Ʋrɔm 16
16
A Pol na puore a nɩbɛ a
1Ɩ̃ zɛlɛ na kɛ́ nyɩ tɛr maal-ɩrɛ a tɩ yeepuule Febe ƴãw, ʋl na kaarɛ a Sãkire Lãw-yir zie a. 2Nyɩ sàw de ʋ vla a Sore yúor ƴãw, mɛ̃ a lɛ a na sɛw taa nɩ kɩrɩta-nɩbɛ zie a, ɛ́ nyɩ sõw ʋ yel za ƴãw, ʋ nãà wa tɛr a nyɩ yel-ɩra a. Bʋ̃ʋ n'ʋ vɛ̃, ʋ sõw nɩ nɩ-yaga nɩ a mãa mɩŋa.
3Nyɩ puori Pɩrɩsɩl nɩ Akɩlasɩ kʋ̀ m, bɛl na ɩ a ɩ̃ lãw-tõ-taabɛ a Yeezu Kɩrɩta tome pʋɔ a. 4Bɛ tɩ cɛ nɩ blã na kpi a ɩ̃ faafʋ ƴãw. Mãa yõ bɛ n'ʋ tɛr a bɛ maalʋ ŋa tɩɛrʋ ɛ, a nɩ-bʋʋr-yoru Lãw-yie za mɩ̀ tɛr'ɩ a ʋ tɩɛrʋ. 5Nyɩ mɩ̀ puori a Lãw-yir ʋl nɩbɛ na ɓanɛ taa a bɛ yir a. Nyɩ puori a ɩ̃ bá Epɛnɛtɩ, na ɩ a dãw-niwn sob na sàw de a Kɩrɩta a Azi tẽw a. 6Nyɩ puori a Marya na hanɩ hanɩ a nyɩ ƴãw a. 7Nyɩ puori Ãdoronikisɩ nɩ Zinɩasɩ na ɩ a ɩ̃ nɩbɛ, ɛ́ lãw nɩ mɛ̃ kpɛ a gaso a. Nɩ-toni na ɩ nɩ-toni a nɛbɛ, ɛ́ bɛ mɔ̃ mɩ̀ de nɩ niwn sàw de a Kɩrɩta a ɩ̃ ƴãw. 8Nyɩ puori Ãpiliyatisi ɩ̃ na nɔnɛ a Sore pʋɔ a. 9Nyɩ puori Irbɛ̃, tɩ lãw-tõ-tɔ a Kɩrɩta tome pʋɔ, nɩ a ɩ̃ bá Sɩtakɩsɩ. 10Nyɩ puori Apɛl na wul a sãá ʋ na sàw de a Kɩrɩta a. Nyɩ mɩ̀ puori a Arɩsɩtobul yir dem. 11Nyɩ puori a ɩ̃ nɩr Erodɩ̃ɔ, ɛ́ mɩ̀ lɛb puori Narsɩsɩ yir dem na sàw de a Sore a. 12Nyɩ puori Tɩrɩfɛn nɩ Tɩrɩfozi na hanɩ a Sore ƴãw a, ɛ́ mɩ̀ puori a ɩ̃ sɛn Pɛrsisɩ na hanɩ yaga za a Sore ƴãw a. 13Nyɩ puori Irifisɩ, a Sore tõ-tõ-bi-yúor, nɩ a ʋ mã mɩ̀ na ɩ mã a ɩ̃ zie a. 14Nyɩ puori Asɛ̃kiritɩ, nɩ Filegɔ̃, nɩ Ɛrmɛsɩ nɩ Patorobasɩ nɩ Ɛrmasɩ nɩ a yɛbr bɛl na be a bɛ zie a. 15Nyɩ puori Fɩlɔlɔgɩ nɩ Zili, Neere nɩ a ʋ yeepuule Olɛ̃pasɩ nɩ a kɩrɩta-nɩbɛ bɛl za na be a bɛ zie a. 16Nyɩ weri taa puori taa nɩ nɔ̃wfʋ na vɩɛl a. A Kɩrɩta Lãw-yie za puore nyɩ na.
A kpaal-pɛ-baara
17 Yɛbr i, ɩ̃ kpaalɛ nyɩ na kɛ́ nyɩ gùre nyɩ tʋɔra a bɛlɩ dem na bɛ dier a wulu bɛ na kʋ̀ nyɩ a ƴãw, ɛ́ mɩ́ ƴãwnɛ bʋ́r-taa a kɩrɩta-nɩbɛ sɔgɔ, ɛ́ ɩrɛ bɛ bɔrɛ a. Nyɩ taw zãá nɩ bɛ, 18bʋ̃ʋ n'ʋ vɛ̃, a nɩbɛ bɛ ŋa taabɛ bɛ kaarɛ a Kɩrɩta tɩ Sore yele zie ɩ, bɛl nyagɛ zie n'a bɛ kaarɛ. Ƴɛ̀r-vɩɛlɩ nɩ nɔ-kãá n'a bɛ mɩ́ tɛr bɛ̀lɛ nɩ a nɩbɛ bɛl na bɛ tɛr a mɩnɛ kãw a. 19A Sore nʋɔr nyɩ na sàwr a, a nɩbɛ za wõ n a yele. Lɛ so nʋ̃ɔ̀ ɩrɛ mɛ̃ a nyɩ ƴãw, ɛcɛ ɩ̃ bɔbr'a kɛ́ nyɩ ɩ yã-bãwnbɛ ɩrɛ a vla, ɛ́ vɩɛl dɛrɛ a faa. 20A Naaŋmɩn na ɩ a ƴã-ɓaarʋ sob a kʋ̃ yaa kɛ́ ƴɛ́r a Sɩtaana ŋmɛr bin a nyɩ gbɛ́ɛ pile ɩ.
A tɩ Sore Yeezu maalʋ, ʋ be a nyɩ zie! 21A ɩ̃ lãw-tõ-tɔ Timote puore nyɩ na, ʋlɛ nɩ Lisiisɩ nɩ Zazɔ̃ nɩ Sosipatɛɛr na ɩ a ɩ̃ nɩbɛ a.
22Ɛ́ mãa, Tɛrsiisɩ#16:22 Tɛrsiisɩ: A Tɛrsiisɩ n'ʋ a Pol nyɔw ƴãw ʋ ɩ sɛ-sɛbrɛ sɛb a sɛbɛ. na sɛb a sɛbɛ ŋa a, ɩ̃ lãw nɩ nɩ a Sore puore nyɩ.
23Gayisɩ, na de mãa nɩ a Lãw-yir za a sãanʋ a, puore nyɩ na. Ɛrasɩ na ɩ a tẽw libi-bine a, puore nyɩ na, ʋlɛ nɩ a tɩ yɛb Kartisɩ.
[ 24A tɩ Sore Yeezu Kɩrɩta maalʋ, ʋ be a nyɩ za zie. Amɛn.]
Naaŋmɩn danʋ na kʋ a sɛbɛ nʋɔr a
25Naaŋmɩn so danʋ! Ʋ tɛr'ɩ fãw na ɩ tɩ kpɛmɛ a sàw-deb pʋɔ tu n a Yel-nʋ̃ɔ̀ ɩ̃ na hiere manɛ nɩ a Yeezu Kɩrɩta yele a, ɛ́ mɩ̀ tu n a Naaŋmɩn pʋ-tɩɛr-sɔwla ʋ na ɩ tɩ bãw a. A pʋ-tɩɛrʋ ŋa tɩ sɔwl'ɩ a dɩta-pɛ-yome za, 26ɛcɛ ƴɛrɛŋa a, a naaŋmɩn-ƴɛ̀r-manbɛ sɛbr ɩ na k'ʋ yi cãàmɩ́. Mɛ̃ a lɛ a Naaŋmɩn na be kʋralɛ a na ƴãw a nʋɔr a, bɛ ɩ na a nɩ-bʋʋrɛ za bãw a pʋ-tɩɛrʋ ŋa, kɛ́ bɛ tʋ̃ɔ́ sàw de a Naaŋmɩn ɛ́ sàwr a ʋ nʋɔr.
27A Naaŋmɩn yõ na ɩ yã-bãwnɛ a, ʋlɛ so yúor-vɩɛlʋ-danʋ a Yeezu Kɩrɩta ƴãw, a yome yome za! Amɛn.
Currently Selected:
Ʋrɔm 16: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
