Age 1

O Diedo puogi ban guani ki maa o diegu

1.1—2.9

U Tienu diegu guamaama yogunu pundi

1Dariyusi bali binlieli, ciluoba dakpiali daali, o Diedo den maadi leni o saawalipualo Age. O den soani o Juda guveneeri Salitieli bijua, Sorobabeli kani leni bi kopadicianba bado Yehotisadaki bijua Josue kani, ke wan yedi ba,#Esd 4.24—5.2; 6.14. 2ke wani Li Miali Diedo U Paaciamu Kuli Daano yedi yaa maama n tie ne: «Yaa nibuolu n tie ne tua ke ban baa guani ki maa o Diedo diegu yaa yogunu daa pundi.» 3Lani yaa po, o Diedo den soani o saawalipualo Age bi kani ki yedi yaa maama n tie ne:

4«Naani yi sua ke li dagidi yin yaa ye

Yaa dieŋama n pia mi ñuadima nni,

Ke n yaa Diegu nan mudi mudi ki se diejengu?

5Moala Li Miali Diedo U Paaciamu Kuli Daano

Yedi yaa maama n tie ne:

‹Kpaagi mani yaa yema n baa yi ne po.

6Yi buu boncianla, ama yi yendi waamu.

Yi di, ama yi naa guodi.

Yi ñu, ama yi ñuñuunu naa gbendi.

Yi bobi ti tiadi, ama yi wadi naa gbendi.

Yua n tuuni ki gaani i panpaani

Li tie nani o ŋu yaa boagili n cibi nni yene.

7Li Miali Diedo U Paaciamu Kuli Daano go yedi yi,

Ke yin kpaagi yaala n baa yi ne po.

8Do mani a juana po ki ban pedi ti daadi,

Ki tugi ki cuani, ki maa n diegu.

Lani, n pali baa yaa mani,

Min waani yi n kpiagidi.

Mini o Diedo n yedi yeni.

9Yi den daani ke yi baa baa

Ti kpaandi boncianla,

Ama yi baa waamu bebe.

Yin tugi lani mo ki kuni nni yi denpo,

N piebi ke limo yadi yadi.

Be yaa po ke n tieni laa bonla?

Li tie ke n Diegu mudi mudi ki se diejengu,

Ke yi siiga yuakuli nan moandi ki ŋanbidi o dieceli.

Li Miali Diedo U Paaciamu Kuli Daano n yedi yeni.

10Li tie lani yaa po yo ke taaga ki mini,

Ke liba mo kuli ki pudi.

11N teni ke u yialu cua mi diema nni,

Ke a juana yula po, i kuani,

Duven tiidi,

Olivie tiidi leni yaa bonbulikaala n sieni kuli kuodi.

Bi niba leni ti yandi laa fala lipo,

Kelima yin duoli ki baa yaala kuli bia fanma.› »

Isidayeli yaaba tuo ki ŋoadi o Diedo maama

12Salitieli bijua Sorobabeli leni Yehotisadaki bijua, bi kopadicianba bado Josue leni yaa niba n sieni kuli den tuo ki ŋoadi o Diedo, bi Tienu maama. Bi den tuo ki ŋoadi ma nani o Diedo bi Tienu n den soani o saawalipualo Age ke o cua ki caa ba maama. Li fangili den cuo ku niligu kuli o Diedo nintuali. 13Li yaa puoli, U Tienu tondo Age den caa ba o Diedo tondu, yuu n tie ne: «N baa yaa ye leni yi, mini o Diedo n yedi yeni.»

14O Diedo den libidi Juda guveneeri Sorobabeli leni bi kopadicianba bado Josue leni yaa niba n sieni kuli yama, ki paagi bi pala o diegu maama po. Bi den fii ki cili ki maa Li Miali Diedo U Paaciamu Kuli Daano diegu, 15Dariyusi bali binlieli, ciluoba piilie n danaali daali.

Currently Selected:

Age 1: BGP

Highlight

Copy

Compare