Hebilunba 5
5
1Kopadicianba yudaano kuli tie ban gandi yua bi niba siiga, ki dini o ke o tuuni U Tienu tuonli bi niba po, ki padi U Tienu po yaa pada n tie bu paabu leni ya n tie ti tuonbiadi po. 2O fidi ki juuni leni bi yanboandanba leni bi niyaadikaaba, kelima wani o ba yen pia ku tadingu yogunu kuli. 3O tadingu yeni yaa po, li tie tiladi wan yaa padi a pada wani o ba tuonbiadi po, nani wan padi bi niba kuli po maama.#Lev 9.7.
4Oba kuli kan gaa o yuli po laa jigidi, kali U Tienu n yini yua nani wan den yini Alono maama. #Ñam 28.1. 5Yeni, Kilisiti moko ki den gaa o yuli po kpiagidi leni wan tua bi kopadicianba bado yeni. Ama li tie yua n den yedi o:
«A tie n Bijua,
Mini n mali a dinla.»#Ps 2.7.
6O go yedi kaanto:
«A tie kopadiciamo hali yaa yogunu kuli,
Nani Melikisedeki yeni.»#Ps 110.4.
7Wani, wan den tie nisaalo ki ye o gbanandi nni yaa yogunu, o den miadi U Tienu yua n baa fidi ki faabi o leni mi kuuma, i tantani leni ti nunsiidi nni. U Tienu den gbadi o miabu, kelima o den fangi wani U Tienu. #Mat 26.36-46; Mrk 14.32-42; Luk 22.39-46. 8Ba ke o tie U Tienu Bijua, o den bandi mi tuoma U Tienu po n tie yaala, kelima wan laa yaa fala po. 9Wan den teni ke o ŋani ki dagidi cain yeni, o den tua yua n cuani yaa tindima n ki pia gbenma, yaaba n tuo ki ŋua o kuli po. 10U Tienu dini wane ke o tie bi kopadicianba bado, nani Melikisedeki yeni.
Fangi mani yi yula ki da ti ŋaa li dandanli
11Ti pia mi maama boncianla ki bua ki maadi laa bonla po. Ama li bundima pa, kelima yi tie yaaba n kaa gaani maama tontoni. 12Moala li bi pundi ke yinbe n yaa tie bi bangikaaba. Ama yi go baa ki bua ban yaa bangi yi mi bangicilikaama, U Tienu maama bangima siiga. Yi tua nani yaaba n da baa ki ñu mi naaŋanma bebe, ki kan fidi ki gaa yaa jiema n juagi yeni. #1Kor 3.2. 13Yua n da ñu mi naaŋanma bebe daa bandi ki gagidi yaala n tiegi leni yaala n ki tiegi, kelima o da tie canpandiga. 14Ama yaa jiema n juagi tie yaaba n kpedi ki dagidi yaa po yo. Bani n tie yaaba n pia yaa yantiali n maani ki biigidi, ki gagidi yaala n ŋani leni yaala n bia.
Currently Selected:
Hebilunba 5: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
