Mi Coadima 18

Bi kopadicianba leni Levi buolu tuona

1O Diedo den yedi Alono: «Yaa tagili n tiendi U kaangagidiŋamu kuli, tugi fini, a bijaba leni a diegu nni yaaba yula po yo. Yaa tagili mo n tieni li kopadiciantuonli kuli nni, tugi fini leni a bijaba yaa yuli po. 2Ŋan taa a kpiiba, a baa buolu, Levi buolu yeni ki nagini ba a baa kani, ke ban yaa ye leni a ki todi a, fini leni a bijaba yaa tuuni siedi gbandieli nni yaa yogunu. 3Bi baa yaa ŋua ki tiendi a ñoamabona, ki tuuni ban pia yaa tuona kuli li gbandieli nni. Ama ban da nagini yaa tiadi n gagidi leni li padibinbinli, ke yinba leni bani kuli n da ti kpe. 4Bi baa yaa nagi a kani ki tiendi ban pia yaa tuona u Kadikaanu Gbandieli nni. Yua n ki tie Alono buolu yua kuli n da nagini yi kani. 5Yinba yi baa n baa yaa tuuni u kaangagidiŋamu nni leni li padibinbinli kani, ke o Diedo pali n da go ti fii Isidayeli yaaba po. 6Diidi, n gandi yi kpiiba Levi buolu Isidayeli yaaba siiga. N taa ba ki teni yi ke ban yaa tuuni u Kadikaanu Gbandieli nni. 7Fini leni a bijaba mo n baa yaa tuuni yi kopadiciantuonli li padibinbinli kani leni u kaangagidiŋanmoanu nni, yuu n ye bu kpalidoaginkaabu puoli po yeni. Yi kopadiciantuonli yeni tie min puni yi yaa tuonli. Yaa nilamo n nagini likani kuli baa kpe.»

Bi kopadicianba biini

8O Diedo den yedi Alono: «Diidi mini n ba n puni a ŋan yaa guu ban ñani ki puni nni yaa paabu. N puni fini leni a bijaba Isidayeli yaaba n gagidi yaala kuli, ke lan tua yi biinu. Li tie yaa mabilikaama n baa yaa ye yaa yogu n tuu yaa yogu. 9Diidi yaa bonla n gagidi ki ŋani hali boncianla siiga, yaala n ki juu u mu nni, yin die yaala nne: Bi pada, bi paabu, bi tuonbiadi sugili pada, mi guaniŋanbima pada leni ban padi ki puuni ya kuli. Laa bonla yaala n gagidi hali boncianla yeni tie fini leni a bijaba yaa po yo. 10Yin je laa jiema nani yaama n gagidi ki ŋani hali boncianla yeni. Bonjaga kuli baa je ma. Mi baa yaa tie yaala n gagidi ki ŋani yi po.

11Ŋan go die yaala ke li tie a biinu tie Isidayeli yaaba n kpendinni n po yaala leni ban yen tieni yaa maalima n waani ke bi teni nni yeni. N puni la fini leni a bijaba. A diegu nni yua n ki joagini kuli baa je ma. N puni la fini, a bijaba leni a bisiaba lan tua yaa mabilikaama n baa yaa ye yaa yogu n tuu yaa yogu kuli po. 12N go puni yinbe Isidayeli yaaba n baa pa nni ki tinga bonluonkakpiala yaala kuli: Lan tie kpapanma, duvenpaano bi ŋalikama. 13Ban baa cuani ki tinga bonluonkakpiala yaala o Diedo po kuli tie a yaale. A diegu nni yua n ki joagini kuli baa je ma. 14Isidayeli diema nni, ban gagidi yaala kuli, fini n die la. #Lev 27.28. 15Yaala n pia miali ki fo kuli bikpiaga, ban puni yaaga o Diedo kuli tie a yaage. Lan tie nilo bi niba bila siiga leni ti yandi yaa bila siiga. Ama ŋan teni ban daa ki faabi bi niba bikpiala leni yaa yandi n joagini kuli yaa bikpiala. 16Ŋan baa bili yaa panpaani yaa bonjaga n pundi ŋmaalo po baa yaa tie kujapienamuu, nani u kaangagidiŋamu yaa kujapienli kpiagu n da maama, yaala n pundi gera piilie. 17Ama ŋan da gaa daafaabima ligi, i ne, i pe leni i ŋuabi wani yaa bontonkpiamu po, kelima laa yandi wani tie yaadi n ŋani. A yen baa kodi ti ki wuli mi soama li padibinbinli po, ki ñani mi kpama ki juu, lan tua bi padijuukaali, yaa padili yaa nuulu n mani o Diedo po. 18Ti yandi yeni nandi baa yaa tie a po nani li bengunli, yaali ke bi yen tieni yaa maalima n waani ke bi teni la o Diedo, bi nani li jienpanli yeni.

19Lanwani, Isidayeli yaaba n baa ñani yaala, yaa paabu n gagidi o Diedo po yeni kuli, tie a yaa biinu yo. Lani n tie min puni a yaa biinu, fini, a bijaba leni a bisiaba. Li tie yaa mabilikaama n baa yaa ye yaa yogu n tuu yaa yogu kuli po. Li tie o Diedo nintuali, yaa ñoanianu n ki pia fidima, fini leni a puoliŋuani po yaa yogunu kuli.»

20O Diedo den yedi Alono: «A kan baa tinbiinu min baa pa Isidayeli yaaba yaa diema yeni niinni. Mini o Diedo n tie a tinbiinu leni a faali Isidayeli yaaba siiga.

Levi buolu biini

21Levi buolu panpaani u Kadikaanu Gbandieli tuonli po, baa yaa tie Isidayeli yaaba n kpendinni yaa diim. #Lev 27.30-33; Tia 14.22-29. 22Isidayeli yaaba kan go nagini u Kadikaanu Gbandieli. Lani n tie ban da ti tugi tuonbiadiba ki kpe. 23Levi buolu n baa yaa tuuni u Kadikaanu Gbandieli nni, ki yaa tugi bi tagili tugili. Li baa yaa tie yaa mabilikaama n baa ye yaa yogunu n tuu yaa yogu yi nifiima yaama n baa ŋoadi kuli siiga. 24Ama n puni Levi buolu, Isidayeli yaaba n ñani yaa diim o Diedo po yeni. Li tie lani yaa po, ke n maadi bi po, ki yedi: ‹Bi kan baa tinbiinu Isidayeli yaaba siiga.› »

25O Diedo den maadi leni Musa, ki yedi: 26«Ŋan maadi leni Levi buolu, ki yedi ba: ‹Yi yaa yen gaa Isidayeli yaaba kani min puni yi yaa diim, ke o tie yi biinu yeni, yin ñani lienni bu paabu o Diedo po. Lani n tie diim yaa diim. 27Bi baa coadi yin baa ñani n po yaala yeni, nani ban baa ñani yaa ŋalikama u jalu nni, yaa ka nani ban baa ñani yaa duvenpaano duven tiidi bonluonkaala datuodikaanu maama yeni. 28Yeni yimoko baa yaa ñandi yin gaani Isidayeli yaaba kani yaa diim yeni niinni, bu paabu o Diedo po. Yi baa teni o kopadiciamo Alono, yin ñani yaa paabu o Diedo po yeni. 29Yin gaani yaa paabu kuli nni, yi baa ñani bu paabu o Diedo po. Yaala n ŋani ki pia mayuli ki cie kuli siiga, yin ñani yaa biinu n gagidi.› 30Ŋan yedi ba: ‹Yi yaa ñani yaala n pia mayuli ki cie yeni, diim baa yaa tie Levi yaaba po, nani o kpakpaalo n die yaala n ñani u jalu nni leni yaala n ñani u datuodikaanu maama yeni. 31Yinba leni yi diegu nni yaaba, yi baa je laa jiema, yin baa naani kuli, kelima lani n tie yin tuuni yaa tuonli u Kadikaanu Gbandieli nni yeni panpaani. 32Yi yaa ñani yaala n pia mayuli ki cie yeni, tuonbiadiba kuli ki go ŋua yi. Lanwani, yi kan biidi Isidayeli yaaba paabu, yaabu n gagidi yeni, yi didi kan kpe mo.› »

Currently Selected:

Mi Coadima 18: BGP

Highlight

Copy

Compare