MI CILIMA 6
6
1Bi niba n den cili ki pugidi boncianla ki tinga kuli nni yaa yogunu ki maa a bonpola,#Job 1.6; 2.1 2U Tienu yaa bijaba den laa ke bi niba bisiaba den ŋani hali bonŋanla, lane bi den taa bi yaa siiga ban den bua yaaba ke bi tua bi puoba. 3Lanwani Li Miali Diedo den yedi: «N Fuoma kan yaa ye o nilo niinni yaa yogunu kuli, kelima o nisaalo tie ti gbanandi bebe, o bina baa tie kobiga n piilie.» 4U Tienu yaa bijaba n den kua bi niba yaa bisiaba kani ke bi den mali bipo a bila, laa yogunu ti niciandi den ye ki tinga nni. Li den tie laa nikpiaba, yaaba n den bili jama hali puoli po yogunu.#Coa 13.33
5Li Miali Diedo den laa ke bi niba yaa biadima den yaba ki tinga nni ke bi pala yantiana den kua mi biadima nni daali kuli.#Mat 24.37; Luk 17.26; 1Pie 3.20 6Li Miali Diedo pali den biidi leni wan den tagi o nisaalo ki tinga nni, ke o sugini o yaa den tagi o. 7Li Miali Diedo den yedi: «N baa bolini min den tagi yaa nilo ki ñani o ki tinga nni cain ki cili o nilo ki yaa caa hali ti denyandi leni li bonbalinkaala leni tanpoli yaa bonyugiditi, kelima n lebidi n yama. Mii sugini ke n go den tagi ba.» 8Ama Nowe wani den baa U Tienu *ŋanbili.
U Tienu jagi ke o baa faabi Nowe
9Mine n tie Nowe yaa yaabila yaa maama. Nowe den tie o niteginka leni papiendaano laa yogunu niba siiga kuli. Nowe den cuoni leni U Tienu.#2Pie 2.5
10Nowe den mali jaba taa: Sema, Kama leni Jafeta.
11U Tienu nintuali, ki tinga kuli den joagini ki biidi cain. Ki tinga den gbie leni mi janjanma. 12U Tienu den nuali ki tinga ki sua ke ki joagini ki biidi kelima mialifo kuli den tiendi yaala n joagini ŋanduna nni. 13Lani yaa po U Tienu den yedi Nowe: «N bili ke gbanandi kuli yaa juodima pundi kelima bi gbieni ki tinga leni mi janjanma. Diidi, n baa bolini bani leni ki tinga kuli. 14Ŋan taa yaa tibu n yi gofela yaa daadi ki tagi ku ñinbiagu. A baa boagidi gu a diebila bila ki boali gu leni yaa sinboanma n ye ki tinga nni ku tugu nni leni ku puoli kuli. 15Diidi ŋan baa tieni gu maama: Ku ñinbiagu yeni foagimu baa tie nukpanduna kobitaa, ku pianu baa tie nukpanduna piimuu, ku kpedima baa tie nukpanduna piitaa. 16A baa tieni ku ñinbiagu yeni kali nni li bonli, li foagimu baa tie nukpandunyenli. A baa tieni ku ñinbiagu yeni kunkunu bu buliñoabu, ku tugu nni baa pia a dietuatuada bona taa. 17Lanwani n mo baa yini ki tabolinkaaga n cua ki bolini ki tinga, ki bolini mialifo kuli. Yaala n ye ki tinga nni kuli baa kpe. 18Ama n baa kuani o *ŋantaado leni fini. A baa kua ku biagu nni, fini leni a bijaba, a pua leni a bijaba yaa puoba baa yegi leni a. 19Bonfuodila buolu kuli siiga ŋan taa bontonga leni bonsiaga ki kuani ba ku ñinbiagu nni a kani, ban da kpe. 20Yanbuolu kuli bilie lie, i nuani, ti denyandi, li bonbalinkaala, likuli baa cua a kani ki baa ki yaa ye. 21Ŋan taa jebuoli kuli ki bili a kani lan yaa yaba, ke lan tua mi jiema fini leni bani kuli po.» 22Nowe n den tieni yeni. O den tieni U Tienu n den puogi o yaala kuli.#Ebl 11.7
Nowe kua ku ñinbiagu nni
Currently Selected:
MI CILIMA 6: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.