Mi Doagidima 12

O bonfuodibiado leni ti yanliediti

12—13

O pua leni o bonfuodibiado

1Yaa maalicianma n pia li pakili den doagidi tanpoli. Li den tie pua, ke o bobi u yienu nani ti tiadi yeni, ke o taana ŋmaa o ŋmaalo, ki ciibi yaa badifogiliga n pia piiga n ŋmabilalie. 2O den punbi ke o maayogunu nagini, ke u maditugukoanu pia o, ke o mua kelima wan laadi yaa fala ti madi po.

3Maalitoama go den doagidi tanpoli. Yaa bonfuodi-biadiciamo n moani den se. O den pia yulalele leni yina piiga, ki go pia badifogilimulele o yula po. #Dan 7.7. 4O juoli den fuli a ŋmabila boagidimitaa siiga boagidiyenma, ki luni a ki tinga po.

O bonfuodibiado yeni den sedi o pua yua n baa maa yeni kani, ke o yaa mali yaa yogunu wan nali o biga. #Dan 8.10. 5O pua yeni den mali bonjaga, yua n baa gobidi i nibuoli kuli leni yaa badigbiamu n tie kudi. Bi den duoni o biga U Tienu leni o bali kalikaanu kani. #Esa 66.7; Ps 2.9. 6O pua yeni den sani ki gedi U Tienu n ŋanbi o po yaa kaanu mi fanpienma nni, ban baa yaa dindi o naankani, hali tudili n kobilie n dana piiluoba.

7Bu toabu den tieni tanpoli po. Miseli leni o malekinba den tuogi bu toabu leni o bonfuodibiado yeni. Wani moko leni o yaa malekinba den tuogi leni ba. #Dan 10.13,21; 12.1; Jud 1.9. 8Ama baa den fidi ki paadi Miseli leni o yaa malekinba, baa go den pia yekaanu tanpoli po. 9Bi den luni o bonfuodi-biadiciamo yeni, wani o Waakpelo, ban go yi yua ku Tuotabigu yudaano leni Sutaani, wani yua n boandi ki tinga nni yaaba kuli. Bi den luni o ki tinga po, wani leni o malekinba. #Cil 3.1; Luk 10.18.

10Lani n den gbadi ke u nialiciamu kpaani tanpoli po ki yedi:

«Moala ti Tienu tindima,

O paalu leni o diema cua.

Wan Gandi Yua mo

Yaa bali yogunu pundi,

Kelima bi ñani ku Tuotabigu yudaano

Tanpoli po ki luni,

Wani yua n den kuliti ti kpiiba U Tienu kani,

U yensiinu leni ku ñiagu kuli. #Jb 1.9-11; Sak 3.1.

11Bi den paadi o,

Kelima ki Pebiga soawulima

Leni bi siedi maama po.

Laa siedinba den luni bi miana,

Hali kaa jie ba mi kuuma.

12Lani yaa po, mangi mani yi pala,

Yinba yaaba n ye tanpoli po!

Ama o falaciamo ye leni yinba

Ki tinga leni mi ñincianma,

Kelima ku tuotabigu yudaano

Jiidi yi kani leni li pabienli,

Kelima o bani ke o yogunu ki go fuu.»

13O bonfuodibiado n den laa ke bi luni o ki tinga po, o den ŋoadi ki faligidi o pua yua n mali ki bonjaga yeni. 14Lani, bi den puni o pua yeni jiebanciamo fiabi bonilie, ke wan yugi ki gedi o kaanu, yuu n ye mi fanpienma nni, ban baa yaa kubi o naanpo, ki dindi o hali binataa leni boagidima, wan foagidi leni o wa yeni. #Dan 7.25; 12.7. 15O wa yeni den sii yaa ñima n yabi nani u kpenciamu yeni, ke man ŋoadi ki tugi o pua yeni. 16Ama ki tinga den todi o pua ki yaadi ki ñoabu ki ñuudi o bonfuodibiado n sii yaa ñincianma. 17O bonfuodibiado pali den beni leni o pua yeni, ke o gedi ki baa tuogi bu toabu leni o bila yaaba n sieni, bani yaaba n ŋua U Tienu mabilikaama ki kubi Jesu yaa siedi. 18O den sedi mi ñincianma jaali tanbiima po.

Currently Selected:

Mi Doagidima 12: BGP

Highlight

Copy

Compare