Mi Coadima 9
9
Mi Pendima jaanma daali
1O Diedo den maadi leni Musa, Sinayi fanpienma nni, Isidayeli yaaba ñama Ejipiti binlieli ŋmakpialo nni, ki yedi: #Ñam 12.1-13. 2«Isidayeli yaaba, mi Pendima jaanma yogunu yaa pundi, yin yaa jaani ma. 3Yi baa yaa jaani ma, o naa ŋmaalo piiga n danaali yenjuaboandigu. Yi baa yaa jaani ma, ki ŋoadi nani yaa mabilikaama leni yaa ñoamabona kuli n bili mi jaanma yeni po.»
4Musa den waani Isidayeli yaaba, ke ban jaani mi Pendima jaanma. 5Lanwani, bi den jaani mi Pendima jaanma Sinayi fanpienma nni, o ŋmakpialo piiga n danaali yenjuaboandigu. Bi den ŋoadi nani o Diedo n den puogi Musa maama. 6Ama lidaali den sua ke li pia yaa niba n joagini, kelima tinkpilo po. Lani yaa po, baa den pia u sanu ki jaani mi Pendima jaanma. Lidaali, bi den gedi Musa leni Alono kani. 7Laa jaba den yedi Musa: «Ti joagini, kelima tinkpilo po. Be yaa po, ke ban bili yaa yogunu yeni, tinba wani ki pia sanu ki padi o Diedo po ti padili, Isidayeli yaaba siiga?» 8Musa den yedi ba: «Guudi mani hali min bandi o Diedo n baa teni nni yaa ñoamabonli yi po.» 9O Diedo den maadi leni Musa, ki yedi: 10«Yedi Isidayeli yaaba: Li yaa tie yi siiga niyendo, bi yi nifiima yaama n baa ŋoadi siiga, joagini kelima tinkpilo po, bi ke o gedi naankani n foagi, o baa jaani mi Pendima jaanma o Diedo kpiagidi po. 11Ama li baa yaa tie cilie piiga n danaali yaa yenjuaboandigu. O baa ŋmani wan padi yaa pebiga yeni leni yaa dupen n ki pia dabinli leni yaa muadi n to. 12Liba kuli kan duani. Bi kan mudi kpabiliba kuli. Bi baa jaani ma, ki ŋoadi yaala n diani mi Pendima jaanma po kuli. #Ñam 12.46; Jan 19.36. 13Li yaa tie ke yua n ki joagini, ki naa gedi dogu mo ka, ki li yie kaa jaani mi Pendima jaanme, yin ñani o o buolu nni, kelima waa cuani o paabu, mini o Diedo po, lan den bili yaa yogunu. Laa nilo baa tugi o tuonbiadi panpaani. 14Li yaa tie ke caano ye yi siiga, ki bua ki jaani o Diedo Pendima jaanma, o baa ŋoadi yaala n diani ki bili mi Pendima jaanma yeni po. Yi siiga nni baa yaa pia mabilikayenma, o caano leni u dogu maabiga po.»
Ku tawaligu ŋoagini u kaangagidiŋamu
15Ban den sieni li gbandieli yaa daali, ku tawaligu den jiidi ki ŋoagini li gbandieli, siedi gbandieli yeni. Ki cili ku yenjuagu, ki ban tuoni hali ku tiŋaagu, ku den tie nani u mu yeni, li gbandieli po. 16Li den tie yeni yogunu kuli, ku den ŋuagi li, ki yieni ku ñiagu nani u mu yeni. 17Yaa yogunu ke ku tawaligu yeni ŋoagidi, ki ŋaa li gbandieli, Isidayeli yaaba yen fii. Ku tawaligu yaa ban sedi naankani, Isidayeli yaaba yen kpaa bi nagili lankani. 18O Diedo n yen teni li ñoamabonli Isidayeli yaaba n fii, o Diedo n go yen teni li ñoamabonli ban sedi ki kpaa bi nagili. Bi yen kali ki waagi, ki ŋoadi ku tawaligu n yen waagi ki ye, li gbandieli po yaa bianu. 19Ku tawaligu yaa den waagi ki ye li gbandieli po yaa banlu kuli, Isidayeli yaaba yen kubi o Diedo bali maama, kaa yen fii. 20Ku tawaligu yaa den tieni dana waamu li gbandieli po, bi yen ŋoadi o Diedo ñoamabonli, ki kpaa bi nagili, ki go yen ŋoadi o Diedo ñoamabonli, ki fii. 21Li yaa tie ke ku tawaligu yen sedi ku ñiagu ki ban pundi hali ku tiŋaagu, ke ku tawaligu faa ki fii ki ŋoagidi, bi yen fii. Ku tawaligu yaa tieni ñiayengu leni dayenli, ki yuandi, ki ŋoagidi ki ŋaa li gbandieli, bi yen fii. 22Ku tawaligu yaa bi den ŋoagini li gbandieli, ki tieni danalie, bi ŋmaalo, bi binli, bi yen kpaa bi nagili, ki kan suagi liiga. Ku yaa ti ŋoagidi ki ŋaa li yaa yogunu, ban fii ki suagi.
23O Diedo n yen teni ba li ñoamabonli, ban kpaa bi nagili, o Diedo n go yen teni ba li ñoamabonli, ban fii. Bi den kubi o Diedo bali maama, nani o Diedo n den teni Musa li ñoamabonli maama.
Currently Selected:
Mi Coadima 9: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
