Levi 19

U Tienu n bua ban yaa kpiagidi o maama

1O Diedo den maadi leni Musa, ki yedi: 2«Maadi leni Isidayeli yaaba nitaanli kuli ki yedi ba: Yi baa gagidi ki yaa ŋani kelima mini Li Miali Diedo yi Tienu, gagidi ki ŋani. #Lev 11.44-45; 1Pie 1.16. 3Yuakuli n fangi o naa leni o baa, ki kubi n fuodima dana ki gagidi a. N tie Li Miali Diedo yi Tienu. #Ñam 20.8,12; Tia 5.12,16.

4Yin da lebidi ki ŋoadi tienfaama. Yin da duadi buliba leni ti kudi. N tie Li Miali Diedo yi Tienu. #Lev 26.1; Ñam 20.23; 34.17; Tia 27.15.

5Yi yaa baa cua ki padi o Diedo po mi taanyenma padili, tieni mani maama ke o baa fidi ki gaa yi po. 6Yi baa ŋmani ki padiyanga yeni yin cua ki padi ga yaa daali, bi li yaa fii ki faa. Yaala n sieni hali li dataali daali, yi baa juu la u mu nni. 7Yi yaa ŋmani la li dataali daali, li tie yaa bonla n ki dagidi. O Diedo kan gaa yi paabu. 8Yua n ŋmani yeni, o baa gaa o tudima panpaani, kelima o fali ki joagini yaa bonla n gagidi o Diedo po. Bi baa paadi ki ñani laa nilo o buolu nni.

9Yi yaa ye yi diema nni u jetaagu yogunu, yi baa ŋaa poyendu yi kuanu nni, ki da yendi lipo. Yin da yendi yaala n sieni mi liegima po. 10Ŋan da goa ki cie yaala n sieni a duven tiidi bonluonkaala nni, ki da goa ki wodi yaala n suodi ki baa. A baa ŋaa lani o luodo leni o caano po. N tie Li Miali Diedo yi Tienu. #Lev 23.22; Tia 24.19-22.

11Yin da su. Yin da pua yi lieba po faama, ki da boandi yiyaba mo. #Ñam 20.15,16; Tia 5.19,20. 12Yin da pua faama ki poli n yeli nni, kelima yi baa biidi yi Tienu yeli. N tie Li Miali Diedo. #Ñam 20.7; Tia 5.11; Mat 5.33.

13Ŋan da mabini a yieninlielo. Ŋan da su, ŋan da kubi a tuonsoanlo panpaani a kani, ke li yaa faa yo ŋan pa o. #Tia 24.14-15. 14Ŋan da soli womo, ŋan da bili bontuudikaala o juamo nintuali, ke wan tuudi ki baa. Ama a baa yaa fangi a Tienu. N tie Li Miali Diedo. #Tia 27.18.

15Ŋan da jia yaa buudi n ki tiegi, ŋan da fali nilo, ŋan da jagi ke a baa todi o luodo, bi ŋan go da jagi ke a baa todi o piado mo li bujiali nni. Ama a baa jia a yieninlielo buudi nani lan tiegi maama. #Ñam 23.6-8; Tia 16.19. 16Ŋan da tieni bu tingbangbaabu a buolu yua po. Ŋan da kuli a lielo ban kpa o fanma fanma. N tie Li Miali Diedo.

17Ŋan da nani a kpiilo a pali nni. Li pundi ŋan tundi a lielo o tudima po. Lani n tie ŋan da ti tugi tuonbiadi kelima o po. #Mat 18.15. 18Ŋan da tuu li panli. Ŋan da pia li koanfaali a buolu nilo po. Ama ŋan bua a lielo nani ŋan bua a yuli maama yeni. N tie Li Miali Diedo. #Mat 5.43; 19.19; 22.39; Mrk 12.31; Luk 10.27; Lom 13.9; Gal 5.14; Jak 2.8.

19Yin yaa kubi n ñoamabonbilikaana. Ŋan da teni yanbuolilie, yii n ki taa n do biyaba. Ŋan da coagi bonbuolilie a kuanu nni. Ŋan da yie gaalibuolilie tiayiekaagu. #Tia 22.9-11.

20Joa yaa conbi leni puotuado ke o bi pia togibaa, ama ke bi daa bi daa ki faabi o, bi baa faligi ba, ama bi kan kpa ba, kelima o pua daa den faabi. 21Ama o joa yeni baa taa petonli ki cuani li u Kadikaanu Gbandieli buliñoabu kani, o tudima po. 22O kopadiciamo baa mia o po sugili o Diedo nintuali. O baa padi o po li petonli yeni, lin tua mi tudima padili, kelima o joa yeni n tieni yaa tuonbiadi po. Yeni o joa yeni baa baa o tuonbiadi sugili.

23Yi yaa kua mi diema nni yaa yogunu, ki ŋuu lienni yaa tiidi n luoni kuli, yi baa nua yi bonluonkaala ke li naani leni yaa nilo n ki kua ku koanciagu yeni, hali binataa. Yi kan ŋmani la. 24Li binnaali wani, i tiidi yeni kuli bonluonkaala baa gagidi o Diedo pagidi po. 25Lanwani, li binmuuli yi baa ŋmani i tiidi yeni bonluonkaala, ki yaa cenli yi yi yula po. N tie Li Miali Diedo yi Tienu.

26Yin da ŋmani liba kuli leni mi soama. Yin da gedi lingima, ki da bu baagu mo. #Cil 9.4; Lev 7.26-27; 17.10-14; Tia 12.16,23; 15.23; 18.10. 27Yin da koagidi yunianu, ki da koagidi ki dagini yi langbiadi mo. 28Yin da badi yi baa i be, o tinkpilo po. Yin da tuu tuu yi gbanu po mo. N tie Li Miali Diedo. #Lev 21.5; Tia 14.1.

29Ŋan da cagini a bisalo ki teni wan tua puoconconli ki joagini o, ke mi diema n da ti joagini mi yuli ki gbie leni ti cagindi. #Tia 23.18. 30Yin yaa kubi mani n fuodima dana, ki yaa fangi n kaangagidiŋamu. N tie Li Miali Diedo. #Lev 26.2.

31Yin da lingi mi lingima, yin da ŋoadi ma, kelima laa bonla baa joagini yi. N tie Li Miali Diedo yi Tienu. #Tia 18.11; 1Sam 28.3; 2Bad 23.4; Esa 8.19. 32Nikpeyukobipiendi yaa cua, ŋan fii ki sedi ki fangi o. Ŋan jigini o jakpelo. A baa fangi a Tienu. N tie Li Miali Diedo.

33Caano yaa cua ki kali yi diema nni, yin da janbidi o. 34Yin yaa nua yaa caano n kaa yi siiga, nani u dogu maabiga yua n ye yi siiga yeni. Yin bua o nani yin bua yi yula maama, kelima yimoko den tie canbe Ejipiti diema nni. N tie Li Miali Diedo yi Tienu.#Ñam 22.20; Tia 24.17-18; 27.19.

35Yin da tieni janbi li bujiali nni, bi u foaginu yaa bonbiigikaala nni, bi u kpiagu yaa bonbiigikaala nni, bi u yabinu yaa bonbiigikaala nni.#Tia 25.13-16; Kpa 20.10; Esk 45.10. 36Yin yaa kubi mani u kpiagu bonbiigikaala yaala n tiegi, efa yua n tiegi, hini yua n tiegi. N tie Li Miali Diedo yi Tienu yua n den ñani yi Ejipiti diema nni.

37Yin yaa kubi mani n bali maama leni n ñoamabonbilikaana kuli, ki go tieni likuli bonŋanla. N tie Li Miali Diedo.»

Currently Selected:

Levi 19: BGP

Highlight

Copy

Compare