Bɛn Sɩɩra 40
40
A nɩsaal kpɩɛrʋ
1A Sore ír'ɩ niw-sʋba
na ta al a, nɩsaal za ƴãw.
Ʋ mɩ́ tuo nɩ a nɩsaalbɛ to-tɩbrʋ,
a ʋlɩ bibir bɛ na mɩ́ yi a bɛ mã puori a
tɩ ta n a lɛ bɛ na mɩ́ lɛb kpɛ a tẽsɔw pʋɔ
na ɩ a bʋ̃-vʋʋrɩ za mã a.
2A ʋlɩ bom nɛ na n'ʋ mɩ́ so
a bɛ tɩɛrʋ za ɛ́ ɩrɛ bɛ dɛ̃bɩ̃ɛ a,
a ʋlɩ bom nɛ bɛ na mɩ́ pi pée gùre nɩ a,
ʋlɛ n'ɩ a bɛ kũu bibir.
3A na tĩ a nãà
na zɩ̃ a ʋ naalʋ-dà-kɔw-yúor zu,
ɛ́ tɩ tɔ a bãbàal na zɩ̃ a tẽw,
a tãpɛlʋ pʋɔ a,
4a na tĩ a sob nɛ na su a kpar-kpɛ̃ɛ zɩɛ,
vɔblɩ nɩ a nãà-kpawʋɔ a,
ɛ́ tɩ tɔ a sob nɛ na su pɛn-sãsaralɛ kparʋ a,
bɛ za yele ɩ n been.
5Bɛ za bãw nɩ a su-yãyaar,
a nyuur, a tɩɛrʋ na damnɛ fʋ a,
nɩ a dɛ̃bɩ̃ɛ,
a kũu dɛ̃bɩ̃ɛ, a pʋ-bier nɩ a zɛb-taa.
Ɛ́ bɛlɛ wa gã kɛ́ bɛ pɩ̃ɛnɩ a,
tɩɛrʋ a mɩnɛ mɩ́ damnɛ bɛ nɩ a bɛ gʋ̃ɔ pʋɔ.
6Bɛlɛ wa pɩ̃ɛnɩ zaa pʋrɩ a,
bɛ mɩ́ tĩ na zanɛ, ɛ́ wone tuo
mɛ̃ a mʋ̃tɔ̃w daarɩ́ a.
Dɛ̃bɩ̃ɛ mɩ́ ɩrɛ bɛ na
a ʋlɩ bom nɛ bɛ na mɩ́ nyɛ̃ a zánʋ pʋɔ a ƴãw,
mɛ̃ sojarɩ na yi zɛbr zie zɔ a.
7A lɛn daar bɛ na na mɩ́ nyɛ̃ a faafʋ a,
bɛ mɩ́ zaw na, ɛ́ a ɩ bɛ nɔ-ɓãan,
bɛ na mɩ́ zɔ dɛ̃bɩ̃ɛ zawlalɛ a ƴãw.
8A alɩ bome nɛ na gùre a bʋ̃-vʋʋrɩ za,
a dʋ̃w tɩ tɔ a nɩsaal a,
ɛ́ na kpɛ faa gb'a ayopõi dɔwlɩ
a yel-bebe dem ƴãw a,
9alɛ n'ɩ a kũu bɩɩ nɩr na kʋ ʋ tɔ a,
zɛb-taa, zɛbr, tẽw na kàbr nyùur a,
kɔ̃, ziir na sãw a, bàal-faar na yi a.
10A Naaŋmɩn ír'ɩ à á ŋá za a bɛlɩ dem
na bɛ tuur a wulu a ƴãw,
ɛ́ bɛlɛ nɛbɛ tɩ so a kʋ̃ɔ-paalʋ wa.
11Bom za na yi tẽsɔw pʋɔ a,
na lɛb'a kpɛ a tẽsɔw pʋɔ,
ɛ́ bom za na yi kʋ̃ɔ pʋɔ a,
na lɛb'a kpɛ a kʋ̃ɔ-kpɛ̃ɛ pʋɔ.
A ɩ-ɩrɩ na bɛ tu a mɩnʋ a na baar'a
12A bʋ̃-kʋ̀rɩ bɛ na mɩ́ tɩr
a tɔ nʋɔr ŋmɛb ƴãw a,
a ɩ-ɩrɩ na bɛ tu a mɩnʋ a,
à á ŋá za na bɔr'a,
ɛcɛ a pùor-bɛ-lɛbrʋ na be n be kʋralɛ.
13A nɩ-faar na-bome
na ɩ na mɛ̃ bàa na sɩr a.
A na tɔl'a mɛ̃ saa na tanɩ wabapapa
saa waa daar a.
14Nɩr na tɩrɛ a na tʋ̃ɔ́ na cɩlɛ.
Ɛcɛ a bɛlɩ dem na zawrɛ a wulu a,
na bɔr'ɩ bɛ za pap!
15A bɛlɩ dem na bɛ ƴãwnɛ a Sore a,
yie pʋɔ a, a bibiir kʋ̃ yãwmɛ ɩ.
Pì-kpam'ʋ na be be
a nɩ-dɛgɛ bɛ ŋa nyɩgɛ tɛb ƴãw.
16A bàa-kɛkɛr na búle kʋ̃ɔ nʋɔr,
man kõkowr zu a,
bɛ de nɩ niwn vʋ̃ɔ ʋ mʋ̃ɔ za ƴãw.
17Ɛcɛ maalʋ mɩ́ ɩ na mɛ̃ zaadɛ̃-vla vla a,
ɛ́ bom fʋ na kʋ̀ nɩ-kɔmɛ a
bɛ tɛr yiiru towtow ɛ.
A bom na vɩɛl a, nɩ a bom na vɩɛl gãw a
18Nɩr na so ʋ tʋɔra a,
nɩ nɩr na tone a,
a bɛ nyɔ-vʋʋrʋ mɩ́ nʋmɛ na.
Ɛcɛ nɩr na nyɛ̃ na-bom a
mɩ́ wone nɩ nʋ̃ɔ̀ zuo bɛ za ayi.
19Bibi-yaga tɛrʋ bɩɩ tẽ-kpɛ̃ɛ mɛb
mɩ́ ɩ na nɩr tɛr yúor,
ɛcɛ bɛ mɩ́ nɔ̃w nɩ pɔw na ɩ pɔw a
gãw a yele ayi á ŋá.
20A divɛ̃ nɩ a bʋ̃-ŋmɩɛrɩ ŋmɛb waar'ɩ nɩ su-nʋ̃ɔ̀,
ɛcɛ a yã-bãwfʋ fʋ na nɔnɛ a
waar'ɩ nɩ su-nʋ̃ɔ̀ gãw à á ŋá.
21A wele nɩ a korijom kɔkɛɛ mɩ́ vɩɛl'a,
ɛcɛ ƴɛ̀r-bir-vla vɩɛl'a gãw a.
22A pɔ̀lʋ nɩ a vɩɛlʋ a,
alɛ n'a a mimir nɔnɛ a jɩ́rʋ,
ɛcɛ ʋ nɔnɛ nɩ a póru ka-va-sɛbl jɩ́rʋ
zuo a bome á ŋá ayi.
23Bá nɩ tɔ sob tɛr'ɩ nyɛ̃-taa daar,
ɛcɛ pɔw nɩ ʋ sir nyɛrɛ nɩ taa zuo lɛ.
24Yɛbr bɩɩ nɩsaal-son
mɩ́ sõw nɩ a kpɩɛrʋ daar,
ɛcɛ a nɩ-kɔmɛ bom kʋb mɩ́ sõw na zuo lɛ.
25A salm-zɩɛ nɩ a salm-pla tɛrʋ
mɩ́ ɩ na fʋ bɛr tɩɛrʋ,
ɛcɛ bɛ mɩ́ nɔ̃w nɩ yã-vla na wul a zuo a.
26A naalʋ fʋ na kpɛ a,
nɩ a fãw fʋ na tɛr a,
a mɩ́ ɩ na fʋ bɛr tɩɛrʋ,
ɛcɛ a Sore zɔba mɩ́ ɩ na
fʋ bɛr tɩɛrʋ gãw lɛ.
A Sore zɔba wa be be a,
fʋ bɛ bɔbr bom guur ɛ,
fʋ bɛ lɛb bɔbr sõwfʋ ɛ.
27A Sore zɔba mɩ́ ɩ na
fʋ ɩ mɛ̃ zaadɛ̃-vla vla a,
ʋ mɩ́ gù fʋ nɩ vla zuo yúor za.
A zɛ̀lʋ̀
28Ɩ̃ bie e, ta ɩ zɛl-zɛlɛ zɛlɛ dɩrɛ ɩ.
A kũu sa a zɛ̀lʋ̀.
29Nɩr na mɩ́ nyɛ̃ a ʋ tɔ bʋ̃-dɩrɩ cen gù a,
a ʋ nyɔ-vʋʋrʋ kʋ̃ tʋ̃ɔ́ ɩ nyɔ-vʋʋrʋ ɛ.
Ʋ mɩ́ dɛwr'ɩ ʋ tʋɔra
nɩ dɩb ʋ na bɛ bɔ páw a.
Nɩr na bãw ɛ́ bɛ wul ʋ vla a,
bɛ ɩrɛ à à ŋá ɩ.
30A vĩ-bɛ-zɔrɛ zie a,
bʋ̃-dɩra ʋ na zɛlɩ a
mɩ́ nʋmɛ nɩ a ʋ nʋɔrɩ́,
ɛcɛ ʋ mɩ́ dɩrɛ nɩ a ʋ puori mɛ̃ vũu a.
La Bible en Dagara © Alliance Biblique du Burkina Faso, 2013.