1 Korẽnt‑rãmbã 4
4
Tẽn-tʋmdbã tʋʋmde
1Woto yĩnga, ges-y tõnd wa Kiris tʋmtʋmdba, Wẽnnaam sẽn ning b yel-soalmã#4.1 Yel-soalma: Yaa tẽebã yɛl sẽn solg ned sẽn dag n ka tõe n wʋm a võor ye. yell b nusẽ. 2B sẽn dat bũmb ning yel-gɛtb nengẽ bala, yaa tɩ b yãnd tɩ b maanda sɩd ne b tʋʋmde. 3Ne maam, ka yell ne maam tɩ yãmba, wall dũni bʋ-kaoodb bʋ mam bʋʋd ye. Mam me ka kaood n meng bʋʋd ye. Bala, bũmb ka zɩsg mam sũurã ye. 4La ka rẽnda yĩng la mam zemsr ye. Sẽn kaood-a mam bʋʋd yaa Zu-soabã. 5Woto yĩnga, da kao-y bũmb baa fɩ bʋʋd tɩ wakatã nan ka ta ye, tɩ Zu-soabã waoong nan ka ta ye. Bãmb sã n wa, b na n puka bũmb ning sẽn solg lik pʋgẽ wã, la b na n kɩtame tɩ bũmb nins nebã sẽn dag n saag b sũyã pʋsẽ wã pugsi. Wakat-kãnga, Wẽnnaam n na n pẽg ned kam fãa.
6M ba-biisi, mam dɩka mams‑kãens n bilg maam ne a Apoloos yellã, yãmb wʋmb yĩnga. Woto, tõnd yĩnga, yãmb na zãms n bãnge, n da wa n maan tɩ yõsg bũmb ning sẽn gʋlsã ye, la yãmb ned baa a yembr ka na n tong ned a yembr poore, n wa waoog a menga, n paoog ned a to wã ye. 7Bala, bõe n welgd foom ne f taabã? Bõe la fo tar tɩ ka ned n kõ foom? La sã n yaa tɩ yaa ned n kõ foom, bõe tɩ f waoogd f meng wa f ka reeg-a ned nengẽ?
8Yãmb zoee n tɩgame, yãmb zoee n yaa arzegs rãmba, yãmb sɩngame n dɩt naam tɩ tõnd kaẽ ye. Wẽnd na kɩt tɩ y sɩd rɩ naam, tɩ tõnd me tõe n naag yãmb n dɩ naamã. 9Bala, mam tẽedame tɩ Wẽnnaam kɩtame tɩ tõnd sẽn ya tʋmtʋmdba yɩ nebã fãa zʋʋre, la neb bʋʋd sẽn kao tɩ b zems kũum, b sẽn kɩt tɩ tõnd lebg bõn-gets dũni rãmb yĩnga, la malegs yĩnga, la ninsaalb yĩngã yĩnga. 10Kiris yĩnga, tõnd yaa yalemba, la yãmb yaa yam dãmb Kiris pʋgẽ, tõnd yaa pãn-komsem dãmba, la yãmb tara pãnga. Yãmb bee waoogre, la tõnd paamda paoogre. 11Hal tɩ ta moasã, kom la ko-yũudu, la naongo, la pãbre, la yeebg tara tõndo. 12#Tʋʋm 18.3Tõnd tʋmda ne d nus n yaadẽ. Nebã tʋʋda tõndo, la tõnd ningd-b‑la barka. Neb namsda tõndo, la tõnd sakda rẽnda. 13Hal tɩ ta moasã neb kãnegda tõndo, la tõnd belsda nebã. Tõnd lebga wa sagd dũni neb nifẽ, ned baa a yembr sẽn ka rata.
14Mam ka gʋlsd yãmb yõwã n na n ning yãmb yãnd ye. Mam keoogda yãmba, yãmb sẽn yaa m kom-nongdsã yĩnga. 15Sɩd me, ba yãmb sã n paam tɛtb tus piig Kiris pʋgẽ, yãmb ka tar ba-rãmb wʋsg ye. Bala, yaa maam n dog yãmb a Zeezi Kiris pʋgẽ, koe-noogã maasem yĩnga. 16#1Kor 11.1, Fili 3.17Woto yĩnga, mam sagenda yãmba: Yɩ-y mam togs-n-taase. 17Bõn-kãng yĩnga, mam tʋma m bi-nongr a Tɩmote sẽn maand sɩd Zu-soabã pʋgẽ wã yãmb nengẽ. Yẽnda na n tẽega yãmb so-tũuds nins sẽn be Kiris pʋgẽ tɩ mam zãmsd nebã, zĩig fãa, wẽnd dotã fãa pʋsã.
18Neb kẽer wuka b mense, wa mam sã n da ka tog n wa yãmb nengẽ ye. 19La sã n taa Zu-soabã raabo, bilf sã n paase, mam na n waa yãmb nengẽ. Mam na n gesa wuk-m-mens rãmb kãens pãnga, la ka b goamã yell ye. 20Bala, Wẽnnaam soolma ka goam ye, la yaa pãnga. 21Bõe la y rata? Y ratame tɩ m wa y nengẽ ne sãbsg bɩ, bɩ ne nonglem la ne sũ-bʋgsem yam?
Currently Selected:
1 Korẽnt‑rãmbã 4: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
