LOMA YAABA 11
11
1Lanwani n buali, naani U Tienu luni o nibuolu Isalele yaaba bi? Kalam. Mini nba, n tie Isalele buolu, Abalahama puoliŋuanu leni Benjamina buolu#11.1 Benjamina buolu: Diidi 1Bad 12.21. yua.#Filp 3.5 2U Tienu naa luni o niba cain, wan den tuodi ki bani yaaba hali yogu. Yii bani i Diani n yedi yaala naankani ke *Elia den yenbidi U Tienu kani Isalele buolu yaaba po ki yedi: 3«N Diedo, bi ku a sawalipuaba, ki go tudi ki luni a *padibinbina. Mini bebe n sieni, ke bi moandi ki baa ñani n moko yaa miali.»#2Bad 19.10,14 4U Tienu den guani o be? O den goa ki yedi o: «N kubi n yuli po niba tudalele (7 000), yaaba n daa gbaani ki pugi *Baali.»#2Bad 19.18 5Li go tie yeni moala na, Isalele buolu yaaba siiga nitianga sieni, U Tienu n gandi yaaba kelima o *ŋanbili po. 6Lanwani li yaa tie ke o gandima yeni ŋua o ŋanbili, laa ŋua a tuona. Lani yaaka o ŋanbili ki go tie ŋanbili moamoani.
7Lankuli doagidi be? Isalele buolu yaaba naa baa ban den lingi yaala leni li yankuali. Ama bi siiga nni U Tienu n gandi yaaba bebe n baa la, yaaba n sieni kuli yaa pala den juagi. 8Nani lan diani maama:
«U Tienu kuani bi niinni
Mi guama yantiali ke bi gonbidi.
Bi pia i nuni ki naa nua liba,
Bi pia a tuba moko ki naa gba liba
Ki taa ki pundi hali dinla.»#Tia 29.4; Esa 29.10
9Dafidi moko yedi:
«Bi saajekaanu n tua bipo diagu
Leni taalu leni tingbali bonla,
Ban baa bi biadima panpaani.#Pis 69.23-24
10Bi nuni n tadigi ki da go nua,
Bi ciamu n poali ki buani yaa yogunu kuli po.»
11Lanwani n buali: Naani Isalele buolu yaaba tuudi ki baa yaa yogunu kuli po ki kan go fii bi? Yeni ka. Bi tingbali teni ke bi nilanba fidi ki baa mi *tindima ke lan yaa ñundi bani Isalele buolu yaaba li mutuoli. 12To, Isalele buolu tingbali yaa cuani a sela ŋanduna kuli po, ke bi gbalima mo teni ke bi nilanba baa a sela, laa pia kuli tama ke bi yaa guani U Tienu kani li baa cuani ŋanduna kuli po yaa sela n yaba ki cie.
Yaaba n kaa tie Isalele buolu yaa tindima
13Moala n maadi leni yinba bi nilanba kelima n tie U Tienu tondo bi nilanba po. N jigini min pia yaa tuonli bi nilanba siiga, 14ke li yaa baa tuo min yaa ñundi n buolu yaaba li mutuoli ke min fidi ki faabi bi siiga bi tianba. 15U Tienu n da den yie Isalele buolu yaaba yeni yaa den teni ke ŋanduna yaaba mangi leni o, o yaa goa ki tuo bipo li baa tua lede? Li baa tie nani bi tinkpiba n goa ki baa li miali yeni.
16A yaa buuni ti yonbudi ki yidi waamu ki puni U Tienu nani li bonluonka-kpiala yeni, yaadi n sieni moko gagidi U Tienu po. Bu tibu jiinu yaa gagidi U Tienu po, bu beni moko gagidi opo. 17Ama li yaa tie ke i bentiami jia ki ñani, ke fini yua n tie *olifie tilianbu yaa benu tugini bi yaa kaanu ki baadi olifie tiŋuukaabu yaa jiini n puuni yaa sinma, 18da kpiagi a yuli ki fali ban den jia ki ñani yaa beni. A yaa kpiagidi a yuli, ŋan kpaagi line, a tie benu bebe, fini ka tugi u jiinu, u jiinu n tugi a.
19Daalinba a baa goa ki yedi: «Bi den jia ki ñani i benmoani ki baa tugini mini.» 20Li tie moamoani. Bi den jia ki ñani bani, kelima bi dandanluoma po, fini mo ye lienni kelima li *dandanli yaa po. Lanwani ŋan da kpiagi a yuli, ama ŋan yaa jie. 21Kelima U Tienu yaa den cedi i benmoani yi n den ye i kaanceli, o kan cedi fini moko. 22Lani yaa po ŋan kpaagi U Tienu ŋanbili leni o mabinli po. O den mabini yaaba n den baa, ki ŋanbi a yaa po, ama se ŋan yaa ye o ŋanbili nni, yaaka o baa jia ki ñani a moko. 23Bani Isalele buolu yaaba mo yaa cedi ki naa go suagi liiga bi dandanluoma nni, U Tienu baa goa ki tugini ba bu tiŋanbu nni, kelima wani U Tienu pia u paalu ki baa fidi ki goa ki tugini ba. 24Li yaa tie ke fini yua n bi tie olifie tilianbu yaa benga den jia ki tugini yaa olifie tibu n tie tiŋuukaabu ki naa tie a yaa buolu kani, lanwani laa pia kuli tama ke bani moko baa fidi ki goa ki tugini bani biba yaa tibu kani nani bi buolu n tie maama.
U Tienu baa juodi ki faabi Isalele buolu
25N kpiiba, mii bua yaa bondoaginkaala n tie na n yaa boani yi, ke yin da nua yi yula ke yi tie yanfodanba. Laa bondoaginkaala tie ke Isalele buolu siiga bi tianba pala juagi hali bi nilanba n baa kua U Tienu tindima nni ki pundi ki dagidi cain. 26Li tie yeni ke Isalele buolu kuli baa tindi nani lan diani maama:
«O faabika baa ña Siyono po,
Ki ñani U Tienu yiema kuli
Jakobo puoliŋuani pala nni.#Esa 59.20
27Lani n baa tie n *ŋantaado leni ba,
Min ñani bipo bi *tuonbiadi yaa yogunu.»#Jel 31.33-34
28A yaa kpaagi Isalele buolu yaaba n yie o Laabaaliŋamo maama, bi tie U Tienu yibalinba yinba bi nilanba yaa ŋamu po. Ama a yaa kpaagi U Tienu gandima po, bi tie U Tienu buakaaba kelima bi yaajanba po. 29Kelima U Tienu yiinu leni o paabu naa pia lebidima. 30Puoli po yinba bi nilanba den yie ki naa tiendi U Tienu n bili yaala. Ama moala yi baa ke o gbadi yipo mi niñima kelima bani Isalele buolu yaaba yiema yaa po. 31Li go tie yeni, Isalele buolu yaaba yie ki naa tiendi U Tienu n bili yaala ke bani moko n baa U Tienu n gbadi bipo mi niñima nani wan gbadi yi mo yaa po mi niñima maama. 32Kelima U Tienu luoni bi nisaaliba kuli bi yiema nni nani li kpaadidieli yeni ke wan yuandi ki gbadi bikuli po mi niñima.
Polo pagi U Tienu
33U Tienu ŋalimani yaba, o banma leni o yanfuoma yaba ki ñua ki pendi bi nisaaliba bandima kuli. O yanjaga pendi bi nisaaliba n fidi ki kpaagi yaala. Baa fidi ki bandi yaala yaa po ke o tieni wan tiendi yaala.#Esa 55.8 34Kelima li diani:
«Ŋme n bani o Diedo kpaagili
Ŋme n fidi ki tua o juoginka?#Esa 40.13
35Ŋme n den kpa puni U Tienu bu paabu
Ke wani U Tienu mo baa guani o tiladi?»#Job 41.3
36Li bonla kuli ñani o yaa kani, wani n kubi likuli, likuli mo ye o yaa po. Wani n yaa baadi ti kpiagidi hali yaa yogunu kuli. Amina!#1Kol 8.6
Li dandanli yua n baa ŋua U Tienu maama
Currently Selected:
LOMA YAABA 11: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
