Age 2
2
U Tienu diepangu n baa yaa ŋani maama
1Dariyusi bali binlieli, cilele piilie n dayenli daali, o Diedo go den maadi leni o saawalipualo Age ki soani o. 2O den soani o ke wan yedi Salitieli bijua, Sorobabeli leni Yehotisadaki bijua, bi kopadicianba bado Josue leni yaa niba n sieni kuli yaa maama n tie ne:
3«Naani yi siiga pia yua n go tiani
Hali kpiama ku naa diegu n den ŋani maama?
Moala yi nua ke n diegu tie lede?
Yii nua ku nani ke kuu pia fuomiba te? #Esd 3.12.
4Li tie lani yaa po ke mini, U Tienu yedi Sorobabeli leni Yehotisadaki bijua bi kopadicianba bado Josue leni yaa niba n sieni kuli ke ban paagi bi pala. Li Miali Diedo yedi:
‹Fii mani ki cili ki yaa tuuni,
Kelima n baa yaa ye leni yi,
Mini o Diedo U Paaciamu Kuli Daano n yedi yeni.
5Yin den ñani Ejipiti,
N den niani yi ke n baa yaa ye leni yi yogunu kuli.
Lanwani, yin da jie liba kuli, kelima n Fuoma ye leni yi. #Ñam 29.45-46.
6Li Miali Diedo U Paaciamu Kuli Daano yedi mine:
Li sieni waamu, n baa teni tanpoli leni ki tinga n digibi,
Ki teni ke mi ñincianma leni ki tinga n digibi. #Heb 12.26.
7N baa guli i nilanbuoli,
Ki teni ban tugi bi piama kuli ki cuani ne,
Ke n Diegu n gbie leni ŋalimani.
Li Miali Diedo U Paaciamu Kuli Daano n yedi yeni.
8Mini n die ŋanduna ŋanjilifa leni o wula,
Li Miali Diedo U Paaciamu Kuli Daano n yedi yeni.
9Ku dieyuangu na yaa ŋamu baa cie ku bonkpiagu.
Mini, Li Miali Diedo U Paaciamu Kuli Daano n yedi yeni.
N baa pa yi laa kaanu nni mi yanduanma.
Li Miali Diedo U Paaciamu Kuli Daano n yedi yeni.› »
U Tienu baa seligi yaaba n tuo o maama
2.10-23
Isidayeli yaaba joagini U Tienu po
10Dariyusi bali binlieli, ciyia piilie n danaali, o Diedo go den maadi leni o saawalipualo Age. 11Li Miali Diedo den yedi o: «Buali bi kopadicianba yaa bualu n tie ne, ban guani a po: 12‹O nilo yaa gbiabi o tiayiekaagu nni U Tienu diegu nni padinangu, o tiayiekaagu yeni yaa sii dupen, bi kpintiidi, bi duven, bi kpama, yaa ka jiemiba, naani laa jiema baa tua yaama n gagidi U Tienu po?› » Bi kopadicianba den guani Age bualu ki yedi: «Aa-a!»
13Age go den buali ba: «Li yaa tie ke nilo sii kpiemo ki joagini o yuli, li yaa puoli, ki sii jiemiba, naani laa jiema baa yaa joagini?» Bi kopadicianba den guani o ki yedi: «Mi jiema yeni baa yaa joagini.» #Coa 19.11-22.
14Lani, Age den guani ki yedi:
«O Diedo yedi ke mi naa diema niba
Leni ban tuuni ki baadi yaala kuli tie n po yene.
Ban padi n po yaa pada joagini.»
U Tienu niani o seli
15O Diedo go yedi: «Moala yin yaa kpaagi,
Yaala n baa tieni dinla leni yaa yogunu n kpendi.
Hali yin daa den cili n dieli maama,
16Nilo yaa den gedi ki baa n ñani o buabuali nni
Ŋalikama baabuodi piilie,
O yen sua ke baabuodi piiga bebe n ye.
Nilo yaa den gedi duven datuodikaanu,
Ki baa n ñani taditi piimuu,
O yen sua taditi piilie bebe n ye.
17N den teni ke yi kuani faani,
A baayuana den kua yi,
A tatana moko den baa ki biidi yi bonluonkaala.
Ama leni lani kuli,
Yii lebidi yi yama ki guani n kani.
O Diedo n yedi yeni.
18Dinla tie ciyia piilie n danaali,
Yin puu n dieli tanpuuli yaa daali.
Yin kpaagi yaala n baa tieni dinla leni yaa yogunu n kpendi.
Kpaagi mani lipo ki le.
19Naani ŋalikama go sieni a buabuana nni?
Ba duven tiidi, i kankandi,
Grenadi tiidi
Leni olivie tiidi naa loni liba kuli.
Ama, ki cili dinla ki ŋoadi yaa yogunu n kpendi, n baa seligi yi.»
U Tienu n niani Sorobabeli yaa ñoaniani
20Ciyia piilie n danaali yeni, o Diedo go den maadi leni Age miliema. 21O den yedi o, ke wan yedi Juda guveneeri Sorobabeli:
«N baa teni tanpoli leni ki tinga n digibi.
22N baa guli bi badiba, ki bolini
I nilanbuoli diema paalu.
N baa tudi ki lu ti toateliti leni yaaba n jagi ti po,
I taami n kpe,
Bi tanjagiba mo n kpa biyaba leni mu jugisiemu.
23Landaali, n baa taa fini Salitieli bijua,
Sorobabeli, n naacemo,
Ki teni ŋan tua n maalima,
Kelima fini n tie min gandi yua.
Li Miali Diedo U Paaciamu Kuli Daano n yedi yeni.»
Currently Selected:
Age 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
