Bɛn Sɩɩra 43
43
A salom nɩ a mʋ̃tɔ̃w
1Vɩɛlʋ bɛ n'a a salom vɩɛl a saa-zu,
ɛ́ pɛlɩ parpar ɛ!
Nyɛ̃ vɩɛlʋ ʋ na mɩ́ vɩɛl
bɛ na mɩ́ wa nyɛ̃ ʋ a cãà pʋɔ a!
2A mʋ̃tɔ̃w na mɩ́ wa sãá a,
ʋ mɩ́ yel'ɩ a ʋ puru daar
a lɛ a Naaŋmɩn-na-do-saa-bɛ-pɩɛl-a
ton na ɩ nɔ-ɓãan a.
3Ʋlɛ wa do põ-zɛ̃-taa a,
ʋ mɩ́ ɩ n a tẽsɔw ʋ ko.
Ãa n'ʋ na tʋ̃ɔ́ a ʋ tʋlʋ?
4Bɛ mɩ́ zuw nɩ pɩɛlʋ ƴãw
a vũu a sãa pʋɔ bʋ̃-maalɩ ƴãw,
ɛcɛ a mʋ̃tɔ̃w na mɩ́ sɛ̃ a tan a
tʋlɛ na zuo gb'a ata.
Ʋ mɩ́ ɩ na úur-tʋlʋ yire a ʋ pʋɔ,
ʋ mɩ́ nyɩwrɛ na, cuoli a mimie.
5A Sore na ír ʋ a ɩ n kpɛ̃ɛ,
ʋ mɩ́ ƴãw na ʋ pùr ɛ́ cen tɩ kpɛ.
A cuw
6A cuw mɩ̀ a, a ʋ daar a,
ʋ mɩ́ ƴãw nɩ a bom za daar,
ɛ́ wule a zie na cere tɔlɛ a.
7A salom zu bʋ̃-nyɩwra ŋa
na mɩ́ siwre tɩ bɔr a,
ʋlɛ n'ʋ bɛ ƴãwnɛ nɩ a cuwr.
8A cuw yúor'ʋ bɛ por'ɩ a yũon pʋɔ cuw.
A ʋ kɛrʋ mɩ́ ɩ n nɔ-ɓãan,
a lɩɛbʋ ʋ na lɩɛbɛ a pʋɔ!
Ʋlɛ n'ɩ a ŋmar-bie na nyɩwrɛ a salom zu a cãà.
A ŋmar-bie
9A ŋmar-bie cãà n'ɩ a salom vɩɛlʋ,
a Sore zi-kɛrɩ pɩ̃ɛmɛ na nyɩwrɛ a n'a.
10A Sore na ɩ sõw a ƴɛ̀rʋ zũú,
a mɩ́ àr'ɩ a be ʋ na ƴãw a a,
ɛ́ kãw za bɛ bɛrɛ a ʋ zi-bera ɩ.
A zie a Naaŋmɩn na ír a nɔ-ɓãa-yele
11Jɩ́r a sa-gõguo,
ɛ́ puori a sob nɛ na maalɩ ʋ a,
a ʋ vɩɛlʋ ɩ n nɔ-ɓãan.
12Ʋ mɩ́ tʋ̃ɔ̀ nɩ cãà gʋɔ a salom zu,
a Naaŋmɩn-na-do-saa-bɛ-pɩɛl-a nuru n'a dɔl ʋ.
13A Sore mɩ́ yel'a,
ɛ́ a sa-pupure lore,
ʋ mɩ́ ɩ na saa nyɩwrɩ yi,
mɛ̃ a lɛ ʋ na yel a.
14À ŋá n'a a ʋ bome
ʋ na maal bin a ziir mɩ́ yuo,
ɛ́ a zũzuwe ƴawr yire mɛ̃ lili a.
15A ʋ fãw mɩ́ ɩ na a zũzuwe kpawlɩ,
ɛ́ pùr yaarɩ ɩ sa-bi-kube.
17aA ʋ saa-tanʋ gɔmɛ
mɩ́ ɩ na a tẽsɔw gbiwri.
16Ʋlɛ wa sãá a, a tan mɩ́ dam'a,
ʋlɛ wa bɔbr a, ʋ mɩ́ ɩ na
a saa-pɛrɩ́-dʋrʋ-lowr sɛsɛb fu,
17bbɩɩ a saa-pɛrɩ́-gʋba-lowr saa-sɛsɛb,
bɩɩ a kʋ̃ɔ-kpɛ̃ɛ zu sɛsɛb-pɩl.
Ʋ mɩ́ ɩ na a sa-pupure lore mɛ̃ lili na siwr a,
a mɩ́ lore na mɛ̃ sãsoge na siwr a tẽw a.
18A pɛlʋ a na pɛlɩ vɩɛl a mɩ́ ɩ n a mimir nʋ̃ɔ̀,
ɛ́ alɛ wa lore a, a mɩ́ ɩrɛ nɩ nʋ̃ɔ̀ yaga.
19A Sore mɩ́ ɩ na a sa-bi-mɩrmɩr na gúr a,
a pàw a tẽw mɛ̃ nyaar-zɔ̃ a,
ɛ́ a ƴawr mɩ́ ɩ a kpawlɩ ɩ mɛ̃ gɔ-nɔ-ɓɩlɓɩl a.
20A saa-pɛrɩ́-gʋba-lowr sɛsɛb-ɓaar wa fure a,
a kʋ̃ɔ-kuur mɩ́ pàw nɩ a kʋ̃ɔ zu-sɔw,
a sɛsɛb ŋa mɩ́ fu n kʋ̃ɔ za zu,
ɩ mɛ̃ ʋ pàw ʋ na nɩ kur-pãgala a.
21A sɛsɛb-tʋlʋ kpãkpã mɩ́ dɩrɛ nɩ a tan
ɛ́ vuule a wɛja-kpalɛ,
ʋ mɩ́ dɩ n a váar nɩ a mɔ̃-ɓaar mɛ̃ vũu a.
22Ɛcɛ a zũzuwr-ɓaar
mɩ́ ɩ n tɩ̃ɩ fɔ̃wlɛ à á ŋá za ƴãw.
A tʋl-hɛ̃hɛ̃ pùorí a,
a ɓɩɛlʋ mɩ́ lɛb'a wa n a nʋ̃ɔ̀.
23Mɛ̃ a lɛ a Sore na tɩɛrɩ bin a,
ʋ tʋ̃ɔ́ nɩ a kʋ̃ɔ-kpɛ̃ɛ,
ɛ́ ƴãw kʋ̃ɔ-kpɛ̃ɛ-sɔgɔ-ten a be.
24A bɛlɩ dem na mɩ́ duwre a kʋ̃ɔ-kpɛ̃ɛ zu a,
mɩ́ manɛ nɩ a yel-faar
fʋ na na tʋ̃ɔ́ càarɩ a ʋ zu a,
a mɩ́ ɩ tɩ nɔ-ɓãan yaga za.
25Bʋ̃-bõbome nɩ bome
na ɩ nɔ-ɓãan a be n a be,
dʋ̃-pɛ-bʋʋrɛ za nɩ a kʋ̃ɔ-kpɛ̃ɛ pʋɔ dʋ̃-bɩɩr bɩɩr.
26A Naaŋmɩn zũú a,
a ʋ nɩ-tona mɩ́ ta n a ʋ zi-cena,
ɛ́ a ʋ ƴɛ̀rʋ zũú a yele za maalɩ.
27Tɩ nãá tʋ̃ɔ́ na cãà ƴɛ̀r cɛlɩ,
ɛ́ bɛ yel a za ɩ.
A tɩ ƴɛ̀rʋ nʋɔr-kʋb n'ɩ kɛ́ a Sore n'ɩ bom za.
28Nyɩnɛ n'a a fãw be
tɩ na ír'ɩ a ʋ yúor-vɩɛlʋ-danʋ?
Ʋ ɩ n a Naaŋmɩn na ɩ kpɛ̃ɛ a,
ʋ zuo nɩ a alɩ bome nɛ za ʋ na maalɩ a.
29A Sore bɛ tɛr dɩ̃ɛnʋ ɛ,
ʋ ɩ n kpɛ̃ɛ bɛ pɩɛl ɛ,
ɛ́ a ʋ kpɛnʋ ɩ nɔ-ɓãan.
30A Sore danʋ ƴãw a,
nyɩ zɛw ʋ mɛ̃ a lɛ nyɩ na na tʋ̃ɔ́ a,
ɛcɛ ʋ na cãà na zuo a lɛ nyɩ na yere a.
Nyɩ ƴãw a nyɩ fãw za a ʋ zɛwfʋ ƴãw,
nyɩ taa bàlɛ ɩ, bʋ̃ʋ n'ʋ vɛ̃,
nyɩ kʋ̃ baarɩ ɛ.
31Ãa n'ʋ nyɛ̃ a Sore
na tʋ̃ɔ́ manɩ a lɛ ʋ na ŋmɛ̃ a?
Ãa n'ʋ na tʋ̃ɔ́ zɛw ʋ mɛ̃ a lɛ ʋ na sɛwnɩ a?
32A ʋ yel-maalɩ blãlɛ n'a tɩ nyɛrɛ,
ɛcɛ yel-yaga a mɩnɛ tɩ na bɛ nyɛrɛ a,
cãà na ɩ bɛrɛ zuo.
33Yel-mɩŋa n'a,
a Sore n'ʋ ír bom za,
ʋʋ kʋ̀ n a yã-bãwfʋ
a bɛlɩ dem na tu ʋ bɛ lɛb pùor a.
Currently Selected:
Bɛn Sɩɩra 43: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.