Mise 4
4
Mi yanduanma leni mi diema guaniŋanbima
4—5
Jerusalemi mi yanduanma dociamu
1U yogunu yaa pundi,
O Diedo bili ke o diegu n ye yaa juali po,
Baa kpedi ki cie a joabila kuli,
Ba a joaciama moko.
I nibuoli baa yaa tigibi ki caa likani.
2I nilanbuoli boncianla baa yaa caa likani ki tua biyaba:
«Cua mani tin do o Diedo juali yuli po,
Wani Jakob Tienu diegu kani,
Ke wan bangi ti o sani,
Ke tin yaa cuoni yini yaa niinni.»
Kelima li tie Siyon po yo,
Ke li bali maama baa ña,
O Diedo maama baa ña Jerusalemi dogu nne.
3O baa tua i nibuoli boncianla bujialo,
O baa tua yaa nilanbuoli n pia u paalu,
Ki ye hali foagima koanpaado.
Bi baa taa bi jugisiemu ki maa a cecela,
Ki taa bi kpaana mo ki maa ti moaciedi.
Nibuoluba kan go fii ki tuogi uyuu.
Bi kan go bangi bu toabu n tiendi maama. #Jl 4.10.
4Nilo kuli baa yaa kaa o duventiidi
Leni o kankanŋuuke soangu nni.
Yua n baa teni bi niba n jie kan go yaa ye,
Kelima Li Miali Diedo U Paaciamu Kuli Daano
Ñoabu n maadi ki yedi ke li baa yaa tie yeni. #Sak 3.10.
5Nilanbuolu kuli baa yaa ŋua o tienu,
Timo n yaa ŋua Li Miali Diedo ti Tienu,
Hali yaa yogu n tuu yaa yogu.
Isidayeli yaaba baa ña ti yonbidi nni ki kpeni
6O Diedo yedi: «Li daali kpendi,
Yaa daali ke n baa guani ki taani n pe yaaba n poagili.
N baa guani ki taani ban den deli ki yadi yaaba,
Min den faligi bani yaaba yeni.
7N baa taa yaaba n poagili yeni,
Ki teni ban tua yaaba n baa sieni,
Ki teni ban den deli ki gedini yaaba foagima yeni,
N tua yaa nibuolu n pia u paalu.
Lanyogunu, mini o Diedo baa yaa die ba
Siyon juali nni hali yaa yogunu n tuu yaa yogu kuli.
8Fini Siyon juali li toaguudidieli,
A baa guani ki baa a kpiagidi
Nani mi kpiama yeni,
Jerusalemi mo n guani ki baa o bali.»
Isidayeli yaaba baa le fala ki yuandi ki baa mi faabima
9Yinba Jerusalemi yaaba, be teni ke yi buudi moala?
Naani yin kaa pia bado, kaa go pia tundika yeni yaa po yo?
Lani n teni ke yi mua ki yalini
Nani u maditugukoanu n cuo yaa pua yeni?
10Yeni de, Siyon yaaba, yaa yalini ki duni mani,
Nani yaa pua n ye leni u maditugukoanu yeni.
Moala yi baa ña u dogu na niinni,
Ki gedi ki ban kpaa yi gbandiena li fuali nni.
Yi baa gedi hali Babilonni ki ban baa mi faabima.
Lanpo, mini o Diedo baa faabi yi yi yibalinba nuu nni.
11Moala i nilanbuoli boncianla taani
Ki bua ki tuogi leni yi bu toabu,
Ki maadi yi maama ki tua:
«Tin kua Siyon dogu nni ki joagini u.
Tin sedi ki ñuadi u dogu yeni bolinma.»
12Ama i nilanbuoli yeni niba
Naa bani mini o Diedo yantiana.
Baa bani min jagi ke n baa tieni yaala.
Mini n taani ba nani ban yen taani a dibaba u jalu nni maama yeni.
13Siyon yaaba,
Fii mani ki ŋmaa yi yibalinba,
Nani yaa ne n cuoni u jalu nni,
Ki ŋmaadi i di yeni.
N baa teni yi yina n tua kuboandi.
Yi taawoga mo n tua kumoandi.
Yi baa ŋmaa ki midi yaa nilanbuoli n yabi,
Ki gagidi ki bili bi piama mini ki tinga kuli Diedo po.
14Moala Siyon yaaba, yinba yaaba
N pia yaa toagola n yabi,
Badi mani yi yula li paboanli be,
Ki taani yi toagola kuli,
Kelima yibalinba taagi ki baa baa yi.
Bi baa pua yinba Isidayeli yaaba
Yudaano kpianu u gbiamu.
Currently Selected:
Mise 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
