Bɛn Sɩɩra 41
41
A kũu
1'Woi, kũu u, a fʋ tɩɛrʋ tuo tɔ,
a nɩr na vʋʋrɛ nɩ ƴã-ɓaarʋ
a ʋ bʋ̃-tɛrɩ sɔgɔ a zie,
a nɩr bom za na bɛ fɛrɛ,
ɛ́ bom za tuur ʋ a zie,
a nɩr na cãà na mɩ́ tʋ̃ɔ́ wõ nʋ̃ɔ̀ a zie!
2Ʋ̃'hʋ̃ʋ! kũu u, a fʋ waa mɩ́ vɩɛl'ɩ
a nã́w sob na bɛ tɛr fãw a zie,
a nɩr na kor ɛ́ yel-fɛrɩ dĩ ʋ a zie,
a nɩr na gaarɩ ɛ́ nyɔw ʋ tʋɔra gu a zie.
3Ɩ̃ bie e, ta zɔrɛ a kũu dɛ̃bɩ̃ɛ ʋlɛ wa ta b a ɩ.
Tɩɛrɩ a bɛlɩ dem na de fʋ niwn a yele,
nɩ a bɛl na na wa a fʋ pùorí a.
4A kũu ɩ n yel a Sore na yel
bʋ̃-vʋʋra za ƴãw a.
Bʋ̃ʋ n'ʋ so fʋ na zawrɩ bom
a Naaŋmɩn-na-do-saa-bɛ-pɩɛl-a
na nyɛ̃ ʋ ɩ bʋ̃-vla a nɩbɛ za ƴãw a?
Fʋ vʋʋr'ɩ yome pie,
yome kʋba bɩɩ yome túr a,
nɩr bɛ yere fʋ a kpɩmɛ tẽw
a fʋ nyɔ-vʋʋrʋ ƴãw ɛ.
A lɛ a na na ŋmɛ̃ a nɩ-faar zie a
5A yel-bebe dem bibiir
mɩ́ wa ɩ n bibi-faar faar,
na mɩ́ bere a nɩbɛ
na bɛ ƴãwnɛ a Sore a yie pʋɔ a.
6A yel-bebe dem bibiir gbã-dɩrʋ na bɔr'a,
vĩ na nyɔw nɩ a bɛl mɩŋa bibiir kʋralɛ.
7Sãà na bɛ ƴãwnɛ a Sore a,
a ʋ bibiir na yere ʋ na,
bʋ̃ʋ n'ʋ vɛ̃, ʋlɛ n'ʋ so a bɛ vĩ.
8Wé ãi! Nyɩɩm na bɛ ƴãwnɛ a Sore a,
nyɩɩm na zawrɩ
a Naaŋmɩn-na-do-saa-bɛ-pɩɛl-a wulu bɛr a!
9Ŋmɛ-ƴãw tɛwr ƴãw n'a nyɩ mɩ́ dɔw
ɛ́ a ŋmɛ-ƴãw n'ɩ a nyɩ bom a nyɩ kũu daar.
10Bom za na yi a tẽsɔw pʋɔ a
na lɛb'a kpɛ a tẽsɔw pʋɔ,
lɛ n'a a ŋmɛ̃ a nɩbɛ na bɛ ƴãwnɛ a Sore a zie:
bɛ mɩ́ yi n a ŋmɛ-ƴãw pʋɔ tɩ kpɛ a loba pʋɔ.
A yo-vla
11A nɩsaalbɛ mɩ́ kone na nɩr wa kpi a,
ɛcɛ a yel-bebe dem yúor bɛ vɩɛl ɛ, ʋ na bɔr'a.
12Cɛlɛ a fʋ yo-vla zie,
bʋ̃ʋ n'ʋ vɛ̃, ʋ na cãà nɩ be a fʋ pùorí,
cɛlɩ tɩ zuo salm-zɩɛ na gbõ taa ziir túr a.
13A nyɔ-vʋʋrʋ na tɛr nʋ̃ɔ̀ a bibie tɛr'ɩ nʋɔr,
ɛcɛ a yo-vla mɩ́ be n be kʋralɛ.
A vĩ na ɩ vĩ a
14Ɩ̃ bibiir i, nyɩ tɛr a wulu
bɛ na wul nyɩ a zoomlɛ.
Yã-bãwfʋ na sɔwlɩ a,
bɩɩ na-bom na bɛ tɛr nyɛ́b a,
a za ayi yel-ɩra n'ɩ bo?
A bɛ tɛr yel-ɩra ɩ.
15Nɩr na píwle a ʋ dãbolu a,
ʋ sa n nɩr na píwle a ʋ yã-bãwfʋ a.
16A na ɩ à ŋá a, ɩ̃ na yel'ɩ a alɩ bome nɛ a na fɛr
k'aa mɩ́ ɩrɛ nyɩ vĩ a kʋ̀ nyɩ.
Bʋ̃ʋ n'ʋ vɛ̃, vĩ-sãsaralɛ tɛrʋ bɛ vɩɛl ɛ,
ɛ́ lɛb waar mɩ̀, a yele jielu
bɛ ɩ been a nɩbɛ za zie ɩ.
17Nyɩ zɔrɛ vĩ a pɩ̃ɔ-yele maalʋ ƴãw,
a nyɩ sãà nɩ a nyɩ mã niŋé.
Nyɩ zɔrɛ vĩ a ziri ŋmãafʋ ƴãw,
nɩ-kpɛ̃ɛ nɩ nɩr na tɛr kpɛnʋ a niŋé.
18Nyɩ zɔrɛ vĩ
a nʋɔr gãwfʋ ƴãw, ƴɛ̀r-dɩrbɛ niŋé,
a Naaŋmɩn wulu zawrʋ ƴãw
a nɩbɛ lãw niŋé,
a tɔ́ bɩɩ a bá faa maalʋ ƴãw a bɛ niŋé,
19a nyãnyuwlu ƴãw a nyɩ kpɛ-pɩɛl dem zie.
Nyɩ zɔrɛ vĩ a pɔ kɛ́ bɛ ír a pɔb ƴãw,
bɩɩ a wõ-taa pùor-bɛ-tub ƴãw,
à dɩrɛ kɛ́ dɔwlɩ a kpãkpãwnyũgbiel a tabal zu ƴãw,
à dier a bom bɩɩ tɩrɛ a bom lãwnɩ jewru ƴãw.
20Nyɩ zɔrɛ vĩ a yãan nyɩ na bɛ mɩ́ sɔw
a bɛlɩ dem na puore nyɩ a ƴãw,
a pɔw-yɛm jɩ́rʋ ƴãw.
21Nyɩ zɔrɛ vĩ a nyɩ tẽ-bi-tɔ
nyɩ na bɛ ŋmɛlɛ kaar a ƴãw,
a nɩr bʋ̃-sora bɩɩ bom bɛ na kʋ̀ ʋ a deb ƴãw.
Nyɩ mɩ̀ zɔrɛ vĩ a dɛb-yũo pɔw jɩ́rʋ ƴãw,
22tõ-tõ-bi-pɔw fʋ na kʋlmalɛ nɩ a ƴãw,
a ʋ gado taw-pɩɛlʋ ƴãw.
Nyɩ zɔrɛ vĩ a nyɩ bárɩ tʋb ƴãw,
bɩɩ a bɛ yelu ƴãw,
a bom nyɩ na kʋ̀ bɛ a zũú.
La Bible en Dagara © Alliance Biblique du Burkina Faso, 2013.