Hebilunba 4
4
1Lanwani, hali ke U Tienu n den niani yaa ñoanianu o fuodima nni kuama po da baa ki ye, tin fangi mani ti yula, ke yi siiga ba niyendo n da ti sua ke li pendi. 2Bi den waani ti U Tienu maama nani bani yeni. Ama ban den gbadi yaa maama yeni naa den todi ba liba, kelima baa den gaa ma leni dandanli. 3Tinba yaaba n daani yaa po, ti kua laa fuodima nni, wan yedi yaama yaa po:
«N poli n pabienli nni ki yedi:
‹Bi kan kua n fuodima nni abada.› »#Ps 95.11.
O den yedi yeni ba ke o tuona kuli den soani ki gbeni, hali ŋanduna tagima yogunu. 4Kaanuba o maadi li daleleeli maama ki yedi: «U Tienu den fuodi leni o tuona kuli li daleleeli.» #Cil 2.2. 5Lani, li go yedi: «Bi kan kua n fuodima nni abada.» #Ps 95.11. 6Yaaba n den kpa gbadi U Tienu maama yeni ki den kua mi niinni, kelima bi dandanluoma po. Ama u sanu da ye nitianba po, ban kua laa fuodima nni. 7Lani yaa po, U Tienu go bili datoali, ki yi li: «Dinla.» Li waagi ke o den ti maadi li maama Davidi ñoabu nni, nani lan kpa yedi maama:#4.7 Diidi Hebilunba 3.15.
«Dinla, yi yaa gbadi o nialu,
Yin da juagi yi pala.» #Ps 95.7-8.
8Li yaa tie ke Josue den puni ba mi fuodima, U Tienu kan go den yuandi ki maadi datoali maama. #Tia 31.7; Jos 22.4. 9Lanwani, U Tienu fuodima daali yaa fuodima baa ki bili U Tienu niba po. 10Yua n kua U Tienu yaa fuodima nni, fuodi leni o tuona nani U Tienu n den fuodi leni o ya maama. #Cil 2.2. 11Lanwani, tin moandi mani hali bonŋanla ki kua laa fuodima nni, ke ti siiga niloba kuli n da ti yaa pia mi yiema, ki gbali mi kuama nani bani yeni.
12U Tienu maama fo ki tuuni leni u paalu. Mi mani ki cie jugisieñoaliedi, ki muu, ki paadi o naano leni li yantiali, ki go paadi a tuga leni o lonlogo. Mi biigidi o nilo yanmaalima leni o jaga. 13Tagimiba kuli ki wuo U Tienu nuni po, likuli ye mubima ki doagidi cain o nuni po, tin baa togidi wani yua ti tuona kuli.
Jesu Kilisiti n tie bi kopadicianba bado
4.14—10.39
Jesu cie bi kopadicianba yudanba
14Lani yaa po, ti pia bi kopadicianba bado, yua n den kua tanpoli po, lani n tie Jesu U Tienu Bijua. Lani yaa po, tin yaa se bonŋanla tin tiendi siedi yaa dandanli po nni. 15Tii pia yaa kopadicianba bado n kan fidi ki gbadi ti ninñima ti tadingu nni ka. Bi den tulini o li bonla kuli nni nani tinba, ama waa den tieni tuonbiadi. 16Lanwani, tin yaa nagidi leni li papaali U Tienu bali kalikaanu, li ŋanbili n ye naankani. Lankani ti baa baa mi ninñingbadima, li ŋanbili leni mi todima, lan bua yaa yogunu.
Currently Selected:
Hebilunba 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
