Joeli 2
2
O Diedo pabienli daali pundi
1Piebi mani li naatuntunli Siyon juali po,
Teni mani ban gbadi li moe n joagagidikaali po.
Mi diema yaaba kuli n digibi,
Kelima o Diedo daali kpendi,
Li daali yeni nagini.
2Laa daali tie biigicianli daali,
A tawala leni ku gbangbadigu daali.
Li daali yeni kpendi nani mi yendanma
N yendi a juana maama yeni.
Diidi yaa nibuolu n tie ne n yabi
Ki go pia u paalu maama.
U buolu daa kpa tieni,
U kan go tieni mo ba yaa nifiima n baa ŋoadi siiga.
3U nibuolu yeni liiga tie nani yaa mu n buondi,
U puoli mo nani yaa mupienu n juugi yeni.
Hali ke u daa tagini,
Mi diema den tie nani Edeni koaŋamu yene.
U yaa tagini ki ban pendi,
U yen ŋaa u puoli po,
Fanpienma yaama yaa noanlima n gundi.
Liba ki cia u kani.
4U nibuolu yeni tie nani i taami,
Ki tiini nani bi tanjagiba yeni.
5U fuugu tie nani yaa toateliti n tiini a juana yula po,
Ki tie nani u mu n yen sia ku muagu
Ki yaa pudi maama yeni,
Ki tie nani yaa toagoli n pia u paalu,
Ki bogindi bu toabu po. #Doa 9.7-9.
6Bi yaa nagidi i nibuoli yen digibi,
Mu nunmu kuli yen gbidi.
7Bi tiini nani a jakoanda yeni,
Bi do i bilini nani bi toatieba yeni,
Yuakuli kubi o sanu, oba kuli kan jadi ki ŋaa u.
8Baa pangi biyaba,
Yuakuli kubi o sanu.
Bi yen jaligi ki pendi yaala n pangi ba,
Puu kuli kan fidi ki sieni ba bi cenli nni.
9Bi yadi u dogu nni,
Ki tiini i bilini po,
Ki do ti diedi,
Ki koa a diebona kani nani a suuda yeni.
10Bi yaa nagidi ki tinga yen digibi,
Tanpoli mo n begibi,
U yienu leni o ŋmaalo n biigi,
A ŋmabila yenma mo n bodi. #Doa 8.12.
11O Diedo ye o toagoli liiga ki kpaani,
O toacaga mo yabi hali boncianla.
Yua n baa tieni wan yedi yaala,
Pia u paalu.
O Diedo daali tie dacianli,
Ki go pia i jeje hali boncianla.
Ŋme n baa tuo ki sedi landaali? #Doa 6.17.
U Tienu bua mi yanlebidima
12Moala o Diedo go yedi:
‹Lebidi mani ki cua n kani leni yi pala kuli.
Loli mani bu ñoabu, buudi mani li paboanli moe.
13Da padi mani yi tiayiekaadi bebe ka,
Se yin lebidi yi yama.›
Lebidi mani ki cua o Diedo yi Tienu kani,
Kelima o juogidi yi ki gba yi po mi ninñima.
O pali ki be tontoni ki go pia li ŋanbili mo.
O yen lebidi ki ŋaa wan bi jagi yaa bonbiadila.
14Ŋme n bani o yaa kan guani ki lebidi o yantiali,
Ki seligi yi bonŋanla.
Yeni, yi baa fidi ki yaa kpendinni
O Diedo yi Tienu po bu paabu leni a ñincaba.
Mi ñoalolima leni i jaandi yogunu
15Piebi mani li naatuntunli Siyon nni,
Bili mani u yogunu mi ñoalolima po,
Ki tieni li taancianli.
16Taani mani bi niba,
Ki tieni taangagidikaali,
Taani mani a nikpela,
Taani mani a bila,
Ba yaa bila n da ŋaani.
O puocaano calo n ña o dieduadili nni,
O puocaano mo n ña o gbandieli nni.
17O Diedo naacenba bi kopadicianba,
N sedi li janli leni li padibinbinli siiga ki buudi,
Ki yedi: ‹O Diedo, faabi a niba.
Ŋan da cedi a niba n le i fe.
Ŋan da tuo i nibuoli n yaa laa ti ki tua:
Bi Tienu nan ye le?›
U Tienu n niani o niba yaala
18O Diedo bua o diema,
O gbadi o niba po mi ninñima.
19O guani ba ki yedi:
‹N go baa soani yi po ŋalikama, duvenpaano leni mi kpama.
Yi baa baa likuli hali lan dagidi.
N kan go cedi yin le i fe i nilanbuoli siiga.
20N baa deli ki foagidi nujienu po yibali leni yi.
N baa deli ki bolini o
Mu tinkuonmu nni leni a tinwaga nni.
O toatieba yaaba n ye liiga, n baa deli
Ki jiini ba puoli ñincianma nni.
Yaaba n ye puoli mo,
N baa deli ki jiini ba nintuali ñincianma nni.
Bi tinkpila nuulu baa gbieni mi fawaama.
Bani yaaba n tieni yi
Mi biadima boncianla juodima n yeni.
21Fini ki tinga ŋan da jie liba,
Mangi a pali hali boncianla,
Kelima o Diedo n tieni a po yaala kuli po.
22Yinba ti moayandi yin da jie,
Kelima a yankpaafuana baa bundi,
I tiidi baa luoni i bonluonkaala.
Bu kankanbu leni duven tibu baa luoni boncianla.
23Yinba Siyon yaaba mo, yin mangi yi pala
Kelima o Diedo yi Tienu po.
O baa pa yi ki taaga ki yogunu yaa pundi,
O baa pa yi ki takpiaga leni ki tajuodikaaga
Nani wan den tiendi maama u yogu nni yeni.
24I jali baa gbie leni ŋalikama,
Ti tadiciandi baa gbie leni o duvenpaano leni mi kpama.
25N baa lebidi yi po yaa bina
Ke n den soani mu tobiñaanmu#2.25 Diidi Joeli 1.4. yaamu n daa pudi fiabi,
A dondoba, a tobiñaana,
I naaci leni a sidibila,
Ke bi ŋmani ti kpaandi yeni.
26Yi baa je ki guo,
Ki pagi mini o Diedo yi Tienu,
Yua n tieni yi po li bonlidinkaala.
N niba mo kan go le fe abada.
27Yeni, yi baa bandi ke n ye yinba Isidayeli yaaba siiga.
Yi baa bandi ke mini n tie Li Miali Diedo yi Tienu,
Ke toa ki ye.
N niba mo kan go le fe abada.›
Currently Selected:
Joeli 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
