Sakari 10
10
U Tienu bebe n fidi bonla kuli
1A siakuana yaa pundi,
Yin mia mani o Diedo ki taaga n mi.
O baa teni kan yini ki mi hali boncianla.
Yuakuli kuanu baa guani ki boandi.
2Diidi mani i buli n guandi yi
Yaala kuli tie faama,
A baabuula n doagidi yaala kuli
Tie faama,
Yaaba n bundi ti dangidi maadi mafanma,
Ki baagidi yi fanma fanma.
Lani n cedi ke bi niba puagi ki lindi
Ki laadi fala nani yaa yankulu
N ki pia kpaalo yeni.
3O Diedo yedi:
«N pali beni leni bi yankpaaba
Yaaba n gobidi n niba.
N baa waani a ŋuabuana fala.
Mini Li Miali Diedo U Paalu Kuli Daano,
N baa taa n niba, Juda yaaba, ki kubi ba.
Bi baa tua nani n tanjagido,
Min jagi yua leni ti kpiagidi bu toabu po.
4Li tanpuuli tanjigi, li gbandieli kpaali
Leni bu toabu dabanli#10.4 «Li tanpuuli tanli, li gbandieli kpaali, bu toabu dabanli.» Lani kuli bundima tie bi yudanba ki wangi ke nilanba ka go baa yaa gobidi Isidayeli yaaba, ama bani Isidayeli yaaba yaa yudanba n baa yaa tugi bi yuli, ki caani ba bu toabu.
Baa ña Juda yaaba siiga,
Bi yudanba buoli buoli baa ña bi siiga,
5Ki taani nani a jakoanda yeni,
Ki ŋmaa yaaba n koani leni ba
Nani i sani nni moamoadi yeni.
Bi baa koani yeni,
Kelima mini o Diedo ye leni ba.
I fe baa cuo bi yibalinba yaaba n jagi i taami.
6N baa pa Juda yaaba u paalu,
Ki faabi bani Isidayeli yaaba.
N baa gbadi bi po mi ninñima,
Ki lebidi ki guani ba bi deni.
Bi baa yaa tie n po nani mii den kpa
Yie ba ba yenma yeni,
Kelima n tie o Diedo, bi Tienu.
N baa gaa bi miabu.
7Isidayeli buolu baa yaa tie nani a jakoanda yeni,
Bi pala baa yaa mani
Nani yaaba n ñuni mi daama yeni.
Bi puoliŋuani baa le o Diedo
N baa pa ba yaa pamancianli yeni.
8N baa teni ban kpaani ki taani n niba,
Min faabi ba ki teni ban yabidi
Nani ban den kpa yabi maama.
9N den yadi ba i nilanbuoli nni,
Ama bi den tiani n po,
Ba ke bi den ye foagima.
Bani leni bi bila kuli baa ciadi,
Ki yegi ki lebidi ki kpeni.
10N baa ñani ba Ejipiti leni Asiiri diema nni,
Ki guani ki kpenni n ba bi deni.
N baa kaani ba Galaadi leni Liban diema nni,
Ama ba yeni, mi fanma kan dagidi ba.
11Bi baa duodi li paboanli ñincianma,#10.11 Gireki maama nni, li diani “Ejipiti ñincianma.” Laa maama tiadi Isidayeli yaaba n den ñani Ejipiti yo. Diidi Mi Ñama 14.21-22; Esayi 51.10; Pisomi 106.9.
Bi baa pua ki duani mi ñincianma ñingola,
U kpenu Nili baa ñuudi.
Asiiri yaaba japaadi baa jiidi,
Li bali mo n bodi Ejipiti nni.
12N baa pa n niba u fidu,
Bi baa yaa kpiagidi nni,
Ki tuodi ki tiendi min yedi yaala.
Mini o Diedo n yedi yeni!»
Currently Selected:
Sakari 10: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.