Ʋrɔm 15

Ɩrɛ nʋ̃ɔ̀ kpɩɛr a fʋ tɔ

1A tɩɩm na tɛr fãw a sàw-deb pʋɔ a, a fɛr'a kɛ́ tɩ mɩ́ sõw a bãbàalbɛ a bɛ bãbàalʋ pʋɔ, ɛ́ ta bɔbr kɛ́ tɩ ɩrɛ lɛ na nʋmɛ a tɩ zie a ɩ. 2Ŋa za a tɩ pʋɔ, ʋ mɩ́ bɔbr k'ʋʋ ɩrɛ nʋ̃ɔ̀ kpɩɛr a ʋ tɔ sob a ʋ vla ƴãw, k'ʋʋ tʋ̃ɔ́ sõwne ʋ ʋ kɛrɛ a ʋ sàw-deb pʋɔ. 3Bʋ̃ʋ n'ʋ vɛ̃, a Kɩrɩta bɛ tɩ bɔbr k'ʋʋ ɩrɛ lɛ na nʋmɛ a ʋ zie a ɩ, ɛcɛ a nɩ̃ɛ na tɩ ɩ mɛ̃ à ŋá a Sɛb-sõw na yere a: «A fʋ zʋm-tʋʋrbɛ zʋmɛ lo n a ɩ̃ zu#15:3 Nyɛ̃ Ssy 69.10..» 4A yele al za na sɛb a Sɛb-sõw pʋɔ a koro za a, tɩɩm wulu ƴãw n'a a sɛb, k'aa su-nyɔwra nɩ a mɔwlʋ a na kʋ̀rɛ tɩ a zũú, tɩ tʋ̃ɔ́ tɛr a tɩɛrʋ a Naaŋmɩn ƴãw. 5A Naaŋmɩn na ɩ su-nyɔwra nɩ mɔwlʋ sob a, ʋ ɩ nyɩ cɔwrɛ a Yeezu Kɩrɩta, wone taa vla a nyɩ cara pʋɔ. 6Lɛ n'a nyɩ na lãw tɛr tɩɛr-been nɩ nɔ-been danɛ nɩ a Naaŋmɩn, tɩ Sore Yeezu Kɩrɩta Sãà.

Yel-nʋ̃ɔ̀ a nɩ-bʋʋrɛ za ƴãw

7A na ɩ lɛ a, nyɩ dier taa mɛ̃ a lɛ a Kɩrɩta na de nyɩ, Naaŋmɩn tʋ̃ɔ́ nyɛ̃ danʋ a. 8Bʋ̃ʋ n'ʋ vɛ̃, ɩ̃ yere na kʋ̀rɛ nyɩ, a Naaŋmɩn na ŋmɛ̃ ʋ ŋmɛ̃a a zũú n'a, a Kɩrɩta lɩɛbɩ a Zifʋ mɩnɛ tõ-tone, k'ʋʋ tu a nɛ́ɛ a Naaŋmɩn na ƴãw kʋ̀ a bɛ sãàkʋm-kore a. 9A bɛl na bɛ ɩ Zifʋ mɩnɛ a, a Naaŋmɩn nɩ-bàal-zɔba zũú n'a bɛ danɛ ʋ, a tu mɛ̃ a lɛ a Sɛb-sõw na yel a:

«Alɛ n'a so ɩ̃ na danɛ fʋ

nɩ-bʋʋr-yoru sɔgɔ,

ɩ̃ na yiele na ƴãwnɛ nɩ a fʋ yúor#15:9 Nyɛ̃ 2Sa 22.50, Ssy 18.50..»

10A Sɛb-sõw mɩ̀ lɛb'a yel:

«Nɩ-bʋʋrɛ ɛ, nyɩ cɩlɛ lãwnɩ a Sore nɩbɛ!»

11Ɛ́ lɛb maalɛ:

«Nɩ-bʋʋrɛ ɛ, nyɩ danɛ a Sore nyɩ za,

nyɩɩm nɩbɛ za, nyɩ íre a ʋ yúor!#15:11 Nyɛ̃ Ssy 117.1.»

12Ɩzayi mɩ̀ cãà na yere:

«A Zese bʋʋrɛ nɩr na wa na,

ʋ na ìr'a dɩrɛ naalʋ a nɩ-bʋʋr-yoru zu,

ɛ́ bɛ na ƴãw nɩ a bɛ tɩɛrʋ a ʋ ƴãw#15:12 Nyɛ̃ Ɩza 11.10..»

13A Naaŋmɩn na n'ʋ tɩ mɩ́ tɩɛrɛ a, ʋ ɩ kɛ̀ nʋ̃ɔ̀ nɩ ƴã-ɓaarʋ paalɩ nyɩ a nyɩ sàw-deb pʋɔ, k'aa nyɩ tɩɛrʋ nyɩ na ƴãw a Naaŋmɩn ƴãw a, ɩ kpɛ̃ɛ yaga za a Vʋʋrʋ Sõw fãw zũú.

A Pol tome ʋ na tõ a

14Ɩ̃ yɛbr i, ɩ̃ mɩŋa za bãwnɩ a na nyɩ na tɛr tɩɛr-vɩɛlɩ yaga ɛ́ bãw bom za vla, na tʋ̃ɔ́ wule nɩ taa yã a. 15Ɛcɛ ɩ̃ nyɔw nɩ nyãa bʋʋrɛ kãw sɛb'ɩ nyɩ a ɩ̃ sɛbɛ ziir a mɩnɛ, k'ɩ̃ɩ tʋ̃ɔ́ sɩ̃w a nyɩ tɩɛrʋ. Ɛ́ mãa wa sɛb a lɛ a, a ɩ n a maalʋ a Naaŋmɩn na kʋ̀ m a zũú n'a, 16k'ɩ̃ɩ ɩ a Yeezu Kɩrɩta tõ-tõ-bie a nɩ-bʋʋr-yoru ƴãw. Tõ-sõw n'ʋ ɩ̃ tone hiere a Naaŋmɩn Yel-nʋ̃ɔ̀, k'aa nɩ-bʋʋr-yoru lɩɛbɩ bàwr-maal-bom na nʋmɛ a Naaŋmɩn zie a, bàwr-maal-bom Vʋʋrʋ Sõw na ɩ k'ʋ ɩ sõw a. 17A na ɩ lɛ a, mãa nɩ a Yeezu Kɩrɩta na lãw taa a, ɩ̃ na tʋ̃ɔ́ na nyʋʋr a ɩ̃ ton ƴãw ɩ̃ na tone a Naaŋmɩn ƴãw a. 18Bʋ̃ʋ n'ʋ vɛ̃, mãa wa sʋ̃ɔmɩ sàw ƴɛ̀rɛ bom kãw ƴɛ̀rʋ a, a ɩ n a ʋlɩ bom nɛ a Kɩrɩta na tu a ɩ̃ zie maalɩ, k'ʋʋ ɩ a nɩ-bʋʋr-yoru sàwr a Naaŋmɩn nʋɔr a. Ƴɛ̀rʋ nɩ ɩ-ɩrɩ n'a ʋ maal'ɩ a yel ʋl, 19nɩ yele na ɩ bãwfʋ sãá a fãw, nɩ yel bãw-guuri nɩ a Naaŋmɩn Vʋʋrʋ Sõw fãw. À ŋá n'a ɩ̃ tĩ a Zerizalɛm ɛ́ yel a Kɩrɩta Yel-nʋ̃ɔ̀ vla za gʋɔr'ɩ tɩ ta n Ɩlɩɩrɩ. 20Ɛcɛ ɩ̃ bɛ sàw yel a Yel-nʋ̃ɔ̀ be nɩbɛ na wõ a Kɩrɩta yele a ɩ, k'ɩ̃ɩ taa wa mɩɛr a dacine dɔwlɛ yir pɛr zu nɩ-yũo na lɔb a ɩ. 21A na ɩ à ŋá a, ɩ̃ tu na mɛ̃ a lɛ a Sɛb-sõw na yel a:

«A bɛlɩ dem bɛ na bɛ tɩ yel a ʋ yel kʋ̀ a,

bɛ na nyɛ̃ ʋ na,

ɛ́ a bɛlɩ dem na bɛ tɩ wõ a ʋ yele a,

na bãw nɩ a pɛr#15:21 Nyɛ̃ Ɩza 52.15..»

A Pol na ƴɛ̀rɛ Ʋrɔm cenu ƴɛ̀rʋ a

22A yel ŋa n'ʋ bɛ sɩrɩ sàw ɩ̃ wa a nyɩ zie gb'aa ŋmɩn za ɩ. 23Ɛcɛ ƴɛrɛŋa a, zie bɛ cɛ ɩ̃ bɛ tɔ a voru á ŋá pʋɔ ɩ. A yome yãwmɛ na ɩ̃ na bɔbr a nyɩ zie waa a, 24ɩ̃ɩ bɔbr'a kɛ́ mãa wa cere a Ɛsɩpanyɩ a, mãa tu a be. Bʋ̃ʋ n'ʋ vɛ̃, ɩ̃ tɩɛrɛ na kɛ́ mãa wa tɔlɛ a, mãa nyɛ̃ nyɩ, ɛ́ nyɩ sõw mɛ̃ ɩ̃ cen a tẽw ŋa. Ɛcɛ, ɩ̃ na de nɩ niwn be a nyɩ zie blãlɛ wõ nʋ̃ɔ̀ baarɩ. 25Ƴɛrɛŋa a, Zerizalɛm'a ɩ̃ cere a kɩrɩta-nɩbɛ tome ƴãw. 26Bʋ̃ʋ n'ʋ vɛ̃, a Masedʋan nɩ a Akayi kɩrɩta-nɩbɛ yel'a kɛ́ bɛ na cɩɛr'ɩ bome sõw nɩ a Zerizalɛm kɩrɩta-nɩbɛ na bɛ tɛr a a. 27Bɛl mɩŋa nɛbɛ nyɛ̃ bɛ tʋɔra ɩ a lɛ, ɛcɛ yel-mɩŋa za, a tɩ fɛr'a kɛ́ bɛ sõw bɛ. Bʋ̃ʋ n'ʋ so, a Zifʋ kɩrɩta-nɩbɛ ɩ n a Naaŋmɩn maalʋ kʋ̀ a nɩ-bʋʋr-yoru. A na ɩ lɛ a, a fɛr'a k'aa nɩ-bʋʋr-yoru mɩ̀ sõw bɛ a bɛ ƴã-gamɛ yel-bɔbrɩ pʋɔ. 28Mãa wa tu a yel ŋa pùor baarɩ, kʋ̀ bɛ a cɩɛrʋ bome a, ɩ̃ na tu n a nyɩ zie cen a Ɛsɩpanyɩ. 29Ɩ̃ɩ bãwnɩ a na kɛ́ mãa wa waar a nyɩ zie a, a Kɩrɩta maalʋ yaga za n'a ɩ̃ na wa n.

30Ɛcɛ yɛbr i, bom ŋa n'ʋ ɩ̃ zɛlɛ a nyɩ zie, a tɩ Sore Yeezu Kɩrɩta ƴãw, nɩ a nɔ̃wfʋ a Vʋʋrʋ Sõw na tɩrɛ a ƴãw: nyɩ lãw nɩ mɛ̃ a ɩ̃ mɔb pʋɔ, puore a Naaŋmɩn kʋ̀rɛ mɛ̃. 31Nyɩ puore k'ɩ̃ɩ taa lore a Zude tẽw nɩbɛ bɛl na bɛ sàw de a nuru pʋɔ ɩ, ɛ́ a sõwfʋ ɩ̃ na cere nɩ a, a kɩrɩta-nɩbɛ sàw de ʋ vla. 32Lɛ n'a ɩ̃ na tɛr pʋ-pɩɛlʋ wa n a nyɩ zie, Naaŋmɩn wa sàw a, wa lãw nɩ nyɩ pɩ̃ɛnɩ blã. 33A Naaŋmɩn na ɩ a ƴã-ɓaarʋ sob a, ʋ be a nyɩ za zie. Amɛn.

Currently Selected:

Ʋrɔm 15: DBDC

Highlight

Copy

Compare