2 Pieri 3
3
Jesu guacuama
3
O Diedo guacuama ñoanianu
1N buakaaba, line n tie min diani yi po yaa tilieli. A tilieda yeni nni kuli, n moandi ki tiadi yi yaala n baa tigini yi yantiana, yin yaa tia yaala n tiegi bonŋanla. 2Yin yaa tiadi bi saawalipuaba yaaba n gagidi ki ŋani n den soagindi yaa maama hali yogu po, ki go yaa tiadi o Diedo ti Candaano bali maama, yi tondiba n den wangi yaama. 3Yin tuodi ki bandi ke mi juodima yogunu, li ñuali danba baa cua leni bi ñuali, bani yaaba n ŋua bi gbanandi bonbuakaala. #Jud 18. 4Bi baa yaa tua yi: «Waa den niani u ñoanianu ke o baa guani ki cua te? O nan ye le? Hali ti yaajanba n kpe, ki taa ki pundi hali moala, li bonla kuli tie nani lan den tie maama, mi tagima cilima yogunu yeni.»
5Ba ke bi bani, bi yen sundi bi yama po, ke hali yogu U Tienu den maadi o maama ke tanpoli tagi, ke ki tinga mo ñani mi ñima nni, ke mi lindi ki cebini ga. #Cil 1.6-9. 6Li tie laa bonla po yo, ke o ŋandunkpialo den bodi, kelima mi ñima den milini o cain. #Cil 7.11. 7U Tienu maama yeni baa yaa kubi tanpoli leni yaa tinga n ye moala, ki sieni la u mu po, hali ti buudi daali leni U Tienu yiekaaba bolinma daali.
8N buakaaba, bonyenla n ye, ke laa ŋani yin sundi la. Lani n tie: O Diedo po dayenli tie nani bina tudili, ke bina tudili mo tie nani dayenli yeni. #Ps 90.4. 9O Diedo baa kuani o ñoanianu moala, ba ke bi nitianba nua ke o waagidi. Li tie ke o pia yi po li juunle, kaa bua ba niyendo n bodi, ama ke bi niba kuli n lebidi bi pala. 10O Diedo daali baa cua ki ludi bi niba, nani o suudo yeni. Landaali, tanpoli baa bodi leni ku fuciangu. Yaala n ye lienni kuli baa cuo u mu, ki nandi. Ki tinga leni yaala n ye lienni kuli mo baa cuo, ki buodi. #Mat 24.43; Luk 12.39; 1Tes 5.2; Doa 16.15.
11Lanwani, nani laa bonla kuli n baa nandi ki bodi yeni, li pundi yi tagu n gagidi ki yaa ŋani, ki go tuo U Tienu n yaa die yi cain. 12Yin yaa guu wani U Tienu daali cuama, ki yaa tiendi yaala n baa teni li daali yeni n jaligi ki cua. Landaali, tanpoli kuli baa cuo ki buodi, yaala n ye kuli baa nandi. 13Ama ti guudi o tanpopaano leni ki tinpanga, mi teginma n baa yaa ye naankani, nani o ñoanianu n yedi maama. #Esa 65.17; 66.22; Doa 21.1.
14Lanwani, n buakaaba, nani yin guu laa bonla kuli yeni, yin moandi o yaa cua, wan sua ke yii pia joagindiba leni tagiliba kuli, ama ke yi pia mi yanduanma leni o. 15Yin yaa nua ke ti Diedo n pia yaa juunli tie yi tindima po, nani ti kpibuado Poli moko n den diani yi po maama, ki ŋua U Tienu n den puni o yaa yanfuoma. #Lom 2.4. 16O dangi yeni o tila kuli nni, wan maadi laa bonla maama yaa yogunu. Ama lienni pia yaa maama yaa gbadima n pa. Bi nitianba, yaaba n tie yanboandanba ki naa go se ke li pa, ŋmiagidi ki golindi li bundima, nani ban tiendi maama leni yaa Diani n sieni bi bodima po.
17Lanwani n buakaaba, kelima yi tuodi ki bani laa bonla kuli, yin yaa fangi yi yula, ke U Tienu yiekaaba n da dadi yi bi yaadima nni, ke yi kan go yaa se ke li pa. 18Ama yin yaa suagi liiga ti Diedo leni ti Candaano Jesu Kilisiti yaa ŋanbili nni leni o yaa bandima nni, ki pugidi. Wani n yaa baadi ti kpiagidi moala leni yaa yogunu kuli. Amina!
Currently Selected:
2 Pieri 3: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
