rɩk a rasaare, n kẽng ko-soogẽ wã n tɩ wʋk kug-saal a nu, n sui a rũm-kɩɩm-korgẽ wã. La yẽnda rag n zãada a loaabgã n kolgd Filistẽ daoã.

41Filistẽ daoã kɩtame tɩ ned lʋɩ a taoor n zãad a gãntikã, t'a kolgd a Davɩɩd bilf-bilfu. 42Filistẽ daoã sẽn yã a Davɩɩdã, a ka nan-a ye. A gesame t'a Davɩɩd yaa moeeg sẽn tar ra-sãnd bala. 43La Filistẽ daoã yeela a Davɩɩd yaa: «Mam yaa baag la, tɩ fo wat n na n zab ne maam ne rasaba?» Yẽnda kãaba a Davɩɩd ne Filistẽ-dãmbã wẽnnaam-dãmb yʋʋre. 44Filistẽ daoã yeela a Davɩɩd yaa: «Wa tɩ m na n kʋ-f lame, n kõ yĩngr bõn-yɩgdɩ ne we-rũms tɩ b rɩ.» 45A Davɩɩd yeela Filistẽ daoã yaa: «Fo segda maam ne zabr sʋʋga, la ne kãnd ne kãn-dibga, la maam, mam segda foom ne Saasẽ-Pãng-Soabã sẽn yaa Israyɛll tãb-biisã Wẽnnaamã fo sẽn paoogdã yʋʋre. 46Rũndã, Sẽn-Ka-Saab na n kɩtame tɩ m tõog-fo. Mam na n kʋ-f lame n fiuug f zugã. La mam na n kʋʋ Filistẽ tãb-biisã b tãb-sikẽ wã, n kõ yĩngr bõn-yɩgdɩ ne we-rũms tɩ b rɩ. Woto, dũniyã neb fãa na n bãngame tɩ Israyɛll tara Wẽnnaam. 47La neb nins fãa sẽn be kaanẽ wã na n bãngame tɩ ka ne sʋʋg wall kãnd la Sẽn-Ka-Saab fãagd b nebã ye. Bala, yaa Sẽn-Ka-Saab n so zabrã, la yaa bãmb n kɩt tɩ d na n tõog yãmba.»

48Filistẽ daoã sẽn leb n kẽnd n kolgd a Davɩɩde, a Davɩɩd wudga tao-tao n seg yẽnda n na n zab ne-a. 49A Davɩɩd tʋma a nug a korgã pʋgẽ, n yãk kugr n ning a loaabgẽ wã n lobg-a, tɩ kugrã yõg Filistẽ daoã rĩiri, n võd n kẽ pʋgẽ t'a lʋɩ a yão-vãbga.

50 # 2Sãm 21.19 Woto, yɩɩ ne loaabg la kugri, la a Davɩɩd tõog Filistẽ daoã. Yẽnda kʋ-a lame tɩ ka tũ ne zabr sʋʋg ye. 51#2Sãm 21.19A Davɩɩd wudgame n tɩ yals Filistẽ daoã zugẽ, n wõog raoã sʋʋg n kʋ-a n baase, la a fiuug a zugã. Filistẽ-dãmbã sẽn yã tɩ b gãndaoogã kiime wã, b zoeeme. 52Dẽ, Israyɛll nebã ne Zʋʋda nebã kaasame, la b rig Filistẽ-dãmbã hal n tɩ tãag longẽ wã, ne Ekrõ tẽngã noyã. Filistẽ-dãmbã kũum yɛdga Sarayim sorã zug hal n tãag Gat ne Ekrõ. 53Israyɛll nebã riga Filistẽ-dãmbã ne sũuri, la b lebg n kẽng Filistẽ-dãmbã tãb-sikẽ n wʋk b teedã. 54A Davɩɩd talla Filistẽ daoã zug n kẽng Zeruzalɛm, la yẽnda bĩnga raoã zab-teed a fu-roogẽ wã.

55A Sayull sẽn wa n yãnd t'a Davɩɩd rabd n na n tɩ zab ne Filistẽ daoã, yẽnda soka a tãb-biis naab a Abneer yaa: «Abneere, bi-bɩ-kãngã yaa ãnda biiga?» La a Abneer leokame: «N-na, m wẽendame tɩ m ka mi ye.» 56La rĩmã yeela a Abneer t'a sok n bãng a sẽn yaa ned ning biiga. 57Dẽ, a Davɩɩd sẽn kʋ Filistẽ gãndaoogã n lebg n watẽ, a Abneer tall-a lame n kẽng a Sayull nengẽ. A Davɩɩd dag n zãada Filistẽ daoã zugu. 58A Sayull sok-a lame yaa: «M biig sõngo, fo yaa ãnda biiga?» La a Davɩɩd leokame: «Mam yaa Betlehɛm tẽng rao a Izayi sẽn yaa yãmb tʋmtʋmdã biiga.»

Currently Selected:

1 Sãmwɛlle 17: MPBU

Highlight

Copy

Compare