Mi Coadima 8
8
Mu fidisanmu n baa yaa siendi maama
1O Diedo den maadi leni Musa, #Ñam 25.31-40; 37.17-24. 2ke wan maadi leni Alono ki yedi o: «A yaa baa tuani mu fidisanmu yaa yogunu, ŋan yaa faami ki teni mu fidisanleleedimu yeni, yenma n yaa yendi u fidisantuankaanu nintuali po.»
3Alono den tieni yene. O den tuani mu fidisanmu u fidisantuankaanu nintuali po, nani o Diedo n den puogi Musa maama. 4Diidi u fidisantuankaanu n den tie maama: U den tie wula yua n kpiagi, ki cili u tiipo, ki yaa caa hali u tanpoli. U den tie ban pua ki tandi tandi yaa wula. Bi den tieni u fidisantuankaanu, nani o Diedo n den teni ke Musa laa li bonlekaala nni maama.
Levi buolu gagidima
5O Diedo den maadi leni Musa, ki yedi: 6«Ñani Levi buolu, Isidayeli yaaba siiga ki gagidi ki ŋanbi ba. 7Diidi ŋan baa gagidi ki ŋanbi ba maama nne: Ŋan mii bi po ti tuonbiadi ŋuudima ñima.#8.7 Li fidi ke laa ñima tie ban maadi yaa ñima yaa maama. Coa 19 bi Lev 14. Li yaa puoli, bi baa koagidi bi gbanu kobidi kuli, ki ŋuudi bi tiayiekaadi, ki ŋanbi bi baa. 8Lani yaa pendi, bi baa taa naatonbili leni yaa paabu n yegi leni la, ki taani leni yaa yoma n kali leni mi kpama. A baa taa li naatonbili, lin tua ti tuonbiadi sugili miabu padili. 9A baa teni Levi buolu n nagini u Kadikaanu Gbandieli nintuali. Ŋan yini ki taani Isidayeli yaaba nitaanli kuli. 10Ŋan teni Levi buolu n nagini o Diedo nintuali, ke Isidayeli yaaba n maani bi nii bi po. 11Alono baa tieni o Diedo nintuali, yaa maalima n doagidi ke Levi buolu tie o yaaba Isidayeli yaaba siiga. Bi baa gagidi ba o Diedo tuonli po. 12Levi buolu baa maani bi nii a naatona yeni yula po. A baa taa naatonyenli, ki padi ti tuonbiadi sugili miabu padili. Li naatonlieli mo, a baa padi li li padijuukaali o Diedo po, ki mia Levi buolu po, bi tuonbiadi sugili. 13A baa teni Levi buolu n sedi Alono leni o bijaba nintuali, ŋan tieni yaa maalima n doagidi ke a taa ba ki puni mini o Diedo. 14Ŋan paadi ki ñani Levi buolu Isidayeli yaaba siiga. Levi buolu baa yaa tie n yaaba. 15Li yaa puoli, Levi buolu baa cua, ki soani u Kadikaanu Gbandieli tuonli. Yene, ke a baa gagidi ki ŋanbi ba. A baa tieni yaa maalima n doagidi ke a taa ba ki puni nni. 16Bi tie min gandi yaaba Isidayeli yaaba siiga, ke bi gaa n po bani Isidayeli yaaba bonjakpiala kaanu, ki tie mini nbebe n die yaaba. 17Mini n die bonjakpiaga kuli Isidayeli yaaba siiga. Ti yandi siiga moko, mini n die bontonkpiaga kuli. Min den kpa Ejipiti diema bonjakpiala kuli yaa daali, n den gagidi n yuli po bane. #Ñam 13.2.
18Lanwani, n taa Levi buolu, ke bi gaa Isidayeli yaaba bonjakpiala kuli kaanu. 19N den taa Levi buolu Isidayeli yaaba siiga, ki teni Alono leni o bijaba, ke ban yaa tuuni u Kadikaanu Gbandieli tuonli, ki baali ti candandi Isidayeli yaaba tuonbiadi po. Lani, Isidayeli yaaba kan go le falabuoluba kuli, kelima li baa sua ke Isidayeli yaaba nagini u kaangagidiŋamu.»
20Musa, Alono leni Isidayeli yaaba nitaanli kuli, den tieni o Diedo n den yedi Musa yaala Levi buolu po. 21Levi buolu den ŋanbi bi yula, ki go ŋuudi bi tiayiekaadi. Alono den tieni yaa maalima n doagidi ke o teni ba o Diedo, ki den padi bi po ti tuonbiadi sugili miabu padili, ke wan gagidi ki ŋanbi ba. 22Li yaa puoli, Levi buolu den cili ki tuuni u Kadikaanu Gbandieli nni, ke Alono leni o bijaba ŋua ki gobidi ba, nani o Diedo n den puogi Musa maama Levi buolu po.
23O Diedo den maadi leni Musa, ki yedi: 24«Diidi yaala n bili Levi buolu po: Levi buolu yua kuli, yaa pundi piilie n binamuu, o yen baa cili o tuonli, u Kadikaanu Gbandieli nni. 25O yaa ban pundi bina piimuu, o baa cedi ki kan go soani ban den puogi o yaa tuona. 26O baa yaa todi o kpiiba, ban pia yaa tuona u Kadikaanu Gbandieli nni. Ama wani o ba kan go yaa pia tuonceli. A baa tieni yene Levi buolu po, ban puogi ba yaa tuonli po.»
Currently Selected:
Mi Coadima 8: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
