Matie 15
15
Jufinba danbogida maama
(Mrk 7.1-13)
1 Farisieninba leni li bali maama banda tianba den ñani Jerusalemi, ki cua Jesu kani ki yedi o: 2«Be yaa po ke a ŋoadikaaba miidi ti danbogida? Bi yaa baa je kuli, bi kan nidi#15.2 Li den tie Farisieninba po kuali yo ki je kaa nidi. Li den tie yaa danbogida n tugi bi po li yuli nani li bali maama yeni. bi nii.» 3Jesu den guani ki yedi ba: «Be yaa po ke yimo miidi U Tienu bali maama, ki bua ki kubi yi bogida? 4U Tienu yedi: ‹Jigini a baa leni a naa,› ki go yedi: ‹Yua n soli o baa yaa ka o naa, li pundi ban kpa o.› #Ñam 20.12; 21.17; Tia 5.16; Lev 20.9. 5Ama yinba, yi yedi ke o nilo yaa yedi o baa, bi o naa, ke wan den baa todi ba leni yaala tie yaa paabu n gagidi U Tienu po. 6Yeni, yi bolini U Tienu maama ki nan kubi yi bogida. 7Yinba palalie danba, Esayi n den pua saawali yi po yaa saawalo tie moamoani:
8‹Bi naa niba jigindi nni leni bi ñoacuuna,
Ama bi pala foagi leni nni. #Esa 29.13.
9Bi jaandi nni fanma fanma
Kelima bi bangi yaa bangima,
N tie bi nisaaliba yaa mabilikaama bebe.› »
Yaala n joagindi o nisaalo
(Mrk 7.14-23)
10Jesu den yini ku niligu ke ku nagini o kani ke o yedi ba: 11«Cengi mani ki gbadi. Laa tie yaala n kua bu ñoabu nni ka joagindi o nisaalo. Ama yaala n ña bu ñoabu nni n joagindi o.»
12Li yaa puoli, o ŋoadikaaba den nagini o kani ki yedi o: «A bani ke ŋan maadi yaa maama yeni tie Farisieninba po tingbali bonla?» 13O den guani ki yedi ba: «N Baa yua n ye tanpoli n kaa ŋu yaa tibu kuli, bi baa ŋabi bu. 14Cedi ba mani! Bi tie yaa juama n dia a juama. Juamo yaa dadi juamo mo, bani nibilie kuli n baa baa ku buogu nni.» #Luk 6.39.
15Pieli den yedi o: «A kan bundi ti po mi kpanjama yeni?» 16Jesu den yedi o: «Yimoko yii pia yanfuoma yo? 17Yii bani ke yaala n kua bu ñoabu nni kuli caa ku tugu nni ki go baa ña ka? 18Ama yaala n ña bu ñoabu nni tie yaala n bi ye li pali nne ki ji ñani, lani n joagindi o nisaalo. #Mat 12.34. 19Ti yanmaalibiadi, mi kukpama, mi conconma buoli kuli, bu subu, mi siedifaama leni ti sugidi kuli ña li pali nne. 20Lani n tie yaala n joagindi o. Ama ki je kaa nidi kan joagini nisaalo.»
Kanana buolu pua dandanli
(Mrk 7.24-30)
21Jesu den fii ki ñani lankani ki gedi Tiiri leni Sidon dobila nni. 22Yaa pua n den tie likani maabiga, ki tie Kanana yua, den cua o kani ki kpaani ki tua: «O Diedo, Davidi Bijua, gbadi n po mi ninñima? Ki cicibiadiga ye n bisalo niinni ki yagini o yama hali ke li bia.» 23Jesu naa den guani ki yedi o liba kuli. O ŋoadikaaba den nagini o kani ki yedi o: «A kan cabi o, kelima o ŋua ki kpaani ti puoli.» 24Jesu den guani ki yedi: «Baa den soani nni nitoaba po se Isidayeli buolu po, bani yaaba n tie nani yaa pe n yaadi yeni po.» 25Ama o pua yeni den cua Jesu kani ki gbaani o nintuali ki yedi: «O Diedo, todi nni.» 26Jesu den guani ki yedi o: «Laa tiegi o nilo n taa a bila#15.26 Jufinba den nua bi yula ke bi tie U Tienu bila, ki nua yaa buoli n sieni kuli ke bi tie nani i sangbanli yeni. jiema ki lu a sangbanbila.» 27O pua yeni den yedi: «Yeni de! N Diedo, die a sangbanbila yen di yaa jejoagidi n baali bi danba saajekaanu kani.» 28Jesu den yedi o: «Pua, a dandanli yabi boncianla. Lan tieni a po nani ŋan bua maama.» Lanyogunu o bisalo den paagi.
Jesu paagi bi niba boncianla
(Mrk 7.37)
29Jesu den fii ki ñani lankani ki baali Galile ñincianma. O den doni ki kali li juali po. 30Ku niligu den cua o kani boncianla, ki kpendinni a diama, a juama, a muula, a woma, a tadima leni yiantoaba boncianla. Bi den cua ki duani ba Jesu taana kani ke o paagi ba. 31Ku niligu n den laa ke a muula maadi, ke a tadima paagi, ke a diama cuoni, ke a juama mo noadi, li den paki ba ke bi kpiagi Isidayeli Tienu.
Jesu dini niba tudanaa
(Mrk 8.1-10)
32Jesu den yini o ŋoadikaaba ki yedi: «Mi ninñima cuo nni ku naa niligu po, kelima danataa ke bi ye n kani, baa go pia ban baa je yaala. Mii bua ki cabi ba leni mi koma, ban da ti gbali u sanu nni.» 33O ŋoadikaaba den yedi o: «Ti baa tieni lede li naa fuali nni, ki baa yaa jiema n baa guoni ku naa niligu kuli?» 34Jesu den yedi ba: «Yi pia dupen bonbiŋa yo?» Bi den guani ki yedi o: «Bonbilele leni janbimuba.» 35Lani, o den teni ke ku niligu kali kali tiipo. 36O den taa bi dupenleleediba leni i jami ki tuondi U tienu, ki cabidi cabidi ki teni o ŋoadikaaba ke bi boagidi ku niligu. 37Bikuli den dini ki guo. Bi den wodi yaa jejoagidi n sieni, ki gbieni baabuodilele. 38Yaaba n den dini den pundi jaba tudanaa (4 000), kaa taani bi puoba leni a bila.
39Li yaa puoli, Jesu den cabi ku niligu, ki kua ku ñinbiagu nni ki gedi Magadani tinga nni.
Currently Selected:
Matie 15: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
