Mi Coadima 26
26
1o Diedo den maadi Musa leni o kopadiciamo Alono bijua Eleasari, ki yedi: #Coa 1.1-46. 2«Yin ŋoadi mani buolu buolu, ki coadi Isidayeli yaaba nitaanli kuli, yaa jaba n pia bina piilie leni yaaba n cie yeni, yaaba n baa fidi ki gedi toabu.» 3Musa leni Eleasari den maadi leni Isidayeli yaaba Moabi tiali nni, ki kuu Jurden kpenu, ki tiegi leni Jeriko dogu. Bi den yedi ba: 4«Ti baa coadi yaa jaba n pia bina piilie leni yaaba n cie yeni, nani o Diedo n den puogi Musa leni Isidayeli yaaba, yaaba n den ñani Ejipiti diema nni maama.»
5Isidayeli bijakpelo Rubeni bijaba yaa yela den tie bine: Enoki cuuli, ke bi yaaja tie Enoki. Palu cuuli, ke bi yaaja tie Palu. 6Hetisiloni cuuli, ke bi yaaja tie Hetisiloni leni Karmi cuuli, ke bi yaaja tie Karmi. 7Laa cuuna n den tie Rubeni buolu, ke bi coali kuli den fii piinaa n tudataa n kobilele n niba piitaa (43 730). 8Palu bijua den tie Eliabi. 9Eliabi mo yaa bijaba n tie: Nemueli, Datan leni Abirami. Datan leni laa Abirami den tie nikpiaga li nitaanli nni. Bi den taani ki fii Musa leni Alono po, bani leni Kore cagili yaaba, bani yaaba n den fiini mi yiema o Diedo po. 10Ki tinga den yaadi ki ñoabu ki nali bani leni Kore, o cagili yaaba n den kpe ke u mu den buoni kobilie n niba piimuu yaa yogunu. Li den bua ki waani ke yaa niba n sieni n fangi bi yula. 11Kore bijaba wani naa den kpe.
12Simeon buolu, ki ŋoadi cuuli cuuli yaaba den tie: Nemueli cuuli, ke bi yaaja tie Nemueli, Yamini cuuli, ke bi yaaja tie Yamini, Yakini cuuli ke bi yaaja tie Yakini. 13Sera cuuli, ke bi yaaja tie Sera, Sawuli cuuli, ke bi yaaja tie Sawuli. 14Bani n den tie Simeon buolu, ke bi coali kuli den fii piilie n tudalie n niba kobilie (22 200).
15Gadi buolu, ki ŋoadi cuuli cuuli den tie: Tisefoni cuuli, ke bi yaaja tie Tisefoni, Hagi cuuli, ke bi yaaja tie Hagi, Suni cuuli, ke bi yaaja tie Suni, 16Osini cuuli, ke bi yaaja tie Osini, Edi cuuli, ke bi yaaja tie Edi, 17Alodi cuuli, ke bi yaaja tie Alodi, Aleeli cuuli, ke bi yaaja tie Aleeli. 18Bani n den tie Gadi buolu, nani bi coali n den tie maama. Bikuli den fii tuda piinaa n niba kobimuu (40 500).
19Juda bijaba Eri leni Onani. Ama Eri leni Onani den kpe Kanana diema nni. 20Diidi Juda bijaba nani bi cuuna n tie maama nne: Sela cuuli, ke bi yaaja tie Sela, Peretisi cuuli, ke bi yaaja tie Peretisi, Sera cuuli, ke bi yaaja tie Sera. 21Peretisi bijaba tie: Hetisiloni cuuli yaa yaaja tie Hetisiloni. Hamula cuuli, ke bi yaaja tie Hamula. 22Bani n tie Juda buolu, nani bi coali n den tie maama. Bikuli den fii piilele n tudaluoba n niba kobimuu (76 500).
23Isakari bijaba ki ŋoadi, cuuli cuuli den tie: Tola cuuli, ke bi yaaja tie Tola, Pufa cuuli, ke bi yaaja tie Pufa, 24Yasubi cuuli, ke bi yaaja tie Yasubi leni Simironi cuuli, ke bi yaaja tie Simironi. 25Bani n den tie Isakari buolu, nani bi coali n den tie maama. Bikuli den fii piiluoba n tudanaa n niba kobitaa (64 300).
26Sabuloni bijaba, ki ŋoadi cuuli cuuli den tie: Seledi cuuli, ke bi yaaja tie Seledi, Elon cuuli, ke bi yaaja tie Elon leni Yaleeli cuuli, ke bi yaaja tie Yaleeli. 27Bani n den tie Sabuloni buolu. Bikuli den fii tuda piiluoba n niba kobimuu (60 500).
28Josefi bijaba, ki ŋoadi bi cuuna, den tie Manase leni Efrayimi. 29Manase buolu den tie: Makiri cuuli, ke bi yaaja tie Makiri. Makiri den mali Galaadi. Galaadi cuuli yaaja den tie Galaadi. 30Galaadi bijaba den tie: Yeseli cuuli, ke bi yaaja tie Yeseli. Heleki cuuli, ke bi yaaja tie Heleki. 31Asiriyeli cuuli, ke bi yaaja tie Asiriyeli, Sikemi cuuli, ke bi yaaja tie Sikemi. 32Semida cuuli, ke bi yaaja tie Semida, Heferi cuuli, ke bi yaaja tie Heferi. 33Heferi bijua Selofadi naa den mali bonjaga, ama o den mali bonpola yo. Diidi Selofadi bisiaba yeni yela nne: Mala, Noa, Hogila, Milika leni Tirsa. 34Bani n den tie Manase buolu, nani bi coali n den tie maama. Bikuli den fii piimuu n tudalie n niba kobilele (52 700).
35Diidi Efrayimi mo yaa bijaba nne, nani bi buolu n den tie maama. Sutela cuuli, ke bi yaaja tie Sutela, Bekeli cuuli, ke bi yaaja tie Bekeli, Tahani cuuli, ke bi yaaja tie Tahani. 36Diidi Sutela bijaba nne: Elani cuuli, ke bi yaaja tie Elani. 37Bani n den tie Efrayimi buolu, nani bi coali n den da maama. Bikuli den tie piitaa n tudalie n niba kobimuu (32 500). Bani kuli n den tie Josefi bijaba, nani bi buolu n den tie maama.
38Benjamen bijaba, ki ŋoadi cuuli cuuli den tie: Bela cuuli, ke bi yaaja tie Bela, Asibela cuuli, ke bi yaaja tie Asibela, Ahilami cuuli, ke bi yaaja tie Ahilami, 39Sufami cuuli, ke bi yaaja tie Sufami leni Hufami cuuli, ke bi yaaja tie Hufami. 40Bela bijaba tie Ardi leni Naama. Ardi buolu yaa yaaja n tie Ardi, Naama buolu yaa yaaja den tie Naama. 41Bani n den tie Benjamen buolu, ki ŋoadi bi coadi n den da maama. Bikuli den fii piinaa n tudamuu n niba kobiluoba (45 600).
42Diidi Dan bijaba nne, ki ŋoadi cuuli cuuli den tie: Suhami cuuli, ke bi yaaja tie Suhami. Bani n tie Dan buolu. 43Suhami cuuli coali den taani ki fii piiluoba n tudanaa n niba kobinaa (64 400).
44Aseri bijaba, ki ŋoadi cuuli cuuli den tie: Yimina cuuli, ke bi yaaja tie Yimina, Jisifi cuuli, ke bi yaaja tie Jisifi, Beria cuuli, ke bi yaaja tie Beria. 45Beria bijaba yaa puoliŋuani tie: Heberi cuuli, ke bi yaaja tie Heberi, Malikieli cuuli, ke bi yaaja tie Malikieli. 46Aseri bisalo den yi Sela. 47Bani n den tie Aseri buolu, ki ŋoadi bi coali n den da maama. Bikuli den fii piimuu n tudataa n niba kobinaa (53 400).
48Nefitali bijaba, ki ŋoadi cuuli cuuli den tie: Yatiseeli cuuli, ke bi yaaja tie Yatiseeli, Guni cuuli, ke bi yaaja tie Guni, 49Yetiseri cuuli, ke bi yaaja tie Yetiseri, Silemi cuuli, ke bi yaaja tie Silemi. 50Bani n tie Nefitali buolu, ki ŋoadi nani bi coali n den tie maama. Bikuli den fii piinaa n tudamuu n niba kobinaa (45 400).
51Bani n tie ban den coadi Isidayeli siiga yaaba, ke bi coali kuli den fii kobiluoba n tudiyenli n kobilele n niba piitaa (601 730).
U Tienu waani ban baa boagidi mi diema maama
52O Diedo den maadi leni Musa, ki yedi: #Coa 34.13; Jos 14.1-2. 53«Ŋan boagidi mi diema, ki teni cuuli kuli li yaa biinu, nani li niba n da maama. 54Yaa cuuli yaa niba n yabi ki cie, ŋan teni ba yaa biinu n yabi ki cie. Yaa cuuli yaa niba n wa ki cie, ŋan teni ba yaa biinu n wa ki cie. Ŋan teni cuuli kuli, nani ban coadi ki sua ke li niba da maama. 55Ama yi baa toa tiatia yo, ki boagidi mi diema, ki teni buolu kuli u yaa biinu, nani u niba n da maama. 56Yi baa toa tiatia yo, ki jagi yaa buoli n yabi ki cie n baa gaa yaa biini leni yaa buoli n wa ki cie mo n baa gaa yaa biini.»
Bi coadi Levi buolu mi taaliema
57Diidi ban den coadi Levi buolu, ki ŋoadi nani bi cuuna n tie maama: Gersoni cuuli, ke bi yaaja tie Gersoni, Kehati cuuli, ke bi yaaja tie Kehati, Merari cuuli, ke bi yaaja tie Merari. 58Libini cuuli, Hebiron cuuli, Mali cuuli, Musi cuuli leni Kore cuuli kuli den tie Levi buolu yo. Kehati den mali Amirami. 59Amirami pua den yi Yokebedi, ki tie Levi bisalo, ban den mali o po yua Ejipiti po. Wani n den mali Amirami po Alono, Musa leni bi naataanpuoga Miriam. 60Alono bijaba den tie: Nadabi leni Abihu, Eleasari leni Itamari. #Coa 3.2. 61Nadabi leni Abihu den kpe, kelima bi den cuani o Diedo nintuali mi fantanlanma. #Lev 10.1-2; Coa 3.4. 62Ban den coadi yaa jaba, ki cili yaa bonjala n den pia ŋmaalo leni yaaba n den cie yeni kuli, den taani ki fii piilie n niba tudataa (23 000). Baa den coadi ki taani ba Isidayeli yaaba siiga, kelima bani Levi buolu ki den pia tinbiinu Isidayeli yaaba siiga.
63Bani n den tie Musa leni o kopadiciamo Eleasari n den coadi yaaba, Moabi tiali nni, ki kuu Jurden kpenu, ki tiegi Jeriko dogu. 64Musa leni o kopadiciamo Alono n den coadi yaaba Sinayi fanpienma nni yeni kuli, ba niyendo ki den sieni, ki go ye ban den yuandi ki coadi yaaba yeni siiga. 65Baa den sieni, kelima o Diedo den yedi: «Bi baa kpe mi fanpienma nni, ke li kan sieni ba niyendo, li yàá tie Yefune bijua Kalebi leni Nun bijua Josue yaa ka.» #Coa 14.26-35.
Currently Selected:
Mi Coadima 26: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
