Bɛn Sɩɩra 47
47
Naaŋmɩn-ƴɛ̀r-manɛ Natan nɩ nãà Daviir
1A Samɩɛl pùorí a,
Natan n'ʋ tɩ ɩ a naaŋmɩn-ƴɛ̀r-manɛ a Daviir daar.
2Mɛ̃ a lɛ bɛ na mɩ́ ír
a nɛn-vɩɛlɩ zie na ɩ a nɛn-kãánɩ
lãw-taa bàwr maalʋ daar a,
lɛ n'a bɛ mɩ́ tɩ ír a Daviir
a Ɩsɩrayɛl nɩbɛ pʋɔ, ʋ be ʋ tʋɔra.
3Ʋl zie a, gbẽw nyɔwfʋ tɩ ɩ n dɩ̃ɛnʋ,
mɛ̃ bʋle nyɔwfʋ a,
ɛ́ wɛ-dʋ̃-faa kãw bɛ na bʋɔlɛ ursɩ a nyɔwfʋ ɩ mɔlɛ,
mɛ̃ péli-cãpile nyɔwfʋ a.
4Ʋ tɩ cãà na ɩ bi-pɔl lɛ,
ɛ́ kʋ nɩ-kɛra-jarmam kãw#47:4 Nyɛ̃ 1Sa 17.1-54.,
ír a Ɩsɩrayɛl nɩbɛ vĩ bɛr.
Ʋ tɩ viir'ɩ a ʋ kpàlá ʋ na ƴãw kʋsɩɛr a,
lɔb'ɩ a Golɩatɩ na tɩ ɩrɛ pɔ̀lʋ a lɔb.
5Bʋ̃ʋ n'ʋ vɛ̃, a Daviir tɩ zɛlɩ nɩ a Sore,
a Naaŋmɩn-na-do-saa-bɛ-pɩɛl-a,
ʋ ɩ a ʋ dʋrʋ nũu ʋ kpɛmɛ,
k'ʋʋ ír zɛbr-nɩr na bãw zɛbr a bɛr,
ɛ́ ɩ a ʋ nɩ-bʋʋrɛ lɛb tɛr fãw.
6Alɛ so bɛ tɩ ɩ ʋ tɛr yúor,
dɔ̃ dem tùr-pie ʋ na kʋ a ƴãw.
Bɛ tɩ danɩ ʋ na puori nɩ a Sore barka,
ɛ́ ƴãw ʋ vɔblɩ a nãà-kpawʋɔ.
7Bʋ̃ʋ n'ʋ vɛ̃, ʋ tɩ kʋ n dɔ̃ dem
na viiri koli ʋ a pàw pɛr,
ʋ tɩ baar'ɩ a Filisɩtɛ̃ mɩnɛ, a ʋ dɔ̃ dem,
ɛ́ sãw a bɛ kpɛnʋ bɛr wa tɔ dĩa.
8A ʋ tome za pʋɔ a,
ʋ tɩ danɩ nɩ a Naaŋmɩn na ɩ sõw a,
a Naaŋmɩn-na-do-saa-bɛ-pɩɛl-a,
ɛ́ ír a ʋ yúor-vɩɛlʋ-danʋ.
Ʋ tɩ yiel'ɩ yielu nɩ a ʋ pʋɔ za,
ɛ́ nɔ̃w a ʋ Íre.
9Ʋ tɩ ƴãw nɩ yiel-yielbɛ
a bàwr-maal-kuur niŋé,
kɛ́ bɛ mɩ́ yiele yiel-vɩɛlɩ bɛ wone.
10Ʋ tɩ ɩ na a cuwr mɩ́ dɩ n dɛpaalʋ,
ʋ tɩ cɔbrɩ a nɩ vla vla,
kɛ́ bɛ tʋ̃ɔ́ mɩ́ danɩ a Sore yo-sõw,
ɛ́ a zie wa dɛ wɛlɛ a,
bɛ̃ɛ wone yielu nɩ bʋ̃-ŋmɩɛrɩ a zi-sõw pʋɔ.
11A Sore de nɩ a Daviir sãwna bɛr a baarɩ,
ɛ́ ɩ a ʋ kpɛnʋ kɛrɩ a nʋɔr kʋ.
Ʋ maal'ɩ ʋ nɩ wõ-taa a naalʋ-dɩb ƴãw,
ɛ́ kʋ̀ ʋ naalʋ-dà-kɔw-yúor a Ɩsɩrayɛl tẽw pʋɔ.
Salomɔ̃
12A Daviir pùorí a, a ʋ bidɛb tɩ n'ʋ,
nɩr a bãwfʋ na tɩ ɩ kpɛ̃ɛ a.
A Daviir zũú a,
a Sore tɩ ɩ na a ʋ nyɔ-vʋʋrʋ bɛ bãw damnʋ ɛ.
13A Salomɔ̃ naalʋ-dɩb daar a,
ƴã-ɓaarʋ tɩ be n be.
Naaŋmɩn tɩ ɩ na a ʋ tẽw tʋr-bɔwrɩ za gã zoom.
À ŋá n'a a Salomɔ̃ tɩ tʋ̃ɔ́ ŋmãa
Ŋmɩn-yir-kpɛ̃ɛ a Sore ƴãw,
ʋ tɩ cɔbrɩ zi-sõw a ʋ ƴãw, ʋ be be kʋralɛ.
14Salomɔ̃ ɔ,
nyɛ̃ fʋ na tɩ bãw yã a fʋ pɔ̀lʋ daar a,
a yã tɩ paalɩ fʋ na mɛ̃ kʋ̃ɔ na paalɩ man a!
15A fʋ bãwfʋ tɩ pàw nɩ a tẽw,
fʋ tɩ paalɩ ʋ na nɩ zʋkpaɩ a pɛ́ɛ na sɔwlɩ a.
16A fʋ yúor tɩ yi na
tɩ ta a kʋ̃ɔ-kpɛ̃ɛ-sɔgɔ-tẽ-zãánɩ,
ɛ́ a nɩbɛ nɔnɛ fʋ a ƴã-ɓaarʋ fʋ na tɩ tɩrɛ a ƴãw.
17A tẽ-daa za tɩ nɔnɛ nɩ a fʋ yielu,
a fʋ zʋkpaɩ, a fʋ ƴɛ̀rʋ nɩ a fʋ sɔwfʋ.
18A Sore Naaŋmɩn yúor ƴãw,
a ʋl bɛ na bʋɔlɛ a Ɩsɩrayɛl Naaŋmɩn a,
fʋ bɔ n a salm-zɩɛ gbõ taa mɔlɛ lɛ
mɛ̃ kur-pla mɔrmɔr a,
ɛ́ bɔ a salm-pla ɓã taa mɔlɛ lɛ
mɛ̃ kur-mɔrmɔr a.
19Ɛcɛ fʋ bɛr'ɩ a fʋ ƴã-gan kʋ̀ a pɔwbɛ,
ʋ ɩ fʋ lɩɛbɩ a bɛ gbãgbaa.
20Fʋ ɩ n à à ŋá sãw a fʋ yúor
nɩ a fʋ bʋʋrɛ yúor,
ɩ a Naaŋmɩn suur ìr a bɛ ƴãw.
Bɛ kõ n a fʋ yãya-ɩb.
21Bʋ̃ʋ n'ʋ vɛ̃, a fʋ naalʋ-tẽw
wa tɩ põ nɩ ziir ayi:
naalʋ-tẽ-gaara yi a Efarayim dɔwlʋ pʋɔ.
22Ɛcɛ a Sore bɛ tɩ lɛb bɛr a ʋ su-ɓaarʋ ɛ,
ʋ bɛ tɩ bɛr a ʋ ƴɛ̀rʋ kãw za ʋ bɛ tu ɛ.
Ʋ bɛ tɩ bɛr a ʋ nɩ-kaa-íra bʋʋrɛ bɛ baarɩ ɛ,
ʋ bɛ tɩ bɛr a sob nɛ
na tɩ nɔ̃w ʋ a bibiir bɛ kpi baarɩ ɛ.
Mɛ̃ a lɛ ʋ na tɩ bɛr nɩbɛ
bɛ cɛ a Zakɔb bʋʋrɛ pʋɔ a,
lɛ n'a ʋ mɩ̀ tɩ kʋ̀ lɩɛrbɛ a Daviir,
lɩɛrbɛ na yi a ʋ bʋʋrɛ pʋɔ a.
Orobowam nɩ Zerobowam
23Al pùorí, a Salomɔ̃ tɩ kpi na cen
tɩ páw a ʋ sãà mɩnɛ,
ɛ́ bɛr a ʋ bʋʋrɛ kãw a ʋ pùorí,
nɩr na ɩ yãyabul a nɩbɛ pʋɔ
ɛ́ bɛ tɛr yã zaa pʋrɩ a:
bʋ̃ʋ n'ʋ vɛ̃, a Orobowam'ʋ
tɩ yel a lɛ ʋ na na ɩ a,
ƴãw a nɩbɛ gaarɩ.
Ɛ́ Nevatɩ bidɛb, Zerobowam'ʋ
tɩ ɩ a Saa-pɛrɩ́-gʋba-lowr
dɔwlʋ maalɩ a yel-bier.
Ʋ tɩ wul'ɩ a yel-bier sɔ́r
a Efarayim#47:23 Efarayim: A Saa-pɛrɩ́-gʋba-lowr naalʋ-tẽw n'ʋ. naalʋ-tẽw nɩbɛ.
24A bɛ yel-bebe tɩ yãwmɛ yãwmɛ na
tɩ sɛwnɩ a íru,
bɛ ír bɛ a bɛ tẽw pʋɔ.
25Bɛ tɩ ɩ n a ɩ-fa-bʋʋrɛ za,
a dɔwrʋ wa tɩ lo a bɛ zu.
Currently Selected:
Bɛn Sɩɩra 47: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.