Bɛn Sɩɩra 46
46
Zozue nɩ Kalɛb
1Nun bidɛb, Zozue,
tɩ ɩ n zɛbr-nɩr na kpɛ socir a.
Ʋ tɩ lɩɛr'ɩ a Moyiir ɩ naaŋmɩn-ƴɛ̀r-manɛ.
Ʋ dɩ n a ʋ yúor vla#46:1 Ʋ dɩ n a ʋ yúor vla: A Zozue yúor pɛr'ɩ «A Sore faarɛ na». Ʋlɛ nɩ a Yeezu yúor ɩ n been. Nyɛ̃ Mat 1.21. ,
a Sore na ɩ ʋ ɩ faarɛ kpɛ̃ɛ
a ʋ nɩ-bʋʋrɛ ʋ na tɩ kaa ír a ƴãw a.
Ʋ tɩ zɛb'a tʋ̃ɔ́ a dɔ̃ dem na tɩ ír a ʋ ƴãw a,
ɛ́ ɩ a Ɩsɩrayɛl nɩbɛ so a bɛ tẽw.
2Nyɛ̃ yúor ʋ na mɩ́ tɩ páw,
a lɛn daar ʋ na mɩ́ tɩ zɛw a ʋ zɛbr-sɔ-kpɛ̃ɛ
a tẽ-bɛrɛ ƴãw a!
3Ãa n'ʋ de niwn kpɛ socir mɛ̃ a ʋl a?
Bʋ̃ʋ n'ʋ vɛ̃, ʋlɛ n'ʋ tɩ zɛbr a Sore zɛbr.
4Ʋlɛ bɛ tɩ n'ʋ so a mʋ̃tɔ̃w tɛw àr,
ɛ́ bibi-been cɛlɩ mɛ̃ bibie ayi a ɩ?
5A dɔ̃ dem na tɩ gbʋnɛ ʋ a lõbowe za a,
ʋ bʋɔl'ɩ a Naaŋmɩn-na-do-saa-bɛ-pɩɛl-a,
a kpɛnʋ-za-sob,
ɛ́ a Sore be a saa-zu ɛ́ sɔ̀w ʋ,
lɔb sa-bi-kube a fãw na bɛ tɛr tɛwr a.
6A Zozue tɩ lo n a dɔ̃ dem zɛbr-nɩbɛ zu,
kʋ a ʋ dɔ̃ dem a Bɛtɩ-Horon siwfʋ zie.
Bʋ̃ʋ n'ʋ vɛ̃, a tɩ fɛr'a k'aa nɩ-bʋʋr-yoru
na tɩ zɛb'ɩ a Sore a bãw a Zozue zɛbr bome za,
bʋ̃ʋ n'ʋ vɛ̃, ʋ tɩ tuur'ɩ a lɛ
a Kpɛnʋ-za-sob na yere a.
7Ʋ tɩ wul'ɩ a ʋ pùor-bɛ-lɛbrʋ a Moyiir daar,
ʋlɛ nɩ Yefune bidɛb, Kalɛb:
bɛ tɩ bà n gbɛ́r a lãw nɩbɛ niŋé,
bɛ sàw bɛ gaarɩ a Sore zu ɛ,
ɛ́ ɩ bɛ bɛr a zɛbr bɛ na zɛbr 'hũ'hune nɩ a.
8À ŋá n'a a bɛl ayi tɩ nyɛ̃ a faafʋ,
a bɛ tɛwr ayi,
soja-gbɛ́ɛ dem tùr-kɔbr-ayʋɔb pʋɔ,
kɛ́ bɛ tɛr a Sore nɩ-bʋʋrɛ kpɛ n
a tẽw bɛ na na so a pʋɔ,
tẽw bʋ̀rʋ nɩ sɩwr na gbɔlɛ a#46:8 A kan-nɛ́ɛ 7-8 ƴãw a, nyɛ̃ Sɔr-n 14.6-38, Ety 3.8, Wl-ayi 31.20, Zoz 5.6..
9Ɛ́ a Sore tɩ kʋ̀ n a Kalɛb fãw-kpɛ̃ɛ,
a ʋ koru tɛɛ za pʋɔ ʋ cãà tʋ̃ɔ́
zɛb de a tan vuo,
a ʋ bʋʋrɛ na tɛr, ʋ ɩ a bɛ zie a.
10À ŋá n'a a Ɩsɩrayɛl nɩbɛ za tɩ nyɛ̃
k'aa Sore pùor-tub ɩ n bʋ̃-vla.
A ƴɛ̀r-dɩrbɛ
(Nyɛ̃ Ƴɛ̀r-d 2:11-19)
11Tɩ mɩ̀ ƴɛ̀r a ƴɛ̀r-dɩrbɛ ƴɛ̀rʋ#46:11 Nyɛ̃ Ƴɛ̀r-d 2.16 nɩ a manʋ. ,
ŋa za mɛ̃ a lɛ a ʋ yúor na yi a.
Bɛl bɛ gùr pùor kʋ̀ a Sore, puori a tɩbɛ ɩ.
Tɩ lɛb tɩɛrɩ a bɛ yele puor'ɩ a Sore barka.
12A bɛ kɔbɛ na saa cãà be a bɔw pʋɔ a,
a Sore, ʋ ɩ nɩbɛ ìr a bɛ pùorí cɔwrɛ bɛ!
Ʋ ɩ a bɛ yúor lɛb bãw yi
a nɩ-yée bɛ ŋa bibiir pʋɔ!
Samɩɛl
13A Samɩɛl a, a Sore tɩ nɔ̃w ʋ na,
ʋ tɩ ɩ n a ʋ ƴɛ̀r-manɛ,
ɛ́ tɩ ƴãw a naalʋ-dɩb be be.
Ʋ tɩ cir'ɩ a kãá ƴãw nɩ-bɛrɛ zurú,
ƴãw bɛ ɩ a ʋ nɩ-bʋʋrɛ na-mɩnɛ.
14Ʋ tɩ dɩ n nɩ a lãw nɩbɛ a ƴɛ̀rʋ tu n a Sore wulu,
a Sore ɩ a ɩb maalɩ a Zakɔb bʋʋrɛ.
15A ʋ pùor-bɛ-lɛbrʋ tɩ wul'a
k'ʋʋ ɩ n naaŋmɩn-ƴɛ̀r-manɛ tɔr za,
ɛ́ a ʋ ƴɛ̀rʋ ɩ bɛ nyɛ̃ bãw
k'ʋʋ ɩ n yel-nyɛrɛ na yere yel-mɩŋa a.
16A ʋ dɔ̃ dem na tɩ fɩɩrɩ ʋ a lõbowe za a,
ʋ tɩ bʋɔl'ɩ a Sore kpɛnʋ-za-sob,
maalɩ bàwr nɩ peli-pɔl kʋ̀ ʋ.
17Lɛ n'a a Sore tɩ ɩ a ʋ saa ʋ tanɩ,
a salom zu be ʋ na be a,
ʋ tɩ ɩ na bɛ wõ a ʋ kɔkɔr damnʋ-kpɛ̃ɛ pʋɔ.
18Ʋ tɩ kʋ n a dɔ̃ dem nɩ-bɛrɛ pàw pɛr,
nɩ a Filisɩtɛ̃ mɩnɛ na-mɩnɛ za.
19Ʋ tɩ dɩ n dãsɩɛ ŋa a Sore nɩ a nãà niŋé,
ɛ́ bãw gúr a kũu gʋ̃ɔ:
«Ɩ̃ bɛ dãw de nɩr kãw za bom ɛ,
a ʋ nafawr-ɓɛwlɩkɛl mɩ́ saa n'a a.»
Ɛ́ nɩr bɛ tɩ yel k'ʋʋ tɛr'ɩ sãwna ɩ#46:19 Nyɛ̃ 1Sa 12.3..
20Ʋ na tɩ gúr a kũu gʋ̃ɔ baarɩ a,
ʋ tɩ cãà na ƴɛ̀r naaŋmɩn-ƴɛ̀r-manɛ ƴɛ̀rʋ,
yel a lɛ a nãà nyɔ-vʋʋrʋ na na baarɩ a kʋ̀ ʋ.
A ʋ kɔkɔr tɩ yire nɩ a tẽsɔw pʋ̃ɔmɩ za,
ʋ tɩ cãà na ƴɛ̀rɛ a Sore yúor ƴãw,
k'ʋʋ ír a nɩbɛ yel-bier bɛr#46:20 Nyɛ̃ 1Sa 28.8-19..
Currently Selected:
Bɛn Sɩɩra 46: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.