Bɛn Sɩɩra 34
34
A zánʋ yele
1Nɩbɛ na bɛ tɛr yã a yõ nɛbɛ
a tɩɛrʋ na bɛ be nãà maalɩ a bɛ̀lɛ,
ɛ́ a dãbole nɛbɛ a zánʋ mɩ́ damnɛ.
2Nɩr na cɛlɛ a ʋ zánʋ zie a,
ɓaarʋ n'ʋ ʋ bɔbr k'ʋʋ nyɔw,
bɩɩ sɛsɛb'ʋ ʋ diwr.
3A bʋ̃-sɩza dasule tɛwr'ʋ
fʋ mɩ́ nyɛ̃ a zánʋ pʋɔ,
mɛ̃ a caala pʋɔ fʋ na mɩ́ nyɛ̃
a niwn dasule tɛwr a.
4Bʋ̃-vla na tʋ̃ɔ́ na yi bʋ̃-dɛwr pʋɔ bɩɩ?
Yel-mɩŋa na tʋ̃ɔ́ na yi ziri pʋɔ ɔ?
5Bàwr-bʋwrbɛ ƴɛ̀rʋ,
bãwfʋ na wule nɩdaar yele a,
zánʋ, à á ŋá za bɛ tɛr pɛr ɛ.
Pɔw na dɔwr a wone ʋ a,
mɩ̀ mɩ́ tɩɛrɛ nɩ a yele á ŋá.
6A Naaŋmɩn-na-do-saa-bɛ-pɩɛl-a
zie bɛ wa n'a a yi a, fʋ̃ʋ ta cɛlɛ a zie ɩ.
7Bʋ̃ʋ n'ʋ vɛ̃, a zánʋ ɩ na nɩ-yaga bɔr,
ɛ́ a bɛlɩ dem na tɩ ƴãw
a bɛ tɩɛrʋ a ƴãw a, bɛ lo na.
8A Sore Wulu bɛ tɛr
a ziri á ŋá taabɛ yel-ɩra ɩ,
ɛ́ a yã-bãwfʋ mɩ́ ƴɛ̀r'ɩ vla za
nɩ a nɩr na bɛ lɛbr pùor a nʋɔr.
A yɔb tɛr'ɩ yel-ɩra
9Nɩr na yɔ a bãw nɩ yaga,
ɛ́ nɩr na bãw a mɩ́ ƴɛ̀rɛ nɩ nɩ yã.
10Nɩr na bɛ wõ tuo a mɩ́ bãwnɩ blãlɛ,
11ɛcɛ sob nɛ na yɔ a mɩ́ bãw nɩ yel-yaga.
12Ɩ̃ nyɛ̃ nɩ yel-yaga a ɩ̃ yɔb pʋɔ,
ɛ́ a yele ɩ̃ na bãw a zuo nɩ a al ɩ̃ na na tʋ̃ɔ́ yel a.
13Gb'a a ŋmɩn za,
a nãá mɩ́ tɩ ɩ m'ɩ a kũu,
ɛcɛ a ɩ̃ bãwfʋ n'a faa mɛ̃.
A Naaŋmɩn zɔba
14Bɛlɩ dem na zɔrɛ a Sore a
na vʋʋrɩ na cɛlɩ,
15bʋ̃ʋ n'ʋ vɛ̃, a sob nɛ
na na tʋ̃ɔ́ faa bɛ a ƴãw n'a bɛ ƴãw a bɛ tɩɛrʋ.
16Sob nɛ na zɔrɛ a Sore a,
bɛ tɛr bom za dɛ̃bɩ̃ɛ ɩ,
ʋ bɛ mɩ́ màwr towtow ɛ,
ʋ na ƴãw a ʋ tɩɛrʋ a ʋ ƴãw a zũú.
17Zu-nʋ̃ɔ̀ sob'ɩ sob nɛ na zɔrɛ a Sore a!
18Ãa n'ʋ na ɩ a ʋ kpa-tɩɛrɛ?
Ãa n'ʋ na sõw ʋ?
19A Sore mimie mɩ́ tori nɩ
a bɛlɩ dem na nɔnɛ ʋ a.
Ʋ mɩ́ gù bɛ na nɩ fãw,
ʋ mɩ́ tɩɛ bɛ na tɛr kpɛ̃w kpɛ̃w za.
A Sore mɩ́ piw nɩ a sɛsɛb-tʋlʋ,
ʋ mɩ́ ɩ n ɓaarʋ a mʋ̃tɔ̃-tuo daar,
ʋ mɩ́ gù n a ʋ nɩbɛ a kpɩɛrʋ ƴãw,
ʋ bɛ mɩ́ sàw bɛ lo ɩ.
20Ʋ tɩrɛ nɩ kanyir,
ɩrɛ nʋ̃ɔ̀ caalɛ a niwn.
Ʋ tɩrɛ nɩ ƴã-ɓaarʋ,
nyɔ-vʋʋrʋ nɩ maalʋ.
A puoru ʋl na ɩ sɩza a
21A dʋ̃w fʋ na ɩ a ɩb a bɛ tu sɔ́r,
ɛ́ fʋ páw maal'ɩ bàwr a,
Naaŋmɩn n'ʋ fʋ ɩrɛ laar.
22A bɛlɩ dem na zawrɛ a ʋ wulu a,
ʋ bɛ dier a bɛ bʋ̃-kʋ̀rɩ ɛ.
23A Naaŋmɩn-na-do-saa-bɛ-pɩɛl-a
pʋɔ bɛ mɩ́ pɛlɩ a bɛlɩ dem
na bɛ ŋmɛlɛ kaar ʋ a
de-kʋ̀b bome ƴãw ɛ.
A bàwr-maal dʋn nʋɔr ƴãw bɛ n'a
ʋ mɩ́ dɩ a yel-bebe suur ɛ.
24Nã́w sob bʋ̃-tɛrɩ fʋ na maal'ɩ bàwr a,
a ɩ na mɛ̃ bidɛb
fʋ na ŋmaarɩ a kɔkɛɛ a sãà niŋé a.
25A nan dem mɩ́ bɔ n
a bɛ nʋɔr-dɩb hanɩ nɩ,
sob nɛ na mɩ́ ɩ bɛ bɛ páw a a,
nɩ-kʋrɛ n'ʋ.
26A fʋ tɔ n'ʋ fʋ mɩ́ kʋ,
fʋ na mɩ́ de a alɩ bome nɛ
na ɩ a ʋ nyɔ-vʋʋrʋ a.
27Nɩ-kʋ n'ɩ fʋ na sɩb a tõ-tõ-bie a ʋ yar a.
28Bʋ̃ʋ n'ʋ vɛ̃, ŋa mɩɛr'a ɛ́ ŋa darɛ lɔbr.
Bʋ̃ʋ n'ʋ bɛ nyɛrɛ a pʋɔ,
a bɛ ɩ kpɩɛrʋ tɛwr?
29Ŋa puore na, ɛ́ ŋa ŋmɩɛr ƴãwn,
a bɛ buor'ʋ a Zu-sob na bɛr wõ?
30Nɩr na tɔ kũu so a dɛwr bɛr ɛ́ lɛb tɔ a,
bʋnʋ ƴãw n'a ʋ so a dɛwr bɛr?
31Lɛ n'a a mɩ̀ ŋmɛ̃ nɩr na tɛr mʋta-tuo,
kɛ́ bɛ tʋ̃ɔ́ dɩ a ʋ yel-bebe suur kʋ̀ ʋ a zie.
Ʋlɛ wa cen lɛb tɩ maalɛ a alɩ yel-bebe nɛ a,
ãa n'ʋ na bɛr wõ a ʋ puoru?
Ɛ́ bʋ̃ʋ n'ʋ ʋ páw a ʋ tʋɔra ʋ na siwri a pʋɔ?
La Bible en Dagara © Alliance Biblique du Burkina Faso, 2013.