MI CILIMA 5
5
1Line n tie Adama yaa yaabila yaa tili. U Tienu n den tagi o nilo yaa yogunu, o den tagi o wani U Tienu yaa nannanli nni.#Cil 1.27-28 2O den tagi o ja leni o pua, o den seligi ba. Wan den tagi ba yaa daali, o den yini ba bi nisaaliba.#Mat 19.4; Mak 10.6
3Adama n den pia bina kobiga n piitaa yaa yogunu o den mali o bijua yua n naani leni o hali bonŋanla. O den cili o yeli Seta. 4Adama n den mali Seta yaa yogunu, o go den tieni bina kobinii ki go mali a bonjala leni a bonpola. 5Adama yaa bina kuli den pundi bina kobiyia n piitaa, lan yuandi o den kpe.
6Seta n den pia kobiga n bina muu yaa yogunu, o den mali Enosa. 7Enosa n den mali yaa yogunu, Seta go den tieni kobinii n bina lele ki go mali a bonjala leni a bonpola. 8Seta yaa bina kuli den tie kobiyia n piiga n bina lie, lan yuandi o den kpe.
9Enosa n den pia bina piiyia yaa yogunu, o den mali Kenana. 10Kenana n den mali yaa yogunu, Enosa go den tieni kobinii n piiga n bina muu ki go mali a bonjala leni a bonpola. 11Enosa yaa bina kuli den tie kobiyia n bina muu, lan yuandi o den kpe.
12Kenana n den pia bina piilele yaa yogunu, o den mali Malaleeli. 13Malaleeli n den mali yaa yogunu, Kenana go den tieni bina kobinii n piinaa ki go mali a bonjala leni a bonpola. 14Kenana yaa bina kuli den tie bina kobiyia n piiga, lan yuandi o den kpe.
15Malaleeli n den pia piiluoba n bina muu yaa yogunu, o den mali Yeledi. 16Yeledi n den mali yaa yogunu, Malaleeli go den tieni bina kobinii n piitaa ki go mali a bonjala leni a bonpola. 17Malaleeli yaa bina kuli den tie kobinii n piiyia n bina muu, lan yuandi o den kpe.
18Yeledi n den pia kobiga n piiluoba n bina lie yaa yogunu, o den mali Enoka. 19Enoka n den mali yaa yogunu, Yeledi go den tieni bina kobinii ki go mali a bonjala leni a bonpola. 20Yeledi yaa bina kuli den tie kobiyia n piiluoba n bina lie, lan yuandi o den kpe.
21Enoka n den pia piiluoba n bina muu yaa yogunu o den mali Matusalema. 22Matusalema n den mali yaa yogunu, Enoka den cuoni leni U Tienu hali bina kobitaa ki go mali a bonjala leni a bonpola. 23Enoka yaa bina kuli den tie kobitaa n piiluoba n bina muu. 24Enoka den cuoni leni U Tienu, lan yuandi waa go den ye kelima U Tienu den taa o.#Jud 14; Ebl 11.5
25Matusalema n den pia kobiga n piinii n bina lele yaa yogunu, o den mali Lemeka. 26Lemeka n den mali yaa yogunu, Matusalema go den tieni kobilele n piinii n bina lie ki go mali a bonjala leni a bonpola. 27Matusalema yaa bina kuli den tie kobiyia n piiluoba n bina yia, lan yuandi o den kpe.
28Lemeka n den pia kobiga n piinii n bina lie yaa yogunu, o den mali o bijua. 29O den cili o yeli Nowe ki yedi: «Wani n baa baagi ti leni ti nii yaa tuonfala, ya n cua kelima Li Miali Diedo n den soli yaa tinga yaa po.» 30Nowe n den mali yaa yogunu, Lemeka go den tieni kobimuu n piiyia n bina muu ki go mali a bonjala leni a bonpola. 31Lemeka yaa bina kuli den tie kobilele n piilele n bina lele, lan yuandi o den kpe.
32Nowe n den pia bina kobimuu yaa yogunu, o den mali Sema, Kama leni Jafeta.
Bi nisaaliba biadima
Currently Selected:
MI CILIMA 5: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.