Bɛn Sɩɩra 44
44
A SÃÀKƲM-KORE DANƲ
44—50
1Tɩ danɩ a tɩ sãàkʋm-kore,
a nɩ-yée bɛ ŋa,
mɛ̃ a lɛ bɛ na dɔw tu taa a.
2A Sore kʋ̀ bɛ nɩ
yúor-vɩɛlʋ-danʋ na ɩ kpɛ̃ɛ a,
a nɩ-bɛrɛ na zuo bɛ za
a dɩta-pɛ-yome za a nɛbɛ.
A koro za nɩ-bɛrɛ
3Na-mɩnɛ tɩ be n be so a bɛ naalʋ ten,
nɩbɛ bɛ na tɩ bãwnɩ bɛ tɛr kpɛnʋ a,
yã-wulbɛ na tɛr yúor a bɛ yã zũú a,
yel-nyɛrbɛ a yée na yi a Naaŋmɩn ƴɛ̀rʋ
bɛ na mɩ́ ƴɛ̀r a zũú a.
4Nɩ-bɛrɛ tɩ be n be,
na bãw a bɛ nɩbɛ wulu a,
na-biir na tɩ tɛr yã yaga za a,
yã-bãwnbɛ na sɛb a bɛ tɩɛrʋ a,
wul-wul-karɩ, a bãwfʋ gùrbɛ.
5Yiel-maalbɛ tɩ be n be,
nɩbɛ na sɛb yielu ƴɛ̀r-bie a.
6Nɩbɛ tɩ be n be,
a bɛ naalʋ na ɩ bɛ tɛr kpɛnʋ a,
ɛ́ kpɩɛr a bɛ yie pʋɔ nɩ ƴã-ɓaarʋ a.
7Bɛ za tɩ nyɛ̃ nɩ ƴãwfʋ a bɛ daar,
ɛ́ a nɩbɛ mʋʋrɛ bɛ a bɛ cãafʋ daar.
8Bɛ mɩnɛ yúor cãà na yi,
a nɩbɛ cãà danɛ bɛ.
9Bɛ mɩnɛ mɩ̀ be n be,
nɩr bɛ cãà tɛr a bɛ tɩɛrʋ ɛ.
Bɛ na kpi wa tɔ ka a,
a ɩ na mɛ̃ bɛ bɛ dãw be a.
Bɛ vʋʋrɩ na ɛ́ bɛ bɛr bãwfʋ kãw ɛ,
ɛ́ lɛ n'a a mɩ̀ ŋmɛ̃ a bɛ bibiir zie, a bɛ pùorí.
A Ɩsɩrayɛl nɩbɛ nɩ-kore
10Ɛcɛ nyɛ̃ a tɩ sãàkʋm-kore a,
a nɩ-vɩɛlɩ bʋʋrɛ bɛ ŋa a,
nɩr bɛ yiiri a bɛ ɩ-vɩɛlɩ bɛr ɛ.
11A bɛ bʋ̃-tɛrɩ lʋ̃ɔ nɩ a bɛ bʋʋrɛ,
bɛ bɛr'ɩ gbã-dɩ-bom kʋ̀ a bɛ bibiir.
12A bɛ bʋʋrɛ tu n a wõ-taa,
nɩ a bɛ bibiir mɩ̀, a bɛl zũú.
13A bɛ bʋʋrɛ na be n be kʋralɛ,
bɛ na tɛr'ɩ yúor kʋralɛ.
14A bɛ ƴã-gamɛ gã nɩ nɩ ƴã-ɓaarʋ a bɔw pʋɔ,
ɛcɛ a bɛ yúor na be n be kʋralɛ.
15Nɩ-bʋʋr-yoru na ƴɛ̀rɛ nɩ
a bɛ yã-bãwfʋ ƴɛ̀rʋ,
ɛ́ a lãw nɩbɛ danɛ bɛ.
Enɔkɩ
16Enɔkɩ tɩ pɛlɩ nɩ a Sore pʋɔ,
ʋ ɩ ʋ do a ʋ zie.
Ʋ ɩ n nyɔ-vʋʋrʋ
na lɩɛbɩ cɔw Naaŋmɩn a bãwfʋ,
a nɩbɛ nãà wa dɔwr
lɩɛrɛ taa a pùorí a ƴãw.
Nowe
17Naaŋmɩn tɩ nyɛ̃ nɩ Nowe ʋ ɩ nɩ-mɩŋa mɩŋa.
Bom za na tɩ sãw a lɛn daar a,
a Nowe n'ʋ tɩ ɩ a nɩsaalbɛ bʋʋrɛ nɩ-pɛr.
Ʋl zũú n'a nɩbɛ tɩ cãà cɛ a tẽw zu,
a kʋ̃ɔ-paalʋ pùorí.
18A Sore tɩ maal'ɩ ʋ nɩ wõ-taa a nʋɔr kʋ,
kɛ́ kʋ̃ɔ-paalʋ taa lɛb sãwnɛ bʋ̃-vʋʋra za ɩ.
Abraham
19Abraham tɩ n'ɩ
nɩ-bʋʋr-yaga yaga sãàkʋm-kpɛ̃ɛ,
nɩr bɛ tɩ tɛr yúor man ʋ ɛ.
20Ʋ tu n a Naaŋmɩn-na-do-saa-bɛ-pɩɛl-a wulu,
ɛ́ sàw a wõ-taa ʋ na maal'ɩ ʋ a.
Ʋ ƴãw nɩ a wõ-taa bãwfʋ a ʋ ƴã-ganɩ́,
na ɩ a yʋɔr-ŋmãafʋ a.
A Sore na tɩ ɩ ʋ kaa a lɛn daar a,
ʋ nyɛ̃ na ʋ bɛ lɛb pùor ɛ.
21Alɛ n'a so ʋ tɩ pɔ yel ʋ,
k'ʋʋ na maal'ɩ a nɩ-bʋʋrɛ a ʋ bʋʋrɛ ƴãw,
k'ʋʋ na ɩ na a ʋ bʋʋrɛ
yɛ̀r yãwmɛ mɛ̃ a tẽsɔw tanɛ a,
k'ʋʋ na zɛw nɩ a ʋ bʋʋrɛ yúor,
mɛ̃ a lɛ a ŋmar-bie na do saa,
nɩ k'aa bɛ tẽw na yi n
a Kʋ̃ɔ-kpɛ̃ɛ-kũu tɩ tɔ a Mediterane kʋ̃ɔ-kpɛ̃ɛ,
ʋ na yi n a Efaratɩ man tɩ tɔ a tẽw baarʋ zie.
Ɩzaakɩ nɩ Zakɔb
22-23A Sore mɩ̀ tɩ ƴãw nɩ
a nɔ-been nɛ kʋ̀ a Ɩzaakɩ,
a ʋ sãà Abraham zũú.
Al pùorí ʋ kaa ír Zakɔb,
tu n ʋ a ʋ wõ-taa nɩ a ʋ maalʋ,
a nɩsaalbɛ za maalʋ ƴãw.
A Sore tɩ ɩ na ʋ bãwnɩ a ʋ na na maalɩ ʋ a.
Ʋ tɩ kʋ̀ ʋ nɩ a tẽw ʋ na na so a,
ʋ ŋma ʋ põ ziir pie nɩ ayi
kʋ̀ a dɔwlʋ pie nɩ ayi.
Moyiir
23bA Zakɔb bʋʋrɛ pʋɔ a,
a Sore tɩ ɩ na nɩ-vla
na pɛlɩ a nɩbɛ za pʋɔ a, yi.
Currently Selected:
Bɛn Sɩɩra 44: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.