Tobi 8
8
1Bɛ na tɩ dɩ ɛ́ nyũ baar'a, bɛ tɩ bɔbr'a kɛ́ bɛ gã. Bɛ tɩ tɛr'ɩ a pɔlbile kpɛ n a di-gana pʋɔ. 2Lɛ n'a a Tobɩasɩ tɩ lɛb tɩɛrɩ a Arafayɛl wulu: ʋ tɩ ír'ɩ a zʋ́m sabr nɩ a socir a ʋ kɔr pʋɔ, dɔwlɩ a vũu-bie na be a tɩ-suur-zɔ̃-na-nyùur-vla-vla-a nyɩwfʋ-kole pʋɔ a zu. 3A nyũu na tɩ ìre a, tɩ diw nɩ a kɔ̃tɔn, ʋ zɔ a zi-vuo pʋɔ tɩ sãá Eziptɩ tẽw. A Arafayɛl tɩ diw ʋ na tɩ nyɔw ʋ a be, 'lẽ nɩ bãzɔlɛ a pɛr nɛ pʋɔ.
4Al pùorí, a sãà mɩnɛ tɩ yi n a dĩó ɛ́ pàw a pan. Lɛ n'a a Tobɩasɩ tɩ ìr a gado zu ɛ́ yel a Saara: «Ɩ̃ yeepuule e, ìr tɩ puori zɛlɩ a Sore yãayãa k'ʋʋ zɔ a tɩ nɩbaalʋ ɛ́ gù tɩ.» 5A Saara tɩ ìr'a, bɛ tĩ zɛlɛ a Sore yãayãa k'ʋʋ gù bɛ. Nyɛ̃ a Tobɩasɩ puoru:
«Tɩ sãàkʋm-kore Naaŋmɩn i,
tɩ danɛ fʋ na!
A fʋ yúor, ʋ tɛr danʋ kʋralɛ!
A bʋ̃-íri za na be a salom zu
nɩ a tẽw zu a, a danɛ fʋ kʋralɛ!
6Fʋ̃ʋ n'ʋ ír a Adama,
fʋ̃ʋ n'ʋ maalɩ sõwne nɩ tɩɛrɛ kʋ̀ ʋ,
a ʋ pɔw Awa,
ɛ́ a nɩbɛ ayi bɛ ŋa zie n'a
a nɩsaal bʋʋrɛ yi.
Fʋ̃ʋ n'ʋ tɩ yel:
“A bɛ sɛw k'aa dɛb ɩ ʋ yõ ɩ,
ɩ̃ na maal'ɩ sõwne
na ŋmɛ̃ taa nɩ ʋ a kʋ̀ ʋ.”
7Ƴɛrɛŋa a, pɔw vʋla
na bɛ tu a wulu a
bɛ n'a so ɩ̃ kule a Saara ɩ,
ɛcɛ ɩ̃ na tu fʋ
bɛ lɛb pùor a n'a so.
Ɩ̃ zɛlɛ fʋ na,
zɔ a mãa nɩ a Saara nɩbaalʋ
ɛ́ ɩ tɩ za ayi vʋʋrɩ tɩ kòr yaga za.»
8Al pùorí bɛ za lãw yel: «Amɛn! Amɛn!» 9Al pùorí bɛ gã kɛ́ bɛ gúr.
10Ɛcɛ a Araguwɛl tɩ ìr'a bʋɔlɩ a ʋ tõ-tõ-biir ɓã taa. Bɛ tɩ cen na tɩ tuw yaa-bɔw. Bʋ̃ʋ n'ʋ vɛ̃, a Araguwɛl tɩ tɩɛr'ɩ ʋ pʋɔ à ŋá: «A pɔlbile wa mab kpi a, bɛ na ɩrɛ tɩ na laar tʋʋr'ɩ tɩ.» 11Bɛ na wa tuw a yaa-bɔw baar'a, a Araguwɛl tɩ lɛb'a wa a yir, wa bʋɔlɩ a ʋ pɔw, 12ɛ́ yel ʋ: «Tõ tõ-tõ-bi-pɔw kãw a dĩó ʋ tɩ nyɛ̃, a Tobɩasɩ cãà na vʋʋrɛ bɩɩ? Ʋlɛ wa kpi a, tɩ na tʋ̃ɔ́ na ũù ʋ ɛ́ nɩr bɛ bãwnɩ a ɩ.» 13Bɛ tɩ bʋɔl'ɩ a tõ-tõ-bi-pɔw ʋ wa. Bɛ tɩ tɔ̃w nɩ fɩ̃tɩlɛ kʋ̀ ʋ, ɛ́ yuo a dĩo pan. A tõ-tõ-bi-pɔw tɩ kpɛ na tɩ nyɛ̃ bɛ za ayi bɛ gúr kpalɩtam. 14Ʋ tɩ lɛb'a yi tɩ yel kʋ̀ bɛ: «Ʋ vʋʋrɛ na! Yel bɛ ka be ɩ.» 15A lɛ n'a a Araguwɛl tɩ puori a Naaŋmɩn na be a salom zu a, yel'ɩ:
«Naaŋmɩn i, a sɛw na
k'aa pʋ-pɩɛlʋ dem danɛ fʋ,
bɛ danɛ fʋ kʋralɛ!
16Fʋ̃ʋ so puoru,
a nʋ̃ɔ̀ fʋ na paalɩ mɛ̃ a ƴãw!
Bʋ̃ʋ n'ʋ vɛ̃,
a lɛ ɩ̃ na tɩ tɩɛrɛ a bɛ ɩ ɛ.
Ɛcɛ fʋ tõ n
a fʋ nɔ̃wfʋ tome a tɩ zie.
17Fʋ̃ʋ so puoru
fʋ na zɔ a bibiir
ayi bɛ ŋa nɩbaalʋ a,
bidɛb-been
nɩ pɔwya-been nɛbɛ#8:17 Nyɛ̃ 3.15..
Sore e, wul bɛ
a fʋ nɔ̃wfʋ ɛ́ gù bɛ.
A fʋ̃ʋ zũú a,
ɩ bɛ tʋ̃ɔ́ vʋʋrɛ nʋ̃ɔ̀ pʋɔ!»
18A Araguwɛl tɩ ƴãw nɩ a ʋ tõ-tõ-biir bɛ ga a yaa-bɔw pàw ɛ́ a zie bãw vɩɛ.
A kul-taa cuw dɩb
19A Araguwɛl tɩ yel'ɩ a ʋ pɔw k'ʋʋ sɛ̃ dipɛ̃ yaga. Ʋ tɩ kaa na ír a ʋ dʋn pʋɔ nĩi ayi nɩ pʋ́rɩ anaar ƴãw bɛ cɔbrɩ. À ŋá n'a bɛ tɩ tĩ a cuw cɔbrʋ. 20A Araguwɛl tɩ bʋɔl'ɩ a Tobɩasɩ wa yel ʋ: «Bibie pie nɩ anaar bɛ wa tɔl a, fʋ bɛ yire a ka ɩ. Fʋ na be n a ɩ̃ zie ka, dɩrɛ ɛ́ nyúur ɛ́ ƴãwnɛ a ɩ̃ pɔwyaa nʋ̃ɔ̀, ʋl na tɩ páw a kpɩɛrʋ á ŋá za a. 21Ɩ̃ na kʋ̀ b'ɩ a ɩ̃ tɛra põ-zɛ̃-taa, ɛ́ fʋ na lɛb'a kul a fʋ sãà zie, ɛ́ bɛ bãw damnʋ kãw za ɩ. A ɩ̃ tɛra põ-zɛ̃-taa ŋa sob na ɩ n a nyɩ dem mãa nɩ a ɩ̃ pɔw wa kpi a. Ɩ̃ bie e, dɩ kanyir, ɩ̃ ɩ n a fʋ sãà ɛ́ a Ɛdɩna ɩ a fʋ mã. Tɩ lãw nɩ fʋ na fʋ̃ʋ nɩ a fʋ pɔw, a ƴɛrɛŋa nɩ kʋralɛ. A na ɩ à ŋá a, ɩ̃ bie e, dɩ kanyir!»
La Bible en Dagara © Alliance Biblique du Burkina Faso, 2013.