Mi Ñama 10
10
O falaniilo: A dondoba
1O Diedo den yedi Musa: «Gedi Faraon kani, kelima mini n den teni ke o pali juagi, ke o naacenba moko yaa pala juagi, kelima n den bua ki teni n sinankeeninba n doagidi bi siiga. 2Li tie ke n go bua ke amoko n faa ki togidi a bijua leni a yaabili, min den tieni Ejipiti yaaba yaala leni min den doagidi bi siiga yaa sinankeeninba. Yeni, yi baa bandi ke n tie Li Miali Diedo.» 3Musa leni Alono den gedi Faraon kani ki yedi o: «Li Miali Diedo, Hebilu yaaba Tienu yedi: A baa yaa yiedi ke a kan miini a yuli n nintuali ki pundi u laa yogune? Cedi n niba n gedi ki kpiagi nni. 4A yaa yie ke n niba kan gedi, n baa teni a dondoba n cua saala ki yadi a diema nni kuli. 5Bi baa ŋoagini u tingbanu kuli, hali ke o nilo kan go le tinga. Bi baa ŋmani yaala n sieni kuli, a tatana n den ŋaa yi po yaala. Bi baa ŋmani yaa tiidi n pudi yi kuani kuli nni. 6Bi baa gbieni a diedi, ki gbieni a naacenba yaa diedi leni Ejipiti yaaba kuli diedi. Hali a baanba leni a yaajanba n mali, ki taa ki pundi hali dinla, bi daa kpa laa laa bonla buolu.» Musa den ñani Faraon kani ki ban caa.
7Faraon naacenba den yedi o: «O naa joa baa yaa tie ti po nani ku diagu ki pundi hali u laa yogune? Cedi laa niba n gedi ki kpiagi Li Miali Diedo, bi Tienu. Ŋaa nua ke Ejipiti diema baa bodi?»
8Bi den teni ke Musa leni Alono guani Faraon kani. O den yedi ba: «Gedi mani ki kpiagi Li Miali Diedo yi Tienu. Ŋmenba n tie yaaba n baa gedi?» 9Musa den guani ki yedi: «Ti baa gedi leni ti nikpela, ti bila, ti bijaba leni ti bisiaba kuli. Ti go baa taa ti pe leni ti ne, kelima li tie ti po yaa badu n baa kpiagi o Diedo.» 10Faraon den yedi: «To, n baa cedi yin gedi yinba leni yi bila. Li Miali Diedo n yaa ye leni yi. Die yin nan bandi ke yi lingi yaala n bia yi yula po. 11O den pugini ki yedi ba, yeni ka! Yinba bi jaba bebe n gedi ki ban kpiagi Li Miali Diedo, kelima yin den mia yaala kuli n yeni.» Bi den deli ba Faraon nintuali.
12O Diedo den yedi Musa: «Tandi a nuu Ejipiti diema po, ke a dondoba n cua ki yadi Ejipiti diema nni kuli. Ban ŋmani yaala n pudi ki tinga nni kuli, a tatana n den ŋaa yaala kuli.» 13Musa den tandi o gbiamu yeni Ejipiti diema po. O Diedo den teni ke ku tafaagu ñani puoli po, ki figi mi diema po landaali leni laa ñiagu kuli. Ku tafaagu yeni den cuani a dondoba ke li daa faa. 14A dondoba den yadi Ejipiti diema nni kuli, ki baa Ejipiti tinfanma kuli nni. Bi den yabi hali boncianla, ke bi daa den kpa laa laa bonla buolu, ki kan go le mo abada. 15Bi den ŋoagini u tingbanu kuli, ki tinga den biigi kelima bi po. Bi den ŋmani ki tinga bonpudikaala leni i tiidi bonluonkaala kuli, a tatana n den ŋaa yaala. Ejipiti diema nni kuli, bonsoangiliba naa den sieni i tiidi po, ki bagi i kuani nni.#Doa 9.2-3.
16Faraon den yini Musa leni Alono tontoni ki yedi ba: «N tieni ti tuonbiadi Li Miali Diedo yi Tienu po leni yinba yi ba po. 17Moala, ŋan tieni n tuonbiadi po sugili, n kan go lieni la. Mia Li Miali Diedo yi Tienu n po sugili. Mia o ke wan gbeni n po, o naa falaciamo yua kpendinni mi kuuma.» 18Musa den ñani Faraon kani ki jaandi o Diedo. 19O Diedo den teni ke ku tafaaciangu ñani nintuali po, ki taa a dondoba kuli ki gedini ki luni ba mi Ñincianmoanma nni. Ba dondobiyenli naa den sieni Ejipiti diema nni. 20Ama o Diedo go den teni ke Faraon pali juagi ke o yie ke Isidayeli yaaba kan gedi.
O falayialo: Li biigili
21O Diedo den yedi Musa: «Yugidi a nuu tanpoli, ke li biigili n yaa ye Ejipiti diema nni hali ke nilo n fidi ki sii li.» 22Musa den yugidi o nuu tanpoli, ke yaa biigili n kpiagi boncianla den ye Ejipiti diema nni kuli, hali damunataa.#Ps 105.28; Doa 16.10. 23Oba naa den nua oyua, oba kuli naa den fidi ki fii o kaanu, hali laa dataada kuli. Ama mi yenma den ye Isidayeli yaaba n den ye yaa kaani kuli nni.
24Faraon den yini Musa ki yedi: «Gedi mani ki ban kpiagi Li Miali Diedo. Yi pe leni i ne bebe n baa sieni, yi bila baa fidi ki yegi leni yi.» 25Musa den guani ki yedi o: «A baa teni ti fini a ba, tin baa kubi yaala ki padi a pada leni a padijuukaana, tin baa pa yaala o Diedo ti Tienu po. 26Ti yangola kuli baa yegi leni ti. Li kan sieni ba taawogiyenli, kelima ti baa ñani ŋani yaa siige, ki pa o Diedo ti Tienu. Ti yàá pundi likani, ti kan bandi tin baa gandi yaala ki pa o Diedo.»
27O Diedo go den teni ke Faraon pali juagi ke o naa den tuo ban gedi. 28Faraon den yedi Musa: «Ña n kani, fangi a yuli ki da go cua n kani, kelima a yaa go cua n nintuali yaa daali, a baa kpe.» 29Musa den guani ki yedi o: «To, fini n yedi la, n kan go cua a kani.»
Currently Selected:
Mi Ñama 10: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
