Matie 14
14
Jan Batisi kuuma
(Mrk 6.14-29; Luk 9.7-9)
1Lanyogunu Herodi yua den tie Galile diema guveneeri n den gbadi ke bi maadi Jesu maama. 2O den yedi o badibaanba: «Li tie Jan Batisi. O fii bi tinkpiba siiga. Lani n teni ke o tuuni leni u naa paalu, ki tiendi mi bancianma yeni.»
3Puoli po, Herodi den cuo Jan ki loli o ki luoni o li kpaadidieli nni, kelima Herodiasi, o waalo Filipi pua po. #Luk 3.19-20. 4Jan den tua Herodi: «Laa pia sanu ŋan taa o wan tua a pua.» #Lev 18.16; 20.21. 5Herodi den bua ki kpa o, ama o den jie ku niligu kelima bi den nua ke Jan tie saawalipualo. 6Ama Herodi maadaali n den pundi, Herodiasi bisalo den jeli ki ciaga, bi nitaankaaba siiga ki mangi Herodi pali, 7hali ke o den poli ki niani ke o baa pa o wan mia o yaala kuli. 8O jafaano den gaa o naa tundi ki yedi: «Pa nni nekanba Jan Batisi yuli ku taditialigu nni.» 9O bado pali den biidi, ama kelima wan den poli yaa poli bi nitaankaaba siiga yeni po, o den yedi ke ban teni o jafaano yeni Jan yuli. 10O den soani ke bi ban jia Jan Batisi yuli li kpaadidieli nni. 11Bi den cuani li ku taditialigu nni, ki teni o jafaano. O den taa li ki gedini ki ban teni o naa. 12Jan ŋoadikaaba den cua ki taa o tinkpilo ki ban piini, ki gedi ki ban waani Jesu.
Jesu dini niba tudamuu
(Mrk 6.30-44; Luk 9.10-17; Jan 6.1-14)
13Jesu n den gbadi laa laabaalo, o den kua ku ñinbiagu nni, ki piadi ki gedi bi niba n ki ye naani. Ku niligu n den bandi, ku den ñani i dogi nni ki cuoni ki ŋua o. 14Wan den ñani ku ñinbiagu nni, o den laa ke bi niba ladi ki ban caa. Mi ninñima den cuo o ke o paagi bi yiama.
15Ku yenjuagu n den baa, bi ŋoadikaaba den nagini o kani ki yedi o: «Ne tie fuali, u yienu mo bua ki kua. Cabi ku niligu ban gedi a dobila nni, ki ban daa bi bonjekaala.» 16Jesu den guani ki yedi ba: «Laa tie tiladi ban fii ki fuadi. Pa ba mani yiba ban je.» 17Bi den yedi o: «Ti nan pia dupen bonbimuu leni jamilie bebe yo ne.» 18O den yedi ba: «Cuani mani la n po na.» 19O den teni ke ku niligu kali kali ti muadi po. Lani, o den taa bi dupenmuudiba leni i janliedi, ki yaadi ki noanli tanpoli po ki tuondi U Tienu. Lani, o den cabidi cabidi dupen yeni, ki teni o ŋoadikaaba ke bi boagidi ku niligu. 20Bikuli den dini ki guo. Bi den taani yaa jejoagidi n sieni, ki gbieni piiga n baabuodilie. 21Yaaba n den dini den bua ki pundi jaba tudamuu (5 000), kaa taani bi puoba leni a bila.
Jesu cuoni u ñingbanu po
(Mrk 6.45-52; Jan 6.15-21)
22Lanyogunu Jesu den fiini bi ŋoadikaaba ke bi kua ku ñinbiagu nni, ki gaa o liiga ki baa duodi ki gedi napo yaa boanjaali, hali wan baa cabi ku niligu. 23Wan den cabi ba, o den piadi ki doni li juali po, ki ban jaandi. Ku ñiagu den bii ke o ye likani obebe. 24Ku ñinbiagu den cuoni ki bua ki pundi mi ñincianma siiga. A ñinguona den lengidi gu, kelima ku den togidi ku faagu.
25O kooton-muayuamo, Jesu den cuoni u ñingbanu po ki kpendi bi kani. 26O ŋoadikaaba n den laa ke o cuoni u ñingbanu po yeni, ti jawaandi den cuo ba. Bi den yedi: «Li tie jiingoe.» Ti jawaandi po, bi den buudi. 27Jesu den jaligi ki yedi ba: «Duani mani yi yama. Mine. Da jie mani!» 28Pieli den guani ki yedi o: «O Diedo, li yaa tie fine, teni min cuoni mi ñima po, ki cua a kani.» 29O den yedi: «Cua na!» Pieli den ñani ku ñinbiagu nni, ki cuoni u ñingbanu po ki caa Jesu po. 30Ama wan den sua ke ku faagu yabi, ti jawaandi den cuo o ke o cili ki baa mia. O den tiani ki yedi: «O Diedo, gaa nni!» 31Jesu den jaligi ki tandi o nuu ki cuo o ki yedi o: «Fini yua yaa dandanli n ki fuu, be yaa po ke a yama lengidi?» 32Bi den kua ku ñinbiagu nni ke ku faagu cuo ki sedi. 33Yaaba n den ye ku ñinbiagu nni den cua ki labini, ki kpiagi Jesu ki yedi: «A tie U Tienu Bijua moamoane!»
Jesu paagidi a yiama Jenesareti diema nni
(Mrk 6.53-56)
34Ban den duodi mi ñincianma, bi den pundi Jenesareti diema nni. 35Lankani yaa dotieba n den bandi Jesu, bi den soani bi tondiba li dobila nni, ke bi cuani o kani a yiama kuli. 36Bi den miadi o ke wan pa ba ban li sii o liadicuadi bebe. Yaaba n den sii o kuli den paagi cain.
Currently Selected:
Matie 14: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
