1 Korẽnt‑rãmbã 14
14
Sɩɩg sõng kũunã sẽn tog n tʋm to-to tẽedb sʋka
1Bao-y nonglem. Dat-y Sɩɩg-sõng kũunã me, la sẽn yɩɩd fãa, bɩ y dat pĩnd-n-bãngr goamã.
2Sɩd me, sẽn gomd-a ne gom-zẽn ka gomd ne ninsaalb ye, a gomda ne Wẽnnaam. Bala, ned baa a yembr ka wʋmd a võor ye, la Sɩɩgã kɩtame t'a togsd yel-soalma. 3La sẽn togsd-a pĩnd-n-bãngr goam gomda ne ninsaalbã, n bɩɩsd-ba, n sagend-ba, n belsd-ba. 4Sẽn gomd-a gom-zẽn bɩɩsda a menga. Sẽn togsd-a pĩnd-n-bãngr goamã bɩɩsda wẽnd doogã.
5Mam datame tɩ yãmb ned kam fãa gom gom-zẽna, la mam sẽn dat n yɩɩda, yaa tɩ yãmb togs pĩnd-n-bãngr goamã. Sẽn togsd-a pĩnd-n-bãngr goam yɩɩda sẽn gomd-a gom-zẽnã, sã n ka t'a soab rees-a lame tɩ wẽnd doogã tõe n paam bɩɩsg a pʋgẽ. 6M ba-biisi, mam sã n wa yãmb nengẽ, n tõdg a wa ne vẽnegr gomde, wall bãngr gomde, wall pĩnd-n-bãngr gomde, wall zãmsgo, n gomd ne gom-zẽna, a yõod yaa bõe ne yãmba?
7Wa b sẽn na n peeb wall b wẽ teed sẽn ka tar vɩɩm, wa wɩɩg wall pɛndga, tɩ ka tũud sõama, ned na n yɩɩ a wãn n bãng yɩɩl ning wɩɩgã sẽn peebdã, wall pɛndgã sẽn wẽedã? 8Baorg sã n peebd tɩ ka vẽenega, ãnda n na n segl a meng zabr yĩnga? 9Woto me, yãmb sã n gomd goam neb sẽn ka wʋmd a võore, nebã na n yɩɩ a wãn n bãng yãmb sẽn dat n togs bũmb ningã?
10Baa dũni pʋgẽ goam buudã sẽn yaa wʋsgã, baa a yembr ka be n yaa sɩɩ tɩ ned ka wʋmdẽ ye. 11Woto, gomd sã n gomd tɩ mam ka wʋmd a võore, mam yaa nin-zẽng sẽn gomd-a wã yĩnga, la sẽn gomd-a wã me na n yɩɩ nin-zẽng mam yĩnga. 12Woto yĩnga, yãmb sẽn dat Sɩɩg-sõng kũunã, bɩ y kɩt tɩ yaa wẽnd doogã bɩɩsg yĩng la yãmb baood-b wʋsgo.
13Yaa woto yĩng tɩ ned ning sẽn gomd gom-zẽn tog n pʋʋs n tõog n deesdẽ. 14Bala, mam sã n gomd gom-zẽna, mam sɩɩgã yẽ pʋʋsdame, la mam yamã ka maand baa fɩ. 15Woto wã, m na n maana bõe? Mam sɩɩgã na n pʋʋsdame, la mam yamã me na n pʋʋsdame. Mam sɩɩgã na n yɩɩndame, la mam yamã me na n yɩɩndame. 16Fo sã n pʋʋsd Wẽnnaam bark ne f sɩɩgã, ned ning sẽn zĩ ne nebã n kelgdẽ wã na n maana a wãn n leok tɩ ãmina fo bark pʋʋsgã yĩnga, a sẽn ka wʋmd bũmb ning fo sẽn yetã? 17Yaa sɩd tɩ yãmb pʋʋsda Wẽnnaam bark sõama, la ned a to wã ka paamd bɩɩsg a pʋgẽ ye. 18Mam pʋʋsda Wẽnnaam barka, mam sẽn gomd gom-zẽn n yɩɩd yãmb fãa wã yĩnga. 19La wẽnd doogẽ wã, mam nong n goma goam a nu ne m yamã, tɩ b tõe n kõ neb a taabã zãmsgo, n yɩɩd tɩ gom goam tus-piig ne gom-zẽna.
20Sã n yaa ne tagsg wɛɛngẽ, bɩ y da yɩ wa kamb ye. Yɩ-y wa kamb wẽng maaneg wɛɛngẽ, la wa raop sẽn bɩ, tagsgã wɛɛngẽ. 21#Eza 28.11,12B gʋlsa tõodã sebr pʋgẽ n yeele:
Zu-soabã yeelame tɩ yaa ne buud a to nebã,
la ne sãamb noy la mam na n gom ne nin-kãensã.
La baa ne rẽnda, b ka na n kelg maam ye.
22Woto yĩnga, gom-zẽnã yaa bãnd neb nins sẽn ka tẽedã yĩnga, la ka Kiris tẽedbã yĩng ye. La pĩnd-n-bãngr goamã yaa bãnd Kiris tẽedbã yĩnga, la ka sẽn ka Kiris tẽedbã yĩng ye. 23Woto, wẽnd doogã neb fãa sã n tigim taaba, tɩ nebã fãa gomd gom-zẽna, tɩ neb wa bal n na n kelge, wall sẽn ka tẽedb sã n wa, b kõn yeel tɩ yãmb yaa gãeems sɩda? 24La nebã fãa sã n togsd pĩnd-n-bãngr goamã, tɩ ned sẽn ka tẽeda, wall kɛlgd bal wa, nebã fãa goamã kẽed-a lame, b fãa bʋʋda yẽnda bʋʋdo, 25b pukda bũmb nins sẽn solg a sũurẽ. Wakat-kãnga, a na n wõgemda Wẽnnaam taoor n waoog bãmba, la a na n mooname n yeel tɩ Wẽnnaam sɩd bee yãmb sʋka.
26Woto wã, m ba-biisi, d na n maana a wãna? Yãmb sã n tigim taaba, ned sã n tar yɩɩlle, wall saglgo, wall vẽnegre, wall gom-zẽnga, wall gom-zẽn deesgo, bɩ ned fãa maan a tʋʋmd nebã bɩɩsg yĩnga. 27Sã n yaa gom-zẽn goamã, bɩ neb a yiib wall a tãab bal gome, yembr yembre, tɩ ned reesdẽ. 28La ned sã n ka be n deesdẽ, bɩ ned fãa sĩnd wẽnd doogẽ, n gom a pʋgẽ la a gomd ne Wẽnnaam. 29Ne neb nins sẽn togsd pĩnd-n-bãngr goamã, bɩ neb a yiib wall a tãab gome, tɩ neb a taabã bʋ b goamã n gese. 30Ned sẽn be beenẽ sã n paam vẽnegre, bɩ sẽn da gomd-a wã sĩndi. 31Bala, yãmb fãa tõe n togsda pĩnd-n-bãngr goam n deesd taaba, tɩ nebã fãa na paam zãmsgo, la tɩ nebã fãa na paam saglgo. 32Wẽnnaam no-rɛɛsdbã sɩɩs sakd-b lame. 33Bala, Wẽnnaam ka bʋrg Wẽnnaam ye, b yaa laafɩ Wẽnnaam.
Wa sẽn maand Wẽnnaam nin-sõamyã wã wẽnd dotẽ wã, 34bɩ pagbã sĩnd b noy tigindã pʋse, bala, b ka tar noor tɩ gom be ye. Bɩ b yɩ sakdba, wa Wẽnnaam tõogã me sẽn yetã. 35B sã n dat n sok bũmb kẽer võor n bãnge, bɩ b tɩ sogs b mens sɩdbã yiri. Bala, a yaa bũmb sẽn ka zems tɩ pag gom wẽnd doogẽ ye. 36Wẽnnaam goamã yii yãmb nengẽ bɩ, bɩ yaa yãmb nengẽ bal la a ta yã?
37Ned sã n tẽed t'a yaa Wẽnnaam no-rɛɛsa, wall tɩ Wẽnnaam ninga gomd a noorẽ, bɩ a bãng tɩ bũmb ning mam sẽn gʋls n togs yãmbã yaa Zu-soabã tõogo. 38La ned sã n zɩ yel-kãnga, bɩ nebã me ra bãng a soab ye.
39Woto yĩnga, m ba-biisi, bɩ ned fãa dat pĩnd-n-bãngr goam kũuni, la y da gɩdg neb tɩ b da gom gom-zẽn ye. 40La bɩ y maan bũmb fãa tɩ zemse, la tũud taab sõama.
Currently Selected:
1 Korẽnt‑rãmbã 14: MPBU
Highlight
Copy
Compare
Share
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
