Mi Coadima 21
21
Isidayeli yaaba paadi Kanana yaaba
1Kanana yaaba bado, yua n den ye Aradi dogu nni, nuganu po, den gbadi ke Isidayeli yaaba tagi Atarim po yaa sanu, ki kpendi. O den fii ki tuogi leni ba bu toabu, ki cuo bi siiga bi tianba ti yonbidi. #Coa 33.40. 2Lanwani, Isidayeli yaaba den niani o Diedo yaa ñoanianu n tie ne, ki yedi: «A yaa cedi ke ti paadi yaa nibuolu n tie ne, ti baa bolini bi dogi.» 3O Diedo den cengi Isidayeli yaaba miabu, ki taa Kanana yaaba ki tieni bi nuu nni. Bi den bolini ba leni bi dogi, ki yini laa kaanu Horima.#21.3 Diidi Mi Coadima 14.45.
I webiadi
4Bi den fii Hori juali kani, ki tagini mi Ñincianmoanma po yaa sanu, ki lagidi Edomi diema. #Tia 2.1. 5Li sancenli nni, ku niligu yama den fii, ke bi den yenbidi U Tienu leni Musa po, ki yedi: «Be yaa po ke yi ñani ti Ejipiti, ki cua ki baa kpa ti mi fanpienma nni? Nekanba ki pia jiema, laa didi pia ñima mo. Ti ji miadi leni ti naa jeyuogidi mo.» 6Lanwani, o Diedo den soani i webiadi ku niligu siiga, ke i ñidi Isidayeli yaaba niba boncianla, ke bi kpe. #1Kor 10.9. 7Ku niligu den cua Musa kani, ki yedi: «Ti tieni ti tuonbiadi, kelima ti yenbidi o Diedo leni fini yaa po. Mia o Diedo, ke wan foagidi ti po i naa we.» 8O Diedo den yedi o: «Ŋan duadi o waabiado nannanli, ki joani ku dafoagidigu po, ki caani ku. Wa n ñidi yua kuli, ke o yaadi ki diidi li nannanli yeni, o baa ciadi.» 9Musa den duadi ti kumoandi wa, ki joani o ku dafoagidigu po. Wa n den ñidi yua kuli, ke o yaadi ki diidi ti kumoandi wa yeni, o yen ciadi. #2Bad 18.4; Jan 3.14.
Isidayeli yaaba n tagini maama hali Pisiga juali kani
10Isidayeli yaaba den fii ki gedi ki ban kpaa bi nagili Oboti dogu kani. 11Bi den fii Oboti, ki ban kpaa bi nagili Iye-Abarimi dogu kani, ki ye yaa fanpienma n ye Moabi diema puoli yaa niinni. 12Bi den fii lankani, ki ban kpaa bi nagili Seledi joaloangu nni. 13Bi den fii Seledi joaloangu nni, ki ban kpaa bi nagili Arinoni kpenu kandima, yuu n ñani Amori yaaba diema nni, ki pundi mi fanpienma nni. Arinoni kpenu ye, Moabi diema leni Amori yaaba diema siiga, ki tie bi bianu. 14Li tie lani yaa po yo, ke o Diedo Toabu tili#21.14 o Diedo Toabu tili nni: Laa tili naa go ye. nni, li yedi: «Yaa dogu n yi Wahebi ki ye Sufa leni li kpentaana, Arinoni kpenu 15leni u yaa kpentaana, ya n tandi ki goa yaa dogu n yi Ali po leni Moabi diema po.»
16Bi den fii Arinoni kandima, ki gedi yaa dogu n yi Beeri.#21.16 Beeri bundima tie “Li caali.” Laa Beeri kane, ke o Diedo den yedi Musa: «Taani bi niba, min pa ba mi ñima.» 17Lani, Isidayeli yaaba den yini bu naa yanbu:
«Caali, teni ke a ñima n pudi,
Ke tin yiini bu yanbu li po.
18Bi yudanba n gbini yaa caali,
Bi bulicinba n gbini yaali,
Ki taani li bali gbiamu leni bi gbiami.»
19Bi den fii mi fanpienma nni, ki gedi Matana dogu. Bi den fii Matana, ki gedi Nahalieli dogu. Bi den fii Nahalieli, ki gedi Bamoti dogu. 20Bi den fii Bamoti, ki gedi yaa joaloangu n ye Moabi diema nni, Pisiga juali yuli po, yaali n tibidi ki tiegi mi fanpienma po.
Isidayeli yaaba paadi yaa badiba n yi Sihoni leni Ogi
21Isidayeli yaaba den soani a tonda, Amori yaaba bado Sihoni kani, ki yedi: 22«Ti bua ki poandi a diema nni. Ti kan kua yi kuani nni, yi duventiidi nni, ti kan didi ño yi caana ñima mo. Ti li baa ŋoadi li sanjali, hali tin ban ña yi diema nni.» 23Ama Sihoni ki den puni Isidayeli yaaba u sanu, ban poandi o diema nni. O den taani o toatieba, ki fii ki ban tuogi Isidayeli yaaba mi fanpienma nni, Yahatisi dogu kani. O den cua Yahatisi, ki baa Isidayeli yaaba bu toabu. 24Isidayeli yaaba den pua o leni ki jugisiega, ki paadi o, ki diedi o diema, ki cili u kpenu Arinoni, ki ban tuoni u kpenu Yakoli leni Anmoni yaaba diema bianu. Anmoni buolu diema bianu den pia u bilinu, ke u maa ki lindi. 25Isidayeli yaaba den fie laa dogi kuli, ki den kali Amori yaaba dogi nni, ki taani leni yaa dogu n yi, Hesibon leni u dobila kuli. 26Hesibon yeni, n den tie Amori yaaba bado Sihoni docianmoanu. O den tieni bu toabu leni Moabi badikpialo, ki den fie o diema kuli, hali ki ban tuoni u kpenu Arinoni. 27Li tie lani yaa po yo, ke bi yanyinba tua:
«Cua mani Hesibon kani
Cua mani ki go guani ki maa o bado Sihoni dogu!
28Kelima u mu ñani Hesibon nni,
U mupienu mo ñani Sihoni dogu nni,
Ki bolini Ali dogu Moabi diema nni.
Mi bolini Arinoni juana ya n kpedi boncianla yeni. #Jer 48.45-46.
29Fala baa baa yinba Moabi yaaba,
Yi bia n yeni, yinba yaaba n kpiagidi o bulo Kemosi!
O teni ke o bijaba sani ki yaadi,
Ki teni ke o bisiaba mo tua Amori yaaba bado Sihoni yonbi.
30Ama ti toani ba ti piemi,
Ki bolini Hesibon, ki ban tuoni hali Divon dogu.
Ti bolini ki ban tuoni hali Nofa dogu
Leni yaaba n ban pundi Medeba dogu.»
31Isidayeli yaaba n den kali Amori yaaba diema nni maama n yeni. 32Musa den soani bi niba ban gaani ki diidi Yaheseli dogu, ki den fie u dobila, ki deli ki ñani Amori yaaba, yaaba n den kaa likani. 33Li yaa puoli, bi den pegidi ki taa santo, ki tagini Basan po yaa sanu. Ogi, Basan bado den fii leni o niba kuli, ki baa cua ki tuogi leni Isidayeli yaaba bu toabu, Edreyi dogu kani. 34O Diedo den yedi Musa: «Ŋan da jie o, kelima n taa wani, o niba leni o diema kuli, ki tieni a nuu nni. A baa soani o, nani ŋan soani Amori yaaba bado Sihoni, yua n den kaa Hesibon maama yeni.» 35Lani, bi den paadi o, ki kpa wani, o bijaba leni o niba kuli, ki naa ŋaa ba niyendo leni miali. Bi den diedi o diema.
Currently Selected:
Mi Coadima 21: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
