Bɛn Sɩɩra 35
35
A Naaŋmɩn wulu nɩ a bagɛ yele
1A Sore wulu tub
nɩ de-kʋ̀b bʋ̃-yaga tɩrʋ ɩ n been.
2A nɛ-ƴãwnɩ pùor-tub
ɩ n lãw-taa bàwr maalʋ.
3A maalʋ fʋ na maalɩ nɩr a
ɩ na mɛ̃ zɔ̃-vla vla de-kʋ̀b bom a.
4Nã́w sob fʋ na kʋ̀ bom a
ɩ n danʋ bàwr fʋ maalɩ.
5A ʋlɩ bom na mɩ́ pɛlɩ a Sore pʋɔ a n'ɩ
kɛ́ bɛ mɩ́ zãá nɩ a yel-faa.
À zãá nɩ a yel na bɛ tu a mɩnʋ a,
ɩ n yel-bier ír-bɛrʋ bàwr maalʋ.
6A na saa ɩ à ŋá a,
ta wa nũ-zawl a Sore niŋé ɩ.
7Bʋ̃ʋ n'ʋ vɛ̃, ʋ yel'a
kɛ́ tɩ maalɛ a bagɛ á ŋá za.
8A nɩ-mɩŋa de-kʋ̀b bom
ɩ n de-kʋ̀b bom na vɩɛl ʋ za a,
a nyũu na vɩɛl a mɩ́ do na ta
a Naaŋmɩn-na-do-saa-bɛ-pɩɛl-a.
9A nɩ-mɩŋa bàwr mɩ́ pɛlɩ nɩ a Sore pʋɔ,
ʋʋ kʋ̃ yiiri a al bɛ na mɩ́ nyɩw
a bàwr-maal-kuur zu a ʋ ƴãw a ɩ.
10Fʋ̃ʋ wa íre a Sore yúor-vɩɛlʋ-danʋ a,
fʋ̃ʋ ɩ nɩr na tɩrɛ a,
ɛ́ ta tɩrɛ a fʋ kɔb bʋ̃-dan zʋmnɛ nɩ ɛ.
11Mɩ́ ɩ a fʋ niwn ʋ vɩɛl
de-kʋ̀b bom za fʋ na tɩrɛ a ƴãw,
ɛ́ mɩ́ de a fʋ tɛra ziir pie sob tɩr'ɩ nʋ̃ɔ̀.
12Mɩ́ kʋ̀ a Naaŋmɩn-na-do-saa-bɛ-pɩɛl-a
sɛw a bʋ̃-kʋ̀rɩ ʋ na kʋ̀ b a,
mɩ́ tɩr man nɩ a fʋ fãw.
13Bʋ̃ʋ n'ʋ vɛ̃,
a Sore mɩ́ tɩr'a yáa a san,
ʋ na lɛb'a kʋ̀ b gb'a ayopõi dɔwlɩ.
A Sore ɩ n ƴɛ̀r-dɩrɛ na tuur yel-mɩnʋ a
14Ta yel kɛ́ fʋ kʋ̀ bʋ̃-kʋ̀rɩ a Sore
ŋmɛ ʋ nʋɔr ɛ, ʋ bɛ dier a ɩ.
15Ta ɩrɛ ƴãwn bàwr
na bɛ tu mɩnʋ a ƴãw ɛ,
bʋ̃ʋ n'ʋ vɛ̃, a Sore ɩ n ƴɛ̀r-dɩrɛ
na bɛ mɩ́ jɩ́rɛ a lɛ a nɩr na sãá a ɩ.
16Ʋ bɛ yere nã́w sob na n'ɩ a nɩr a ɩ,
ʋ mɩ́ sàw na de a sob nɛ
bɛ na dɔwrɛ a puoru.
17Ʋ bɛ zawrɛ a bi-kpieb yãayãa zɛlʋ
nɩ a pɔw-kʋɔr kpɩɛrʋ ʋ na manɛ a ɩ.
18Ʋ nyɛrɛ nɩ a mʋta-kʋ̃ɔ
na vʋɔrɛ a pɔw-kʋɔr kɔ́rɛ a.
19Ʋ wone nɩ a sãwna
a pɔw-kʋɔr na manɛ
càarɛ nɩ a sob nɛ na ɩrɛ ʋ ʋ kone a.
20Sob nɛ na tone a Sore tome a,
a Sore pʋɔ na pɛlɩ nɩ a ʋ ƴãw,
ɛ́ a ʋ zɛlʋ na do na tɔ a salom.
21Yel-mɩŋa, a bãbàalbɛ puoru
mɩ́ do na tɩ tɔ a salom.
A bɛ puoru bɛ wa ta a Sore a,
bɛ bɛ pɩ̃ɛnɛ ɩ,
a Naaŋmɩn-na-do-saa-bɛ-pɩɛl-a
bɛ wa sɔw bɛ a, bɛ bɛ bɛrɛ ɩ,
22ʋlɛ bɛ wa dɩ a ƴɛ̀rʋ kʋ̀
a nɩ-mɩn a tu a yel-mɩŋa a ɩ.
A Sore kʋ̃ cɛlɩ ɛ,
ʋ kʋ̃ nyɔw ʋ tʋɔra a bɛlɩ dem
na ɩrɛ a kpɩɛr bɛ a ƴãw ɛ.
Ʋ na wɛl'ɩ bɛlɩ dem za
na bɛ zɔrɛ nɩr za nɩbaalʋ a sɩɩr.
23Ʋ na yáa nɩ a san a nɩ-bʋʋr-yoru zu.
Ʋ na ɩ na pɔ̀lʋ dem yaga yaga baarɩ,
ɛ́ ɩ a nɩ-faar kpɛnʋ baarɩ.
24A Sore na ya n a nɩsaalbɛ
tu n a bɛ ɩ-ɩrɩ nɩ a bɛ tɩɛrʋ.
25Ʋ na tu n a ʋ nɩ-bʋʋrɛ yele pùor,
ʋ na tɛr'ɩ su-ɓaarʋ a bɛ zie, ɩ̀ kɛ̀ nʋ̃ɔ̀ kpɛ bɛ.
26A kpɩɛrʋ daar a,
a ʋ su-ɓaarʋ dɛ na mɩ́ ɩ vla,
mɛ̃ saa zũzuge wɛr daar a.
La Bible en Dagara © Alliance Biblique du Burkina Faso, 2013.