Mi Ñama 7

1O Diedo den yedi Musa: «Diidi, n baa teni ŋan tua nani U Tienu yene Faraon po. A kpelo Alono, o baa yaa tie a saawalipualo. 2Fini, a baa yedi min teni a yaa ñoamabonli kuli, ke a kpelo Alono mo baa soagini Faraon wan cedi Isidayeli yaaba n ña o diema nni. 3Mini, n baa teni Faraon pali n juagi, n baa pugini n sinankeeninba leni mi bancianma Ejipiti diema nni.#JTT 7.36. 4Faraon kan cengi yi maama. N baa maani n nuu Ejipiti po. N baa teni ke n toagola, ya n tie n niba Isidayeli yaaba yeni n ña Ejipiti diema nni leni u paalu. 5Ejipiti yaaba baa bandi ke n tie Li Miali Diedo, min baa waani ba fala yaa yogunu, ki teni Isidayeli yaaba n ña bi siiga.»

6Musa leni Alono den tieni li bonla kuli nani o Diedo n den puogi ba maama. 7Musa den pia bina piinii ke Alono mo pia piinii n binataa, ban den maadi leni Faraon yaa yogunu.

Faraon naa cengi Musa leni Alono maama

8O Diedo den yedi Musa leni Alono: 9«Li yaa tie ke Faraon maadi leni yi ki yedi: ‹Tieni n po mi bancianma,› ŋan yedi Alono: ‹Taa a gbiamu ki lu u Faraon nintuali.› U baa tua wa.»

10Musa leni Alono den gedi Faraon kani, ki tieni nani o Diedo n den yedi ba maama. Alono den luni o gbiamu Faraon leni o naacenba nintuali, ke u tua wa. 11Ama Faraon den yini bi yanfuodanba, a lingida leni Ejipiti ñoagidanba, bani moko den tieni laa bancianma leni bi ñoagi. 12Bikuli den luni bi gbiami ke yi tua we. Ama Alono yaa gbiamu den nali bi yaa gbiami. 13Faraon pali den juagi, ke waa den cengi Musa leni Alono ba waamu, nani o Diedo n den yedi maama.

O falakpialo: Mi ñima kpandi ki tua soama

14O Diedo den yedi Musa: «Faraon pia yaa pali n juagi ki yie ke o kan tuo n niba n gedi. 15Li yaa fii ki faa ku tiŋaagu, ŋan gedi Faraon kani, wan ñani ki caa mi ñima po yaa yogunu. Ŋan sedi ki guudi o u kpenciamu boanjaali kani. Ŋan taa a nuu nni, min den teni ke yaa gbiamu n lebidi ki tua wa yeni, 16ki yedi Faraon: ‹Li Miali Diedo, Hebilu yaaba Tienu n soani nni a kani. O yedi ke ŋan cedi o niba n gedi ki ban kpiagi o mi fanpienma nni. Hali moala, a naa cengi. 17Li Miali Diedo maadi a yaa maama n tie ne: Line n baa teni ŋan bandi ke n tie o Diedo. N baa pua u kpenciamu ñima leni yaa gbiamu n ye n nuu nni, mikuli baa kpandi soama.#Doa 16.4. 18Yaa jami n ye u kpenciamu nni baa kpe, u kpenciamu mo baa nuugi ki biidi. Ejipiti yaaba baa biigi ke bi baa ño u kpenciamu ñima ki gbali.› »

19O Diedo den yedi Musa: «Yedi Alono ke wan taa o gbiamu ki tandi o nuu Ejipiti yaaba ñima po, bi kpeni, bi fuani, bi boandi leni ban baadi mi ñima naani kuli po. Mi ñima kuli baa kpandi soama. Mi soama baa yaa ye Ejipiti diema nni kuli, ba yaa cuana n tie daadi leni yaa cuana n tie tandi kuli nni.» 20Musa leni Alono den tieni o Diedo n teni ba yaa ñoamabonli. Alono den yugidi u gbiamu ki pua yaa ñima n ye u kpenciamu nni Faraon leni o naacenba nintuali. U kpenciamu ñima kuli den kpandi soama. 21Yaa jami n den ye u kpenciamu kuli nni den bodi. U kpenciamu den biidi ki nuugi. Ejipiti yaaba naa go den fidi ki ñu u kpenciamu ñima. Mi soama den ye Ejipiti diema nni kuli. 22Ama Ejipiti ñoagidanba moko den tieni yeni leni bi ñoagi. Faraon pali den juagi ke waa den cengi Musa leni Alono maama, nani o Diedo n den yedi maama. 23Faraon den lebidi ki kuni badidiegu ki naa yini la ba bonla moko. 24Ejipiti yaaba kuli den gbiidi u kpenciamu kunu, ki lingi mi ñinñokaama, kelima baa den fidi ki ñu u kpenciamu ñima. 25O Diedo n den pua u kpenciamu ke danalele pendi yo, ke laa bonla den tieni.

O falalielo: A loanda

26O Diedo den yedi Musa: «Gedi Faraon kani ki yedi o: Li Miali Diedo yedi mi naa maama: Cedi n niba n gedi ki ban kpiagi nni. 27A yaa yie ke a kan ŋaa ba ban gedi, n baa teni a loanda n cua ki gbieni a diema kuli. 28U kpenciamu baa gbie leni a loanda. Bi baa do ki kua a diegu nni, a dieduadili nni leni a duanu po. Bi baa kua a naacenba diena nni, a niba diena nni, bi fani nni leni bi saajetiadi nni. 29A loanda baa do a po, a niba po leni a naacenba kuli po.»

Currently Selected:

Mi Ñama 7: BGP

Highlight

Copy

Compare