Kolosi 3
3
Li miapanli Kilisiti nni
3—4
1Lanwani, yi yaa den fii leni Kilisiti bi tinkpiba siiga, yaa lingi mani yaa bonla n ye tanpoli po, Kilisiti n kaa naankani U Tienu jienu po. #Ps 110.1. 2Yaa kuandi mani yi yama tanpoli bonla nni, ki da kuandi yi yama ŋanduna yaa bonla nni. 3Yi kpe, ke yi miana mo wuo leni Kilisiti U Tienu kani. 4Kilisiti, yua n tie yi miana, yaa go cua ki doagidi o yuli yaa yogunu, yimoko baa taani ki doagidi leni o o kpiagidi nni.
Li miakpeli leni li miapanli
5Lanwani, yin kpa mani ŋanduna bonbuaka-biadila, yaala n die yi gbananbuoli, mi conconma, ti cagindi buoli kuli, ti gbanandi bonbuaka-biadila, yaala n joagini yaa buama kuli leni mi ŋalimanbuama, yaala n tie nani i buli ŋoadima yeni. 6Laa bonla yaa po yo, ke U Tienu pabienli cuonu baa cua bi niyiekaaba po. 7Yimoko den tie yene yin den ye ti tuonbiadi nni yaa yogunu. 8Ama moala, yin ŋaa mani yaala n tie ne kuli: li pabienli, li mutuoli, ki nanga, ku tuotabigu leni yaa majoagindi n ña yi ñoana nni kuli.
9Yin da pua faama leni yiyaba, kelima yi den landi u tagikpelu leni u bontienkaala, #Efe 4.22. 10ki lani u tagipaanu, yuu n pandi mi bandima nni cain yogunu kuli, nani yua n tagi u yaa nannanli yeni. #Cil 1.26; Efe 4.24. 11Laa tagipaanu nni, mi gagidima ki go ye bi nilanba leni Jufinba siiga, a junga leni a jifola siiga, yaaba n cogi leni yaaba n kaa cogi siiga, i yonbi leni yaaba n die bi yula siiga. Ama Kilisiti n tie likuli, ki go ye bikuli nni.
12Lanwani, yinba U Tienu nigandikaaba, wan gagidi ki ŋanbi yaaba, ke yi tie o buakaaba, yin yaa la mi ninñingbadima leni li ŋanbili, li yumiinli, mi dingima leni li juunli. #Efe 4.2. 13Yin moandi ki juuni leni yiyaba, ki yaa tiendi yiyaba po sugili. Li yaa tie ke nilo bii o lielo po, nani Kilisiti n den puni yi sugili maama, yimo n yaa puuni yiyaba sugili yeni. #Efe 4.32. 14Yi yaa tieni laa bonla kuli ki gbeni, yin la mi buama yaama taani ki loli yikuli yenma, nani lan dagidi maama. 15Kilisiti n den yini yi yaa yanduanma po, n yaa die yi pala, yin tua gbananyendi o yaa niinni. 16Kilisiti maama leni man pia yaa ŋalimano kuli, n gbie yi pala nni. Yaa bangi mani ki go tundi yiyaba leni mi yanfuoma. Yaa yiini mani Pisomi, U Tienu yani leni yaa yani n doagidi mi Fuoma n bangi yi yaala, ki yiini ki pagi U Tienu leni i tuondi yi pala nni. #Efe 5.19-20. 17Yin maadi yaa maama kuli leni yin tiendi yaala kuli, tieni mani likuli o Diedo Jesu yeli nni, ki yaa tuondi U Tienu yua n tie Baa, kelima wani Jesu yaa po.
Li dandanli yaaba n baa yaa ye leni biyaba maama
18Yinba bi puoba, yin yaa miindi yi yula yi ciaba kani, nani lan pundi o Diedo yaaba n yaa tiendi maama. #Efe 5.22; 1Pie 3.1.
19Yinba bi puodanba, yin yaa bua yi puoba, ki da pia bi po li mutuoli. #Efe 5.25; 1Pie 3.7.
20Yinba a bila, yin yaa tuodi ki ŋua yi danba maama li bonla kuli nni, kelima lani n mani o Diedo. #Efe 6.1.
21Yinba bi bidanba, yin da tiendi yaala n baa yaa fiindi yi bila pala, ke lan da ti wudi bi gbani. #Efe 6.4.
22Yinba i yonbi, yin yaa tuodi ki ŋua yi canbaanba ŋanduna nni li bonla kuli nni. Yin da tiendi yeni ban nua yi yaa yogunu bebe, nani yi bua ki mangi bi pala yeni. Ama yin yaa tiendi yeni yogunu kuli leni payenli, kelima yi fangi o Diedo. #Efe 6.5-8. 23Yin tiendi yaala kuli, yin yaa tiendi la leni li yankuali nani lan dagidi o Diedo po maama, ke laa tie bi nisaaliba po ka. 24Yi bani ke yi baa taani leni o bila kuli, ki baa wan bili yi po yaa faali ke li tie yi panpaani, kelima yi tuuni o Diedo Kilisiti po. 25Yua n tieni yaala n bia kuli baa baa o biadima panpaani, kelima U Tienu naa gagidi bi niba leni biyaba. #Tia 10.17; Efe 6.9.
Currently Selected:
Kolosi 3: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
