TESALONIKA YAABA TILIELI 2
2
1Ti kpiiba, yaala n tie o Diedo Jesu Kilisiti cuama, leni tin baa taani o kani maama, ti mia yi,#1Tes 4.15-17 2yin da tuo ke laa bonla n jaligi ki lengidi yi yantiana bi ki jieni yi leni yaa maama n naani ke mi tie sawali maama, bi maamaba, bi li yaa naani leni tiliba ñani tikani ki maadi ke o Diedo daali pundi. 3Yin da tuo ke oba kuli n boandi yi, baa lan tie yaala kuli, ki yedi ke laa daali pundi, kelima laa daali kan cua se mi dandanyiema n kpa cua, ke mi biadima daano n doagidi, wani yua n baa gedi mi bodima po yeni. 4O baa fiini o yuli ki yie bi niba n nua yaala nani li tie U Tienu yeni, bi ban kpiagidi yaala kuli. O baa kua ki kali hali U Tienu dieli ki yini o yuli U Tienu.#Dan 11.36; Esk 28.2
5Yii tiani ke n den waani yi lankuli min den ye leni yi yaa yogunu yo? 6Yi bani yaala n yie opo ke wan da doagidi hali o yogunu n pundi. 7Baa moala mi biadima yeni ye ŋasiili nni ki tuuni mi tuonli. Li da baa tie yeni hali yua n yiedi mipo n ti ña likani. 8Lanyogunu mi biadima daano baa doagidi, o Diedo Jesu n baa bolini yua leni o ñoabu fawaama. O cuama kpiagidi baa biidi o tuonli cain.#Esa 11.4 9Sutaani paalu baa teni mi biadima daano yeni n cua leni mi bancianma boncianla leni sinankeeninba leni mi faama bonlidikaala buoli kuli.#Mat 24.24 10O cuama go baa yegi leni mi biadima yaa boandi kuli ki boandi yaaba n baa bodi kelima baa den bua i moamoani ke ban baa mi *faabima. 11Li tie lani yaa po yo ke U Tienu baa soani bikani yaa paalu n baa teni ban yaadi ki daani mi faama. 12Yeni yaaba n naa den tuo ki ŋoadi i moamoani, ama ki mangidi bi pala leni mi biadima kuli, U Tienu baa bu ki cuo ba.
U Tienu gandi yinba, ki ga yi miana
13Ti kpiiba, o Diedo buakaaba, li pundi tin yaa tuondi U Tienu yipo yogunu kuli, kelima o den gandi yi hali mi cilima mi *tindima po kelima o Fuoma yaa gagidiŋanbima po leni li *dandanli i moamoani nni yaa po. 14U Tienu den yini yi lankuli po kelima tin den waani yi yaa Laabaaliŋamo po, ke yin baa yi biinu ti Diedo Jesu Kilisiti kpiagidi nni.
15Lani yaa po ti kpiiba, yaa se mani ke li pa, ki ŋua tin den bangi yi yaala kuli, li yaa tie tin den maadi yaala leni ti ñoana, leni tin den diani yaala li tili nni kuli. 16Ti Diedo Jesu Kilisiti wani oba, leni ti Baa U Tienu yua n den bua ti, ki puni ti kelima o *ŋanbili po yaa baagi n ki pia mi gbenma leni yaa suginma n ŋani, 17n yaa baagidi yi pala ki teni yin yaa se ke li pa yaala n ŋani tienma nni leni mi maama nni kuli.
Yaa miadi mani U Tienu tipo
Currently Selected:
TESALONIKA YAABA TILIELI 2: GUX03
Highlight
Copy
Compare
Share
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
