Ose 12
12
Efrayimi faama
1U Tienu yedi:
«Efrayimi buolu gaani ki lindi nni leni mi faama,
Bani Isidayeli yaaba gaani ki lindi nni leni i janbi.
Ama Juda diema yaaba wani da tuo
Ki ŋua wani U Tienu yua n Gagidi ki ŋani.
2Efrayimi buolu ŋua ki deli u faalu,
Bi tiini ki ŋua puoli faalu,
Daali kuli, bi pugidi mi faama leni ki mabinga,
Bi danli leni Asiiri yaaba,
Ki nan tugi bi kpama ki ban kuadi Ejipiti po.»
3O Diedo baa bu leni Juda diema yaaba moko,
O baa waani Jakob buolu fala,
Kelima bi bontienkaala po.
O baa guani ba bi panpaani,
Nani bi tuona n tie maama.
4Bi yaaja Jakob den cuo o kpelo taajentindili,
Hali ke bi daa ye bi naa tugu nni.
Wan den beni ki dagidi joa mo,
O den moani leni U Tienu.#Cil 32.25-26.
5O den moani leni maleki ki paadi o.
Li yaa puoli Jakob den mua ki mia o ke wan seligi o.
O Diedo den doagidi Jakob kani Beteli po,
Lankane ke U Tienu maadi leni ti. #Cil 28.10-22.
6Lankane ke Tanpoli leni ki tinga Tienu,
Ban yi yua o Diedo yedi:
7«Lebidi ki guani mani mini yi Tienu kani,
Ki yaa kubi mi buama leni mi teginma.
Ki yaa dugi mini yi Tienu po yogunu kuli.»
8Isidayeli yaaba, yi kubi yi nuu nni
Yaa bonbiigikaala n ki tiegi,
Nani Kanana#12.8 Nekanba Kanana bua ki yedi kpenkpenda. Lanwani li bua ki yedi: “Yi bua i janbi nani a kpenkpenda yeni.” yaaba yeni,
Yi pala mani i janbi po.
9Yi tua: «Moamoani, ti tua piada,
Ki pia mi piama boncianla.
Ama likuli tie ti duoli n cuani yaale.
Bi kan le tagiliba kuli ti kani.»
10Hali yin den ye Ejipiti nni,
N tie Li Miali Diedo, yi Tienu.
N didi go baa teni yin yaa ye yi gbandiena nni,
Nani yi jaanma yogunu yeni. #Lev 23.42-43.
11N den soani n saawalipuaba,
Ki puni ba li bonlekaala boncianla,
Ki go teni ke bi pua yi mi kpanjama.
12Ama Galaadi yaaba puni bi yula i buli ŋoadima po.
Lani n teni ke bi baa bodi.
Giligali yaaba moko padi a naatona i buli po,
Lani yaa po, n baa teni bi padibinbina
N tua tankoga i kuani nni.
13Jakob den sani ki gedi Arami diema nni,
O den ban kua li tuonli, kelima o pua po.
O den kpaa ti yandi, kelima o pua po. #Cil 29.1-20.
14O Diedo den soani o saawalipualo,
Ke o ban faabi Isidayeli yaaba Ejipiti po,
O go den teni ke o saawalipualo yeni n gobidi ba. #Ñam 12.50-51.
15Ama Efrayimi buolu den fiini
U Tienu pali hali boncianla,
Wani, bi Diedo baa tuni ba, ban wuli
Yaa nimiana soama panpaani.
O baa teni ke ban waani o yeli yaa fe
N guani ki baa bi yula po.
Currently Selected:
Ose 12: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
