3 Jan 1
1
I fuondi
1Mini o nikpelo n diani li tili fini n buado Gayusi po, min bua fini yua leni i moamoani. #JTT 19.29; Lom 16.23; 1Kor 1.14.
2N buado, n sugini a yema kuli n dagidi a po, ŋan yaa pia laafia a gbanandi nni, nani ŋan pia laafia a naano po maama. 3Ti kpiiba n den cua yaa yogunu kuli ki tieni siedi ke a tie moamoandaano, ki cuoni i moamoani yaa yenma nni, n pali yen mangi hali boncianla. 4Yaala n mangi n pali ki cie tie, min yaa gba ke n bila ŋua i moamoani.
Gayusi tie nidugika
5N buado, a doagidi ke a tie nidugika leni ŋan tiendi yaala ti kpiiba po, ba yaaba n tie bi canba po. 6Bi den togidi Kilisiti Nitaanli siiga, ŋan pia yaa buama. Li baa yaa ŋani ŋan todi ba ban suagi liiga bi sancenli po, nani lan dagidi U Tienu po maama. 7Bi den fii ki gedi Jesu yeli po, ki naa gaa liba bi nilanba kani. 8Lani yaa po, li pundi tin yaa gaani laa nibuolu cangu, ke timo n taani leni ba i moamoani wangima tuonli nni.
Diotrefi yiema, Demetriwusi ŋanma
9N den diani mi maama waamu Kilisiti Nitaanli po. Ama Diotrefi, yua n bua ki yaa tugi li yuli bi siiga yeni naa tuo ti po. 10Lani yaa po, n yaa cua, n baa togidi wan tiendi yaala, wan maadi ti po yaa mabiadima leni yaa faama kuli. Laa tie lani bebe ka. O go yie, waa gaani ti kpiiba cangu. Ba yaaba n bi bua ki gaa bi cangu mo, waa tuo bi po, ki go deli ki ñani ba Kilisiti Nitaanli nni.
11N buado, ŋan da togidi yaala n bia, ama ŋan yaa togidi yaala n ŋani. Yua n tiendi yaala n ŋani tie U Tienu yua, ama yua n tiendi yaala n bia daa laa U Tienu.
12Bi niba kuli tiendi Demetriwusi po o siediŋamo. I moamoani yini iba moko tiendi o po siediŋamo. Timoko tiendi o po laa siedo yo.
I fuondijuodike
13N pia mi maama boncianla ki bua ki diani a po, ama mii bua ki diani leni mi tidianñima leni u tidianmuanu ka. 14N sugini ki le ŋa ke li daa waagi, tin boe. 15Mi yanduanma n yaa ye leni a.
A danlinba fuondi a. Ŋan fuondi ti danlinba kuli yendo yendo.
Currently Selected:
3 Jan 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.