1 Zã 5
5
Tẽeb ne tõogr dũniyã zugu
1Ned ning fãa sẽn tẽed t'a Zeezi yaa Kirisã, yaa Wẽnnaam n dog yẽnda soaba. La ned ning fãa sẽn nong soab ning sẽn dog-a bãmbã, nonga bãmb sẽn dog a soabã me. 2Ad bũmb ning sẽn kɩtd tɩ tõnd bãng tɩ d nonga Wẽnnaam kambã: Yaa tõnd sẽn na n nong Wẽnnaam la d sakd bãmb tõodã. 3#Zã 14.15Bala, tɩ nong Wẽnnaam yaa tɩ sak bãmb tõodã. La bãmb tõodã ka toog ye. 4Bala, Wẽnnaam sẽn dog a soab fãa tõogda dũniyã. Ad tõogr ning sẽn tõogd dũni wã: yaa tõnd tẽebã. 5Ãnda n tõogd dũni wã, sã n ka ned ning sẽn tẽed t'a Zeezi yaa Wẽnnaam Bi-riblã.
Sɩɩg-sõng kaseto
6Yaa a Zeezi Kiris n wa ne koom, la zɩɩm, la ka ne koom bal ye, la yaa ne koom la zɩɩm, la yaa Sɩɩg-sõng n kɩt kaseto, Sɩɩg-sõng sẽn yaa sɩd soabã yĩnga. 7Bala, yaa neb a tãab n kɩt kaset [arzãn pʋga: Yaa ba wã, la gomdã, la Sɩɩg-sõngo. La bãmb b tãabã yaa yembre. 8La bũmb a tãab n be n kɩt kaset tẽng zugu:] Yaa Sɩɩg-sõngo, la koom, ne zɩɩm. La bãmb b tãabã kaset zemsda taaba. 9Tõnd sã n deegd ninsaalb kaseto, Wẽnnaam kaset n ya kãseng n yɩɩda. Bala, ad Wẽnnaam kaseto: Yaa tɩ Wẽnnaam kɩta b Bi-riblã kaseto. 10Ned ning sẽn tẽed Wẽnnaam Bi-riblã tara kaset kãngã a meng pʋgẽ. Ned ning sẽn ka tẽed Wẽnnaam, a maanda bãmb tɩ b yɩ wa zĩrẽ yagda yẽnda sẽn ka tẽed kaset ning Wẽnnaam sẽn kɩs b Bi-riblã wɛɛngẽ wã yĩnga. 11#Zã 3.36Kaset‑kãng la woto: Wẽnnaam kõo tõnd vɩɩm sẽn kõn sa, la vɩ-kãng bee b Bi-riblã pʋgẽ. 12Ned ning sẽn tar-a Bi-riblã tara vɩɩmã, la ned ning sẽn ka tar-a Wẽnnaam Bi-riblã ka tar vɩɩmã ye.
Vɩɩm sẽn kõn sa bãngre
13Mam gʋlsa yãmb bõn-kãngã, sẽn na yɩl tɩ yãmb bãng tɩ yãmb sẽn tẽed Wẽnnaam Bi-riblã yʋʋrã, yãmb tara vɩɩm sẽn kõn sa. 14Ad pɛl-kɛgeng ning tõnd sẽn tar bãmb taoorã: Tõnd sã n kos bũmb sẽn zems ne bãmb daabo, b kelgda tõndo. 15La tõnd sã n miẽ tɩ b kelgda tõndo, sẽn yaa bũmb ning la tõnd kos-yã, tõnd miime tɩ d paama bũmb ning tõnd sẽn kos bãmbã.
16Ned sã n yãnd a ba-biig sẽn maan yel-wẽnd sẽn ka wat ne kũum, bɩ a pʋʋse, la Wẽnnaam na kõ-a vɩɩm. Yaa neb nins sẽn maand-b yel-wẽn sẽn ka wat ne kũumã yĩnga la y tog n pʋʋse. Yel-wẽnd n be n wat ne kũum, ka yel-wẽn‑kãng yĩng la mam sẽn yet tɩ y pʋʋsã ye. 17Tʋʋm-wẽng fãa yaa yel-wẽnde, la yel-wẽn n be n ka wat ne kũum ye. 18Tõnd miime tɩ Wẽnnaam sẽn dog ned ning fãa ka maand yel-wẽn ye, la Wẽnnaam Bi-riblã gũuda yẽnda, la wẽng soabã ka sɩɩsd yẽnda ye. 19Tõnd miime tɩ d yaa Wẽnnaam dẽnda, la dũniyã zãng bee wẽng soabã nugẽ. 20Tõnd miime me tɩ Wẽnnaam Bi-riblã waame, la b kõo tõnd bãngr tɩ d bãng soab ning sẽn yaa sɩdã. La tõnd bee sẽn yaa-a sɩdã pʋgẽ, b Bi-ribl a Zeezi Kiris maasem yĩnga. Yaa bãmb la Wẽnnaam sɩd-sɩda la vɩɩm sẽn kõn sa. 21Mam kom-bãoonego, lak-y y mens ne wẽn-naandsã.
Currently Selected:
1 Zã 5: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
